Өнгөрсөн долоо хоногийн Баасан гаригт /2025.10.10/ УИХ-ын Төрийн байгуулалтын байнгын хороо хуралдаанаар Ерөнхий сайд Г.Занданшатарыг огцруулах асуудлыг хэлэлцэж эхэлсэн. Тодруулбал, УИХ-ын гишүүн П.Сайнзоригийн албан бланк дээр Ерөнхий сайдыг огцруулах бичигт 50 гаруй гишүүн гарын үсэг зурж, УИХ-д өргөн барьсан байдаг. Тус  хуралдаанаар Ерөнхий сайдыг огцруулах асуудлыг хэлэлцэж эхэлсэн ч "УИХ-ын чуулганы хуралдааны дэгийн тухай хуулийн 13 дугаар зүйлийн хуралдаан даргалагчийн эрх үүргийг заасан байна. Энэ дагуу 18:00 цаг болж ажлын цаг дууссан тул ТББХ-ны хуралдааныг ирэх Даваа гаригийн 11.00 цаг хүртэл хойшлуулж шийдвэрлэлээ" гэж  ТББХ-ны дарга Ц.Сандаг-Очир алх цохисон. Тэгвэл энэ долоо хоногийн Даваа гаригт /2025.10.13/-нд ТББХ-ны хуралдаан эхэлсэн хэдий ч ирцээ бүртгүүлсэн гишүүд танхимд орж ирээгүй тул байнгын хорооны дарга Ц.Сандаг-Очир хуралдааныг хааж, тодорхойгүй хугацаагаар хойшлуулсан байдаг.

Тэгвэл өнөөдөр /2025.10.16/ 09:00 цагаас хоёр ч удаа хойшилсон Төрийн байгуулалтын байнгын хорооны хуралдаан товлогдоод байна. Өөрөөр хэлбэл, 10:00 цагаас эхлэх УИХ-ын чуулганы хуралдаанаар Ерөнхий сайдын асуудлыг хэлэлцэн эцэслэх тул наана нь ТББХ-г хуралдуулан санал, дүгнэлтээ гаргахаар болж байгаа юм.

 Монгол Улсын Үндсэн Хуулийн 43-р зүйл

1.Улсын Их Хурлын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавибал Улсын Их Хурал гурав хоногийн дараа хэлэлцэж эхлэн арав хоногийн дотор шийдвэрлэнэ. Улсын Их Хурлын нийт гишүүний олонхи уг саналыг дэмжсэн бол Ерөнхий сайдыг огцруулах тухай Улсын Их Хурлын тогтоол баталсанд тооцож, шинэ Ерөнхий сайдыг гуч хоногийн дотор томилно.

2.Ерөнхий сайд огцорвол Засгийн газар бүрэлдэхүүнээрээ огцорно.

Үндсэн хуулийн 33.1-т Монгол Улсын Их Хурлын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавьбал Улсын Их Хурал гурав хоногийн дараа хэлэлцэж, 10 хоногийн дотор шийдвэрлэнэ гэж заасан байдаг. Тиймээс хуулийн дагуу процесс үргэлжилж байгаа юм.

УИХ-ын чуулганы хуралдааны дэгийн тухай хуулийн 101 дүгээр зүйл.

101.2. Төрийн байгуулалтын байнгын хороо Ерөнхий сайдыг огцруулах саналыг хуралдаанаараа хэлэлцэж санал, дүгнэлт гарган нэгдсэн хуралдаанд танилцуулна.

101.3. Нэгдсэн хуралдаан Байнгын хорооны санал, дүгнэлтийг сонсож, ил санал хураалт явуулна.

101.4. Улсын Их Хурлын нийт гишүүний олонх Ерөнхий сайдыг огцруулах саналыг дэмжсэн бол Ерөнхий сайдыг огцруулах тухай тогтоол баталсанд тооцно. Ерөнхий сайдыг огцруулах саналыг дэмжээгүй бол уг асуудлаар шийдвэр гарахгүй.

101.5. Байнгын хорооны болон нэгдсэн хуралдаанд гишүүд асуулт асууж, үг хэлж болно.

101.6. Нам, эвслийн бүлэг санал, дүгнэлт гаргасан бол 5 минутад багтаан нэгдсэн хуралдаанд танилцуулж болно.

101.7. Монгол Улсын Ерөнхийлөгч, Ерөнхий сайд нэгдсэн хуралдаанд үг хэлж болно.

101.8. Ерөнхий сайд Монгол Улсын Үндсэн хууль зөрчсөн, эсхүл Ерөнхий сайдыг огцруулах үндэслэлтэй гэж Цэц дүгнэлт гаргасан бол энэ хуулийн 85, 86 дугаар зүйлд заасны дагуу хэлэлцэн шийдвэрлэнэ.

ТББХ хамгийн олон буюу нийт 32 гишүүнтэй. Ердийн олонхоор ирц үүсэх буюу 17 гишүүн ирсэн тохиолдолд ирц хүрсэнд тооцно. Намын бүлгийн гишүүдэд суудал хуваарилагддаг учир хуралдаанд бүх намын төлөөллүүд тус байнгын хороонд багтдаг. Тухайлбал, УИХ-д цөөнх болсон намуудаас Үндэсний эвсэлийн тэргүүн Н.Номтойбаяр, ХҮН намын дарга Т.Доржханд, гишүүн Г.Уянгахишиг, ИЗНН-ын дарга Б.Батбаатар нар багтдаг бол МАН-аас 17 гишүүн, АН-аас 11 гишүүн Төрийн байгуулалтын байнгын хороонд багтаж байна.

Төрийн байгуулалтын байнгын хорооны дарга

• Ц.Сандаг-Очир

Гишүүд

• О.Алтангэрэл
• Д.Амарбаясгалан
• А.Ариунзаяа
• М.Бадамсүрэн
• Б.Батбаатар
• Ж.Бат-Эрдэнэ
• Б.Баярбаатар
• Ж.Баярмаа
• Э.Болормаа
• С.Бямбацогт
• А.Ганбаатар
• Л.Гантөмөр
• Ц.Даваасүрэн
• Т.Доржханд
• С.Зулпхар
• Ц.Идэрбат
• Ч.Лодойсамбуу
• Л.Мөнхбаатар
• Ч.Номин
• Н.Номтойбаяр
• Э.Одбаяр
• Л.Оюун-Эрдэнэ
• Б.Пүрэвдорж
• О.Саранчулуун
• Ц.Туваан
• Г.Уянгахишиг
• Б.Хэрлэн
• О.Цогтгэрэл
• Ө.Шижир
• Л.Энх-Амгалан
• Д.Энхтуяа нар багтдаг аж.