Нийслэлийн хүн амыг эх орны хөрсөнд ургасан чанартай төмс, хүнсний ногоогоор хангах, нөөцлөх, нөөшлөх боломжийг бүрдүүлэх зорилгоор Улаанбаатар хотын Ерөнхий менежерийн наймдугаар сарын 4-ний өдрийн А/104 дугаар тушаалаар “Алтан намар-2025” төмс, хүнсний ногооны өргөтгөсөн худалдааг нийслэлийн есөн дүүргийн 21 байршилд наймдугаар сарын 8-ны өдрөөс зохион байгуулахаар баталжээ.

Одоогоор Чингэлтэй, Баянзүрх, Сүхбаатар, Сонгинохайрхан дүүргийн нийт дөрвөн байршилд өргөтгөсөн худалдаа эхэлжээ.

Чингэлтэй дүүрэгт Бага тойруу гудамж дахь Барилгачдын талбай болон Бөмбөгөр худалдааны төвийн гадна талбайд үзэсгэлэн худалдаа зохион байгуулагдаж байгаа бол, Баянзүрх дүүрэгт Сансар үйлчилгээний төвийн гадна, Жуковын талбай, Дүнжингарав захын баруун талын талбайд ногоо худалдаалж байна.

Сүхбаатар дүүргийн Хичээнгүй сайд Б.Цэрэндоржийн гудамж, ХУБТ-ын хойд тал, хорооны байрны дэргэд байрлах хүнсний ногооны контейнер худалдааны төвүүд иргэдийг хүлээн авч байгаа бол Сонгинохайрхан дүүргийн Баянхошуу шинэ эцсийн буудал, Сүлжмэл компанийн урд талбай, Орбитын тойрогт өргөтгөсөн худалдаа өрнөж байна.

 “Алтан намар-2025” худалдаа нь төмс, хүнсний ногоог хямд үнээр, шууд тариалагчаас авах боломжийг олгож, иргэдийн худалдан авах нөхцөлийг сайжруулах зорилготой аж.