АНУ даяар ховор тохиолддог “тархи идэгч” амёбын талаар анхааруулга гарчээ. Эх сурвалжийн өгүүлснээр энэхүү амёба нь цэнгэг нуурын ус болон крантны усанд илэрсэн байна. 

Тодруулбал өмнөд Каролина мужид 12 настай хүү Лэйк Мюррей нуурт сэлсний дараа Naegleria fowleri амёбагаар халдварлаж, амь насаа алдсан харамсалтай хэрэг гарчээ.  Энэ паразит хамраар дамжин хүний биед орж, анхдагч амёбын менингоэнцефалит (PAM) гэх тархины үхлийн аюултай халдварт хүргэдэг аж.

Мөн Техас мужид 71 настай эрүүл эмэгтэй амралтын баазад байхдаа хамрын угаалга хийхдээ крантны ус хэрэглэснээс болж нас барсан байна. Судалгаагаар энэ нь мөн л Naegleria fowleri-гийн халдвар байсан бөгөөд болзошгүй шалтгаан нь цэвэршүүлээгүй RV буюу аяллын машины ус эсвэл муу ариутгасан ус юм.

Тархи идэгч амёбаын талаар дараах зүйлсийг мэдэх хэрэгтэй:

• Naegleria fowleri амёба нь дулаан цэнгэг усанд амьдардаг ба зарим тохиолдолд муу ариутгасан крантны ус эсвэл RV-н усан системд илэрч болно.

• Энэ амёба нь хамраар дамжин халдварладаг — ууж хэрэглэснээр халдварлахгүй.

• Анхны шинж тэмдгүүд нь: толгойн өвдөлт, халуурах, дотор муухайрах, хүзүү хөших — цаашлаад таталт өгөх, ухаан алдах, хэдхэн хоногийн дотор үхэлд хүргэх магадлалтай.

• АНУ-д жилд 10-аас бага тохиолдол бүртгэгддэг ч 1960-аад оноос хойш зөвхөн 4 хүн л амьд гарсан түүхтэй.

Эрсдэлийг бууруулах арга:

• Зуны улиралд цэнгэг нуур, гол, халуун рашаанд шумбахдаа хамарт ус оруулахаас зайлсхий.

• Хамар амны угаалганд хэзээ ч шууд крантны ус бүү хэрэглэ — зөвхөн буцалгаж хөргөсөн, эсвэл ариутгасан, дистилляц хийсэн усыг хэрэглээрэй.