Эрчим хүчний сайд Б.Чойжилсүрэн "Орон нутаг, улсын төсвөөс 22 тэрбум төгрөгийг Увс аймгийн 100 жилийн ойд зориулан зарцуулсан. Улаангомын Төв цэнгэлдэх орчмын тохижилт цахилгаан хангамж, төв замын гэрэлтүүлгийг шийдвэрлэхэд миний багцаас 2 тэрбум төгрөг гарсан" хэмээн үндэсний телевизээр ярьсан нь баримт болон үлджээ. Төсвийн буюу татварын бүр тодруулбал бидний мөнгийг минийх хэмээн ярьсан тухайгаа Эрчим хүчний сайд ийн тайлбарлалаа.

"Увс аймгийн 100 жилийн ой 2025 онд тэмдэглэн өнгөрүүлэх нь ойлгомжтой байсан. Би 2008 оноос хойш Увс аймгаас таван удаа УИХ-д сонгогдсон. Тиймээс 100 жилийн ойг зохион байгуулах ажилд гар бие оролцсон. Мөн би 2009 оноос инагш Увс аймгийн Улаанбаатар хот дахь нутгийн зөвлөлийн даргын албыг хашиж буй хүн. Үнэндээ 100 жилийн ойг зохион байгуулахад хоёр зорилго тавьсан. Эхнийх нь мэдээж тойргоос сонгогдож, саналыг нь авчихсан юм чинь ард түмэндээ үйлчлэх цаг гэдгээ ухамсарлаж байсан. Хоёрдугаарт ойг одоо тохиолдуулаад нутгаа сурталчлаад авъя л гэсэн юм. 

Сүүлийн жилүүдэд манай аймагт гадаад, дотоодын аялал жуулчлал нэлээд хөгжсөн. ДНБ-д оруулж буй хувь нэмэр, эдийн засаг болон иргэдийн амьжиргаанд үзүүлэх нөлөө нь мэдэгдэхүйц нэмэгдсэн. Тэр утгаараа аймгийнхаа ойг тэмдэглэхдээ баяр ёслол хийгээд зогсохгүй нутгаа сурталчлах, аялал жуулчлалын дэд бүтцийг зэрэг шийдье гэж зорьсон.

Ойг тэмдэглэх ажилд хувийн хэвшлийн оролцоо өндөр байсан. Тухайлбал, Увс аймагт үйл ажиллагаа явуулдаг бизнес эрхлэгчид, угсаа гаралтай иргэд нийлээд 11 орчим тэрбум төгрөгийн санхүүжилт гаргасныг урсгал зардал, зохион байгуулалтын зардалд ашигласан. 

2 тэрбум төгрөгийн тухайд ойн арга хэмжээ, цаашдын аялал жуулчлалыг дэмжих бодлогын хүрээнд хийсэн хөрөнгө оруулалт. Цаашид ч үргэлжилнэ.

Мөн ойтой холбоотойгоор бүтээн байгуулалтын ажлууд хийсэн. 2023 оноос хойш 22 тэрбум төгрөгийн хөрөнгө оруулалтын ажил эхэлсэн бөгөөд зарим нь ойн өмнө амжиж дуусахгүй шинжтэй байсан учраас компаниудтай уулзаж, ажил гүйцэтгэлийг урагшлуулах хүсэлт тавьсан нь үнэн.

Үнэнийг хэлэхэд, би сүүлийн хэд хоног нойргүй, бэлтгэл ажилд оролцож, ядарсан байх үедээ Эрчим хүчний сайдын багцыг “миний төсөв”, “миний багц” гэж ярьчихсан. Багцын хөрөнгөөр Увс аймгийн Улаангом сумын 2, 4, 11 дүгээр багт хэд хэдэн ажил хийж гүйцэтгэсэн. Тодруулбал, “Баруун тойргийн авто зам” гэгддэг 2 км гаруй урттай замын ажил. 3.6 тэрбум төгрөгийг 2024 оны улсын төсөвт суулгаж, ажлыг эхлүүлсэн нь 90 хувьтай ашиглалтад орсон. Мөн дээрх багуудын цахилгаан хангамжийн асуудлыг шийдвэрлэсэн.

Тендерийг Худалдан авах ажиллагааны газар зарласан бөгөөд өрсөлдөөний үр дүнд гүйцэтгэлээрээ 1 тэрбум 851 сая төгрөгөөр хийгдсэн. Миний хувьд ядаргаатай ачаалал ихтэй байсан учраас “миний багц” гэж андуурч хэлсэндээ уучлал хүсье” гэлээ.