Авлигатай тэмцэх газраас алдагдсан “гэмт хэрэгтэн” Дамжингийн Бат-Эрдэнэтэй холбоотой мэдээллийг бид өмнө нь хүргэсэн.

Өмнөх мэдээллийг ЭНД дарж уншина уу.

Тэгвэл энэ удаад түүнтэй холбоотой гэмт хэргүүдийн талаар хүргэе.

НЭРЭЭ СОЛЬЖ ЯЛААС МУЛТАРСАН НЬ

Түүнийг 2009 онд Нийслэлийн Засаг даргын хэрэгжүүлэгч агентлаг болох Нийслэлийн авто замын газрын даргын албыг хашиж байхад Авлигатай тэмцэх газраас төсвийн хөрөнгийг хууль бусаар захиран зарцуулсан эрүүгийн хэрэгт шалгасан байдаг. Эрүүгийн хэргийг шалгах явцдаа Дамжингийн Батмөнх нь нэрээ Дамжингийн Бат-Эрдэнэ болгосон буюу иргэний хуурамч бичиг баримттайг тогтоогджээ. Хүний нэрээр амьдарч, улсын төсвөөс хумслах бус шанагаар хутгаж, хагартлаа баяжсан гэгддэг түүний хэргийг Авлигатай тэмцэх газраас хууль зөрчиж, дүүрэгт хохирол учруулаагүй хэмээн шийдвэрлэсэн нь бөгөөд өдгөө ч тухайн хүнийг АТГ-д шалгаж, шалгуулж байсан ул мөр байдаггүй нь хачирхалтай. Холион бантан, хамаг хорны эзэн явсан тэрээр өөрийн эзэмшлийн компаниуддаа ЧД-ийн ЕБС-ийн 39 дүгээр сургуулийн эргэн тойрон дэх газраас алга дармыг ч үлдээлгүй хуу хамж өгчхөөд эцэст нь усанд хаясан чулуу шиг ор сураггүй алга болсон. Нэгэнт хулгайлдгаа хулгайлж, халаасаа түнтийлгэдгээрээ түнтийлгэчхээд нэрээ сольж чадсан хүн одоо зүсээ хувиргаж гоо сайхны мэс засалд орчхоод нэгэнт нэг удаа сольж болсон нэрийг ахиад сольчихсон хаа нэгтээ тууж явахыг үгүйсгэх аргагүй. 

ХУЛГАЙ ХИЙХИЙН ТУЛД ХУДАЛДАЖ АВСАН ХУУРАМЧ ДИПЛОМ

Монгол Улсад төрийн алба хаах хууль, дүрэм журам гэж зүйл бий. Мэдээж мэргэжлийн сургууль төгссөн бичиг баримт бол хамгийн эхний шалгуур. Дипломтой бол Төрийн албанд ажилд орох, тэр дундуур хөрөнгө завшиж, хөлжих албан тушаалд томилогдох анхны алхмаа хийнэ. Харин хүний нэр зээлсэн Д.Бат-Эрдэнэ өдөө аж ахуйн их сургууль, Санхүү эдийн засгийн дээд сургуулийг дүүргэсэн гэх ажил, мэргэжлийн диплом нь хуурамч болохыг тогтоон Авлигын эсрэг хуульд заасны дагуу хариуцлага тооцох албан бичгийг 2009 ондоо тухайн үед хотын дарга байсан Г.Мөнхбаярт хүргүүлж байсан. Авлигатай тэмцэх газраас бүрэн эрхийнхээ хүрээнд тавьсан хууль хэрэгжүүлэх удаа дараагийн шаардлагын дагуу хотын дарга асны авсан арга хэмжээ нь Д.Бат-Эрдэнийг ажлаас чөлөөлсөн төдий нүглийн нүдийг гурилаар хуурсан шийдвэр байсныг 2009 оноос хойш хашсан "том" албан тушаалууд нь нотолно.

УУРЫН ЗУУХААС ХАЛУУН УС, БҮР ДАВРААД СПОРТ ЦОГЦОЛБОР БАРИУЛСАН ТҮҮХ

Чингэлтэй дүүргийн 10 дугаар хорооны иргэд Д.Бат-Эрдэнийг андахгүй. Уурын зуух ажиллуулж, “Эрдэнэсуврага” хэмээх үйлчилгээний төв, халуун усны газартай болсон. Харин өнөөдөр “Эрдэнэсуврага” ХХК нь Чингэлтэй дүүргийн 39 дүгээр сургуулийн сурагчдыг Монголд байхгүй спорт цогцолборт спортын бүх төрлөөр биеийн тамирын хичээл ордог болгоно гэж чихэн дээр нь цэцэг ургуулж, цонхны цаанаас чихэр долоолгочхоод ичихгүй алхам бүртээ төлбөртэй спорт цогцолбор барьсан ч сурагчид хичээл орох нь бүү хэл ойртох эрхгүй болжээ. 

Хүүхдүүдийг урлагийн болон спортын заалгүй болгосон нь багадаад өргөтгөл барих боломжтой үлдсэн сүүлчийн газар нь 3 блок 16 давхар орон сууцыг зай завсаргүй шахаж бариад дуусаж байна. Харин сурагчид сурч, мэдэх, хөгжих эрхээ зөрчүүлээд зогссонгүй. Өдрийн ихэнх цагаа өнгөрөөдөг сургуульдаа нар үзэх эрхгүй болж шуналтны золиос болж хохирсоор.

Тэд ирэх намар урлагийн болон спортын заалаа мөрөөдсөөр хэвээр сургуульдаа ирэхэд анги танхим нь өдрийн цагт ч наргүй харанхуйлж, гурван ээлжээр хичээллэж айдастай, нохойтой харанхуй гудамжаар өглөө, оройны цагт аюул дундуур хичээлдээ ирж, очно. 

Д.Бат-Эрдэнийн тарьсан гай, балгаар сургууль дотор тэсэхийн аргагүй өмхий өдөржингөө үнэртдэг тухай сургуулийн удирдлага, багш, ажилчид, сурагчид ярьж байсан. Энэ байдал Д.Бат-Эрдэнийн эзэмшлийн 520 айлын орон сууц ашиглалтад орохоор улам нэмэгдэж, бохир нь хальж урсах эрсдэл өндөртэй аж. Бүхнээ булаалгасан 39 дүгээр сургууль нэг өдөр Д.Бат-Эрдэнийн бохирт живсэн гэж сонсогдвол үүнд гайхах хэрэггүй биз дээ.