Улаанбаатар хот хүүхдэд ээлгүй, аюулгүй байдалд нь үргэлж заналхийлж буйг нотлох нэг жишээ бол Чингэлтэй дүүргийн 39 дүгээр сургууль. Одоогоос 55 жилийн өмнө баригдсан хичээлийн байртай. Хичээлийн байраа тойруулж хашаа татсан алга дарам газар нь сургуулийн эзэмшилд үлдэж харин үлдсэн нь шунахай сэтгэлтний гараар орж өдгөө 39 дүгээр сургуулийг тойрсон бизнес цэцэглэж байна.

Газраа алдсан сургуулийн сурагчид ангидаа багтахгүй гурван ээлжээр хичээллэхэд хүрч, биеийн тамир, урлагийн заалгүй, сургууль руугаа ирж, очих замдаа машинд дайруулах, баригдаж буй барилгын техник, хэрэгсэлд оногдож бэртэж, гэмтэх эрсдэл дундуур өдөр бүр эрүүл энх, амьд байхын тэмцэлд аз сорьсоор олон жилийг өнгөрөөжээ. Сургуулийн удирдлага эцэг, эхчүүд нөхцөл байдлаа шат шатны албан тушаалтнуудад уламжилж, шаардлага хүргүүлдэг ч мөнгө цагаан нүд улааны жишгээр тухайн нөхцөл байдлыг хэн ч тоож хэлэлцэлгүй өнөөдрийг хүрсэн аж.

ЯАГААД ИЙМ БАЙДАЛД ХҮРЭВ?

Газрын наймаа цэцэглэж, албан тушаалтнууд дураараа дургиж явсан үед Чингэлтэй дүүргийн Иргэдийн хурлын даргаар ажиллаж байсан Дамжингийн Бат-Эрдэнийн шуналыг 39 дүгээр сургуулийн 9600  м2 талбай бүхий газар татаж, захирлыг газрын гэрчилгээ, бичиг баримтаа дүүрэг дээр авчирахыг удаа дараа шаардаж эхэлсэн.

Тухайн үеийн сургуулийн захирал нь газрынхаа бичгийг гэртээ нуудаг байсан бөгөөд 2010 оны сүүлээр нас барах хүртлээ сургуулийн газраа хамгаалж үлдсэн байдаг. Харамсалтай нь захирал нас барснаар 2011 онд сургуулийн биеийн тамирын талбайн газрыг Чингэлтэй дүүргийн өмч болгон шилжүүлж улмаар Иргэдийн хурлын дарга асан Д.Бат-Эрдэнийн эзэмшдэг “Эрдэнэсуварга”  ХХК спорт цогцолбор барьж эхэлсэн.

Ингэхдээ тус сургуультай дамжих хоолойгоор холбож, сурагчид спорт цогцолборт биеийн тамирын хичээлээ орох бүрэн боломжтой гэж чихэн дээр нь цэцэг ургуулсан аж. Спорт цогцолборын нээлт 2022.05.12-ны өдөр болж Нийслэлийн Засаг даргын орлогч асан З.Төмөртөмөө “39 дүгээр сургуулийн сурагчид спорт цогцолборт биеийн тамирын хичээлээ орж, спортын төрлүүдээр хөгжих боломжтой болж байна” хэмээн хэлсэнд магнайгаа хагартал баярласан багш, сурагчдын халуун уухай, улайстал ташсан алга ташилтын чимээ өчигдөрхөн мэт санагдавч хэдийнээ хоёр жил тойрч, нөхцөл байдал өдөр ирэх тусам дордсоор байна.

9600 м2 талбай бүхий газрынхаа 50 хувийг дээрэмдүүлсэн 39 дүгээр сургуулийнхан урд талдаа өргөтгөл барьж, спорт заалтай болох гэтэл тэр газарт нь 450 айлын 16 давхар бүхий 3 блок орон сууцыг мөн л Д.Бат-Эрдэнийн “Соёмбозод орд” ХХК бариулж, ирэх долдугаар сард ашиглалтад оруулахаар төлөвлөжээ.

Ингээд 39 дүгээр сургууль хаашаа ч байсан сунгах, өргөтгөл барих газаргүй болж, шахагдсан, давчуу орчинд стандартын бус нөхцөлд 1900-аад сурагчтай хичээллэж байгаа юм. Тус сургуулийн орчмын аюулгүй байдал, анги дүүргэлт хэдийн алдагдсан. Магад нэг өглөө босоод ирэхэд сургуулийг нь нураана гэх шийдвэр гарчихсан, газар нь Д.Бат-Эрдэнийн эзэмшилд шилжчихсэн байвал гайхах зүйлгүй юм.

ДАМЖИНГИЙН БАТ-ЭРДЭНЭ ГЭЖ ХЭН БЭ?

Угтаа бол Дамжингийн Батмөнх гэх нэрийг эцэг, эх нь түүнд заяасан ч 2009 онд Нийслэлийн Засаг даргын хэрэгжүүлэгч агентлаг болох Нийслэлийн авто замын газрын даргын албыг хашиж байхдаа Авлигатай тэмцэх газраас төсвийн хөрөнгийг хууль бусаар захиран зарцуулсан эрүүгийн хэрэгт шалгасан байдаг. Эрүүгийн хэргийг шалгах явцдаа Дамжингийн Батмөнх нь нэрээ Дамжингийн Бат-Эрдэнэ болгон өөрчилж, ялаас мултарч явсан шийдчихсэн эр.

1995 оноос Чингэлтэй дүүргийн Иргэдийн төлөөлөгчдийн хурлын төлөөлөгчөөр сонгогдон ажиллаж эхэлсэн.“Улаанбаатар зам засвар, арчлалт” НӨҮГ-т захирал, Нийслэлийн авто замын газрын дарга, Чингэлтэй дүүргийн иргэдийн төлөөлөгчдийн хурлын дарга гээд 2021 оныг хүртэл даргын ямба, албан тушаал дагасан эрх мэдлээс салаагүй нэгэн. 

Түүний 2018, 2019 онуудад АТГ-т мэдүүлсэн хөрөнгө, орлогын мэдүүлэгт "Соёмбозод интернэшнл” ХХК, “Эрдэнэс таван толгой” ХК, “Соёмбозод орд” ХХК, “Эрдэнэсуварга” ХХК-иудад хувь эзэмшдэг хэмээн бүртгүүлсэн нь өдгөө Чингэлтэй дүүргийн 39 дүгээр сургуулийн газрыг булааж, спорт цогцолбор, орон сууцны барилга барьж буй компаниуд юм.

Харин хэргийн эзэн, хэнгэрэгийн дохиур Д.Бат-Эрдэнэ усанд хаясан  чулуу шиг ор сураггүй алга болсон ч түүний эзэмшлийн компаниуд хүүхдүүдийн ирээдүйгээс хулгайлсан газартаа хууль ёсны мэт үйл ажиллагаагаа явуулсаар. Гэвч нэрээ сольж, газар дээрэмдсэн Д.Бат-Эрдэнэд хариуцлага тооцох хуулийн байгууллага, албан тушаалтан алга. Хэрэг хуучирдаггүй тул Д.Бат-Эрдэнийг шалгаж эхэлмэгц тухайн үеийн дүүргийн болон хотын удирдлага, сургуулийн захирал, газрын албаныхан гээд гэмт хэргийн хамсаатнууд ил болж, хуйвалдсан хэрэг нь илчлэгдэх учиртай. Хэрэгтэн нь хариуцлагаа үүрч, хэлмэгдсэн хүүхдүүд Үндсэн хуульд заагдсан эрхээ эдлэхэд анхаарна уу хотын дарга Х.Нямбаатар аа.