МАН-ын Хэвлэл мэдээлэл хариуцсан НБД Ц.Чулуунзагдыг АТГ хойшлуулшгүй ажиллагаа явуулж, саатуулсан. Уг асуудлаар болон улс төрийн өндөр албан тушаалтнуудын зарим хэргийн талаар АТГ-аас тодруулахад, "Хэргийг өнгөрсөн нэгдүгээр сард нээж шалгаж эхэлсэн бөгөөд “Админерал” ХХК-ийн гүйцэтгэх захирлаар ажиллаж байхдаа нас барсан, БНХАУ-ын иргэн Х.Хасбаатарын ар гэрээс гомдол гаргасны дагуу АТГ-аас нэгжлэг зохион байгуулсан. Нэгжлэг хийх үед БНХАУ-ын иргэн Х.Хасбаатарын гарын үсэгтэй дардас олдсон бөгөөд уг дардасыг хууль бусаар ашиглаж байсан байж болзошгүй" хэмээн үзэж байгаа гэх мэдээлллийг өгсөн.

Харин УИХ-ын гишүүн Б.Энхбаяр, "Ц.Чулуунзагд, Д.Амарбаясгалан нар арван жилийн нэг анги Монгол ардын намынхан бүгд ямар хамааралтай хүмүүс вэ гэдгийг мэдэж байгаа.

Ц.Чулуунзагдын төрсөн эгч Ц.Цэвэлмаа “Админерал” ХХК-ын санхүүгийн дарга буюу хоёрдугаар гарын үсэг зурдаг хүн, төрсөн ах Ц.Ламжав нь дэд захирал, гүйцэтгэх захирал нь талийгаач Хасбаатар, Ц.Цэвэлмаагийн хүү Э.Амаржаргал гэж хүн байдаг. Нэг талаас “Дижитал Пи Ар” ХХК байгуулж 50 хувын хөрөнгө оруулсан. Нөгөө талаас Д.Амарбаясгалан түүний ах Д.Амгаланбаатар түүний хүү А.Эрхэмбаяр гэж хүн 50 хувьд нь хөрөнгө оруулсан.

“Сүрфэйс майнинг монголиа” ХХК, “Дижитал Пи Ар” ХХК-ын толгой компани. Үүний 20 хувын хувьцааг талийгаач Хасбаатар эзэмшдэг байсан. Өөрөөр хэлбэл Хасбаатар Э.Амаржаргалаар дамжуулж  Ц.Чулуунзагд А.Эрхэмбаяраар дамжуулж Д.Амарбаясгалан нар дундын бизнестэй нэгдмэл ашиг сонирхолтой болох нь баримтаар нотлогддог" хэмээн хэлсэн.

Тэгвэл Ц.Чулуунзагдын өмгөөлөгч Б.Оюунбилэг Б.Энхбаярт мэдэгдэл, хүсэлт хүргүүлжээ.