Аврал ирсэн аюултай мөчид хэн таны толгойд хамгийн түрүүнд орж ирдэг вэ?

Аав, ээж, ах, дүү гэхээсээ түрүүлээд “цагдаа руу залга” гэж яаравчлан 102 руу дуудлага хийнэ. “Аллаа та минь ээ гэж” хашгирахдаа, аврал ирэн айдастай нүүр тулах үед яах аргагүй цагдаа руу залгах тухай бодогдож, аварч чадах ганцхан аврал тэр юм шиг санагдана. Магад дуудахгүй байсан ч "цагдаа дуудлаа шүү" гэж хэлснээр аюулыг холуур гэтэлгэнэ. Тэгэхээр таны, миний, бидний цагдаа бүгдийг хамгаалдаг байх нь.

Харамсалтай нь сүүлийн жилүүдэд цахим орчинд донтогсод буюу өөрөөр хэлбэл СЭМҮТ-ийн хяналтад байж, эмчилгээг тогтмол хийлгэж баймаар олон зуун иргэн шууд дамжуулалт, бичлэгээр олон нийтийн дунд эмх замбараагүй байдал түгээдэг болоод удлаа. Учир мэдэх нэгэн нь тэднийг алгасдаг ч манай нийгэмд учраа мэдэхгүй даган хөөрцөглөгч олон байгаа нь эмгэнэл юм.

Ойрын нэг жишээг энд дурдая. Энэ сарын 10-ны өдөр Odongoo Jargalsaikhan гэх фэйсбүүк хэрэглэгч иргэн өөрийн цахим хаягаараа “ХУД-ын цагдаа миний охиныг хулгайлахыг удаа дараа завдсан хэрэгийг шалгаж өгөхгүй намайг дээрэлхэж байна. Хохирогч нь ахиад хохирч дарамтлуулдаг нийгэм...” гэсэн гарчигтай шууд дамжуулалтыг хийсэн байв. Үүнийг 1500 хүн хуваалцаж, 1300 сэтгэгдэл бичигдэж, 2000 хүн сэтгэл хөдлөллөө илэрхийлсэн байна. Бичсэн сэтгэгдэлээс эхэнд харагдаж байгаа 10-ыг нь уншвал долоо нь цагдааг хараан, зүхэн доромжилжээ.

Бодит нөхцөл байдлыг судлаад үзвэл тус иргэн нь Зөрчлийн тухай хууль зөрчсөн гэх хэргээр цагдаагийн байгууллагад шалгагдаж байгаа. Харин түүний охиныг хулгайлах тухай гомдол мэдээллийг цагдаагийн байгууллагаас тодруулахад 2025.10.10-ны 10 цаг 05 минутад иргэн “О”-с “Манай охиныг үл таних Приус-41 маркийн тээврийн хэрэгсэлтэй залуус айлган сүрдүүлсэнд гомдолтой байна” гэх утгатай гомдол, мэдээлэл бүртгэгдсэн. Бүртгэгдсэн гомдол, мэдээллийг Хан-Уул дүүргийн цагдаагийн газрын хоёрдугаар хэлтэс шалгаж байна” гэв.

Тэгэхээр түүний "удаа дараа охиныг нь хулгайлахаар завдсан, олон удаагийн гэмт хэргийн шинж чанартай үйлдлийг нь цагдаагийн байгууллага шалгахгүй удааж байна" хэмээн уйлан, хайлан шццд дамжуулалт хийж, цагдааг "ад" үзэгдэх хэмжээний ойлголт өгсөн нь жүжиг болж таарав. Өөрөөр хэлбэл 2025.10.10-ны өглөө 09:42 минутад эхлээд шууд дамжуулалт хийж цагдаагийн алба хаагчдын нэр хүндэд халдаж, өөрийн яриандаа бусдыг итгүүлж, өрөвдөлтэй мэт ойлголт төрүүлсэнийхээ дараа буюу 10:05 минутад гомдлоо цагдаагийн байгууллагад гаргажээ. Ингэхдээ охиныг нь хулгайлах гэсэн бус айлган сүрдүүлсэн хэмээн гомдол гаргасан байгаа юм.

Уг нь тав алхахгүй баригдаж болох худал хөөсрөл, утасны цаанаас бусдыг турхиран дуудаж, өөрсдийн эгогоо тэжээгчдийн үнэнийг мэдэх ийм амархан. Жаахан хэрсүү байгаад, мэдээллээ нягталдаг болчихвол галзуучуудын шуурганд хүч нэмэхгүй байх боломжтой. Овоо босгоогүй бол шаазгай хаана суух вэ гэдэг ардын үгийг энд дурдах нь зүйтэй. Галзуучуудаараа зугаагаа гаргахаа больчихвол тэдний галзууг нийгэм тэр даяараа биш зөвхөн гэрийнхэн нь мэддэг байх боломжтой юм.

Эцэст нь хэлэхэд цахим орчинд энэ мэт буруу үлгэр жишээ үзүүлэгчдийг өөхшүүлсээр байвал таны, миний хүүхдүүдийн амьдрах ирээдүй улам аюултай болж, заналхийлэл хаалганы чинь гадаа бус гэр дотор чинь хамт амьдрах болно.