Төрийн байгуулалтын байнгын хороны өнөөдрийн хуралдаанаар  өнөөдөр 11.00 цагаас хуралдаж, Ерөнхий сайд Г.Занданшатарыг огцруулах эсэх болон бсуад асуудлаар хэлэлцэх байсан юм. Тухайлбал, УИХ-ын гишүүн П.Сайнзоригийн албан бланк дээр Ерөнхий сайдыг огцруулах бичигт 50 гаруй гишүүн гарын үсэг зурж, УИХ-д өргөн барьсан. Өнгөрсөн Баасан гаригт /2025.10.10/ ТББХ-ны хуралдаанаар Ерөнхий сайдыг огцруулах асуудлыг хэлэлцэж эхэлсэн ч УИХ-ын чуулганы хуралдааны дэгийн тухай хуулийн 13 дугаар зүйлийн хуралдаан даргалагчийн эрх үүргийг заасан байна. Энэ дагуу 18:00 цаг болж ажлын цаг дууссан тул ТББХ-ны хуралдааныг өнөөдрийг хүртэл хойшлуулж шийдвэрлэсэн билээ.

Ташрамд тэмдэглэхэд Үндсэн хуулийн 33.1-т Монгол Улсын Их Хурлын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавьбал Улсын Их Хурал гурав хоногийн дараа хэлэлцэж, 10 хоногийн дотор шийдвэрлэнэ гэж заасан байдаг. 

УИХ-ын чуулганы хуралдааны дэгийн тухай хуулийн 101 дүгээр зүйл.

101.2. Төрийн байгуулалтын байнгын хороо Ерөнхий сайдыг огцруулах саналыг хуралдаанаараа хэлэлцэж санал, дүгнэлт гарган нэгдсэн хуралдаанд танилцуулна.

101.3. Нэгдсэн хуралдаан Байнгын хорооны санал, дүгнэлтийг сонсож, ил санал хураалт явуулна.

101.4. Улсын Их Хурлын нийт гишүүний олонх Ерөнхий сайдыг огцруулах саналыг дэмжсэн бол Ерөнхий сайдыг огцруулах тухай тогтоол баталсанд тооцно. Ерөнхий сайдыг огцруулах саналыг дэмжээгүй бол уг асуудлаар шийдвэр гарахгүй.

101.5. Байнгын хорооны болон нэгдсэн хуралдаанд гишүүд асуулт асууж, үг хэлж болно.

101.6. Нам, эвслийн бүлэг санал, дүгнэлт гаргасан бол 5 минутад багтаан нэгдсэн хуралдаанд танилцуулж болно.

101.7. Монгол Улсын Ерөнхийлөгч, Ерөнхий сайд нэгдсэн хуралдаанд үг хэлж болно.

101.8. Ерөнхий сайд Монгол Улсын Үндсэн хууль зөрчсөн, эсхүл Ерөнхий сайдыг огцруулах үндэслэлтэй гэж Цэц дүгнэлт гаргасан бол энэ хуулийн 85, 86 дугаар зүйлд заасны дагуу хэлэлцэн шийдвэрлэнэ.

Гэьч ирц хүрээгүйн улмаас ТББХ-ны хуралдаан хойшилоо. ТББХ хамгийн олон буюу нийт 32 гишүүнтэй. Ердийн олонхоор ирц үүсэх буюу 17 гишүүн ирсэн тохиолдолд ирц хүрсэнд тооцно. Намын бүлгийн гишүүдэд суудал хуваарилагддаг учир хуралдаанд бүх намын төлөөллүүд тус байнгын хороонд багтдаг. Тухайлбал, УИХ-д цөөнх болсон намуудаас Үндэсний эвсэлийн тэргүүн Н.Номтойбаяр, ХҮН намын дарга Т.Доржханд, гишүүн Г.Уянгахишиг, ИЗНН-ын дарга Б.Батбаатар нар багтдаг бол МАН-аас 17 гишүүн, АН-аас 11 гишүүн Төрийн байгуулалтын байнгын хороонд багтдаг. Харин өнөөдрийн тухайд АН-ын гишүүн Н.Алтанхуяг, Н.Номтойбаяр нар гадаад томилолтой байгаа аж. Ямартай ч 11 цагаас товлогдож 11,30 минут хүртэл хүлээхэд байнгын хорооны 5 гишүүнээс өөр гишүүн ирсэнгүй. АН-ын бүлэг хуралдаж байна гээд нэг ч гишүүн ирээгүй учраас хуралдаан хойшилсон нь энэ.

Төрийн байгуулалтын байнгын хорооны дарга

• Ц.Сандаг-Очир

Гишүүд

• О.Алтангэрэл
• Д.Амарбаясгалан
• А.Ариунзаяа
• М.Бадамсүрэн
• Б.Батбаатар
• Ж.Бат-Эрдэнэ
• Б.Баярбаатар
• Ж.Баярмаа
• Э.Болормаа
• С.Бямбацогт
• А.Ганбаатар
• Л.Гантөмөр
• Ц.Даваасүрэн
• Т.Доржханд
• С.Зулпхар
• Ц.Идэрбат
• Ч.Лодойсамбуу
• Л.Мөнхбаатар
• Ч.Номин
• Н.Номтойбаяр
• Э.Одбаяр
• Л.Оюун-Эрдэнэ
• Б.Пүрэвдорж
• О.Саранчулуун
• Ц.Туваан
• Г.Уянгахишиг
• Б.Хэрлэн
• О.Цогтгэрэл
• Ө.Шижир
• Л.Энх-Амгалан
• Д.Энхтуяа нар багтдаг аж.