"ДЦС-3" ТӨХК-д дахин дэлбэрэлт гарсан асуудлаар  БЭТ Н.Тавинбэх мэдээлэл өглөө. Тэрбээр "ДЦС-3" ТӨХК бол насжилт өндөртэй, олон ажилтантай, тасралтгүй үйл ажиллагаатай, нарийн технологитой станц. Тийм учраас техникийн саатал гардаг. Яг ийм саатал өнгөрсөн наймдугаар сарын 01-ний өдөр гарсан. Энэ бол анх удаа гарч байгаа зүйл биш. Энэ асуудлыг онцгой дэглэм тогтоосон, сэргээн босголтын ажил явж байгаа үед сенсаци болгон нийгэмд цацсанд харамсаж байна.

Өнгөрсөн өвөл гэхэд энэ төрлийн гэмтэл 15 удаа гарсан. Засгийн газраас томилогдсон БЭТ-ийн хувьд "ДЦС-3" ТӨХК-д шинэчлэл хийж, үргүй зардал дээр анхаарч ажиллаж байгаа. Үүнд дургүйцсэн хүмүүс мэдээлэл тарааж, нийгэмд буруу ойлголт төрүүлсэн байж болзошгүй байна.

Үүнийг хууль хяналтын байгууллагаар шалгуулах болно. Станцад осол гарч байхад нэгэндээ туслахын оронд бичлэг хийж зарсан асуудалд харамсаж байна. Ийм хүн хамт олны дунд байх ёсгүй гэж үзэж байна.

Түүнчлэн "ДЦС-3" ТӨХК-ний нийт тоноглолын 70 хувь нь ашиглалтын хугацаа дууссан. Бид цаашдаа засвар хийж явах боломжгүй болж байна. Тиймээс дор хаяж 60 хувийг нь бүрэн шинэчлэх шаардлагатай. Үүнд Засгийн газраас анхаарал хандуулж 2025 оны төсвийн тодотголоор нийт 75 МВт хүчин чадал бүхий хоёр машины санхүүжилтийн асуудлыг шийдвэрлэж өгсөн. Энэ мэт цаашдаа үе шаттайгаар шинэчлэл хийвэл, станцын ашиглалтын хугацаа цаашдаа 30-40 жилээр уртасна.

"ДЦС-3" ТӨХК гарсан дэлбэрэлтийн улмаас ажиллагаагүй болсон турбин генераторыг засварлахад 12-16 сарын хугацаа шаардлагатай гэсэн тооцоо гарсан. Гэмтсэн тоног төхөөрөмжүүд нь дандаа импортоор худалдаж авдаг тоног төхөөрөмжүүд учраас бид гадаадаас худалдан авч энэ чиглэлээр мэргэшсэн олон улсын компаниудтай хамтарч барилга угсралтын ажлыг хийнэ.

Энэ жил хийж, хэрэгжүүлэхээр төлөвлөсөн эрчим хүчний томоохон төслүүд амжилттай урагшилж байна. Өнөөдрийн байдлаар Улаанбаатар хотын цахилгаан хангамжийг нэмэгдүүлэх, сайжруулах ажил ямар нэгэн асуудалгүй, ажил хэвийн үргэлжилж байна. Энэ хэвээр байвал өвлийн ачааллыг бид ямар нэгэн доголдолгүй давах боломжтой" гэлээ.