“Улс төрийн тогтолцоо ба Үндсэн хууль” хэлэлцүүлэг өнөөдөр Төрийн ордноо болж өндөрлөлөө. Хэлэлцүүлэгт, улс төрийн 20 гаруй намуудын төлөөлөл хийгээд УИХ-ын гишүүд, шинжээч, судлаачид оролцов. Энэ үеэр УИХ-ын гишүүн асан Д.Батцогт байр сууриа илэрхийллээ.

Тогтолцооны шинэчлэл гэдгийг зөвхөн сонгуулийн тогтолцоогоор ойлгож болохгүй.

Тэрбээр “Өнөөдөр сонгуулийн тогтолцоог өөрчлөх тухай асуудлыг ярьж байна. Би санал нэг байгаа. Мөн дэмжиж байгаа. Энэ олон улс төрийн намууд парламентдаа орж ирээд, олон ургальч үзлээ уралдуулаад явдаг байх ёстой. Бид 30 жил тогтолцоогоо шинэчлэх тухай ярьж байгаа. Хоёр танхимтай байх уу, нэг танхимтай байх уу зэргээр мэтгэлцээд явдаг. Сонгуулийн тогтолцоог өөрчилье гэдэг асуудал Үндсэн хуулинд өөрчлөлт оруулахтай холбогдоно. Тэгэхээр парламентаа хуралдуулаад, Монголын парламент хоёр эсхүл нэг танхимтай байх эсэхээ шийдмээр байна. Бид Үндсэн хуулинд ойр, ойрхон өөрчлөлт оруулдаг улс болчихлоо. Энэ бол сайн зүйл биш. Дутуу хийчихлээ гээд дөрвөн жил тутамд Үндсэн хуулинд өөрчлөлт оруулаад байх уу. Нэг мөр олон талаас нь ярьж байгаад, нийгмээрээ зөвшилцөл явуулж, сонгодог парламентын тогтолцоо гэдэг зүйлээ хийчихвэл яасан юм бэ. Сонгодог парламентын тогтолцоо нь гишүүдийнхээ тоог нэмэх гэж ойлгоод байгаа юм уу, аль эсвэл пропорцианаль хэлбэрт шилжихийг хэлээд байгаа юм уу. Үгүй бол гишүүддээ давхар дээл өмсгөхийг хэлээд байгаа юм уу. Угтаа энэ бүгдээс шал өөр ойлголт шүү дээ. Энэ бүгдийг олон талаас нь ярьж байж, өөрчлөлтөө хиймээр байна. 30, 40 жил Үндсэн хуулиндаа гар хүрдэггүй улс болмоор байна. Энэ холимог тогтолцоо, гишүүдийн тоог нэмэх гэдэг асуудлууд дараа нь яригдана. Тогтолцооны шинэчлэл гэдгийг зөвхөн сонгуулийн тогтолцоогоор ойлгож болохгүй. Сонгуулийн тогтолцоогоо эргээд жижиг 76 болгох гэж байна шүү дээ. Ийм ухралт руу яваад байвал Монгол Улс яаж хөгжих юм бэ. Аймаг нэг тойрог байсан бол эргээд аймгийг 3, 4 хуваагаад “жалгын гишүүн” гэдэг зүйлийг ахиад бий болох гээд байна. Энэ асуудлуудаа бүгд нийлж ярьж байгаад өөрчлөлт хийвэл хийх шиг хийе. Дараа нь дутуу юм хийчихлээ гэж хэлэхээргүй байя” гэв.