Замын бүтээн байгуулалтын хоёр байршилд “Эрэл” ХХК-ийн эзэмшлийн газар өртжээ.

Тодруулбал, Олимпын гүүрийг Нарны зам хүртэл холбосон замын бүтээн байгуулалттай холбоотойгоор гүүрний хойд талд байрлах “Эрэл”-ийн байр болон орон сууцнуудын гарцын асуудал хөндөгдсөн.

Нийслэлийн зүгээс орон сууцны орц, гарцыг нээхээр зам тавих талбайд өртсөн “Эрэл” ХХК-д мэдэгдэл хүргүүлсэн ч хариу ирүүлдэггүй, хүлээж авах хүн байдаггүй байна.

Иймд Нийслэлийн Газар зохион байгуулалтын албанаас хэвлэл мэдээллийн хэрэгслээр дамжуулан мэдэгдэл хүргүүлжээ.

"Нийслэлийн Газар зохион байгуулалтын албанаас тус компанид газрыг чөлөөлөх мэдэгдлийг тавдугаар сард өгсөн"

Нийслэлийн Газар зохион байгуулалтын албаны Газар чөлөөлөлтийн хэлтсийн дарга Н.Мөнхбаяр “Нийслэлийн Засаг даргын Зөвлөлийн дөрөвдүгээр сарын 13-ны хурлаас Сүхбаатар дүүргийн нэгдүгээр хороонд байрлах орон сууцны хорооллын орц, гарцыг шийдвэрлэх тэмдэглэл гарсан. Энэ дагуу Нийслэлийн Газар зохион байгуулалтын албанаас “Эрэл” ХХК-д газрыг чөлөөлөх хугацаатай мэдэгдлийг тавдугаар сарын 4-нд өгсөн. Гэвч өнөөдрийг болтол тус компани хариу өгөөгүй, компанийн удирдлагууд олддоггүй, бүтээн байгуулалтад хүндрэл учруулсан асуудал тулгарч байна” гэлээ.

Энэ талаар Сүхбаатар дүүргийн нэгдүгээр хорооны оршин суугч “Олимпын гүүрний барилгын ажилтай холбоотойгоор 3,000 гаруй оршин суугчдын эрх ашиг хөндөгдсөөр зургаа дахь жилтэйгээ золгож байна. 2016 онд Олимпын гүүрний барилгын ажил эхэлснээр гүүрний урд болон хойд талын оршин суугчдын эрх ашиг зөрчигдсөн. Баруун урд болон урагшаа гардаг хоёр гарцыг хааж, гүүр барьсан. Нийслэлийн удирдлагуудад удаа дараа гарц хааж байгаа талаар гомдол гаргасаар ирсэн. Нийслэлийн зүгээс иргэдийн эрх ашгийг хамгаалж, маргааныг шийдэхээр шуурхай арга хэмжээ авч буйд оршин суугчийн хувьд баяртай байна” гэсэн юм.

Мөн Хан-Уул дүүргийн гуравдугаар хорооны нутаг дэвсгэр, Чингисийн өргөн чөлөөнөөс баруун Үйлдвэрийн гудамж хүртэл 1.23 км авто зам, 33 метр гүүрний барилгын талбайд “Эрэл” ХХК-ийн газар орсон. Тус замыг дөрвөн эгнээ, нэг талдаа 1.5 метр өргөн явган хүний зам, нөгөө талдаа 1.5 метр өргөн дугуйн зам, гэрэлтүүлэгтэй байхаар төлөвлөж барилгын ажил эхэлсэн байна.

Бүтээн байгуулалтын газарт 15 аж ахуйн нэгжийн газар өртжээ. Өнөөдрийн байдлаар 10 байгууллагатай тохирч, газар чөлөөлөлт хийсэн. “Эрэл” ХХК-ийн тухайд хоёр удаа мэдэгдэх хуудас хүргүүлсэн боловч хариу ирүүлээгүй. Үүнтэй холбоотойгоор хэвлэл мэдээллийн хэрэгслээр дамжуулан мэдэгдэл хүргүүлж буй юм. Хариу өгөхгүй бол үе шаттай арга хэмжээ авах хуулийн зохицуулалттайг албаныхан хэлэв. 

"Эрэл"-ийн удирдлагууд ил захидал мэтээр гарч ирдэг шигээ бай л даа

"Нэгэн цагт Монгол Улсыг “Эрэл улс” болгох шахаж байсан Б.Эрдэнэбат гэдэг хүн бий. Одоо бол “Эрэл” ХХК-ийн ерөнхийлөгч Б.Эрдэнэбат л даа. Тэр үед “Эрэл”-гүй улс төр, бизнес, хууль шүүхийн байгууллага, тэр ч бүү хэл хамтлаг хүртэл байгаагүй юм шүү" хэмээн нэгэн сэтгүүлч бичсэн байдаг.  Тэгвэл Б.Эрдэнэбат Монголын хамгийн олон лиценз эзэмшигчдийн тоонд одоог хүртэл байдаг.  Уул уурхай, барилгын бүтээн байгуулалт, барилгын материалын үйлдвэрлэл гээд түүнд ороогүй салбар байхгүй. Бас "гайхалтай" заргач нэгэн. Асуудал бүрт шүүх, хууль хяналтын байгууллагаар далайлгадаг зуршилтай. Нэг маргаан нь бүр Үндсэн хуулийн цэцээр хүртэл орж байсан удаатай гэлцдэг.  Ийм нэгэн эрхтэн, дархтан өдгөө олдохоо ч байж, компани нь төрийн байгууллагуудын бодлого, шийдвэрийг уландаа гишгэж, ард иргэдийн бухимдуулаад байгааг  дээрх зам, талбай, газрын асуудлаас харж болно. Уг нь хөлжиж, хөрөнгөжсөн, "дархлагдсан" энэ мэт газрууд улс орны хөгжил дэвшил, бүтээн байгуулалт, ард олны ая тухтай орчны төлөө хамгийн эхэнд явж байх нь зүйд нийцэх ч, хамраа ч цухуйлгахгүй байгаа нь сонин байна.