Шүүхийн шийдвэр гүйцэтгэх ерөнхий газрын дарга, бригадын генерал Б.Нандинболор, Захиргааны удирдлагын газрын дарга, хурандаа Г.Цэргийнхүү, Санхүү, үйлдвэр, хөрөнгө оруулалтын газрын дарга, хурандаа Т.Өнөртуяа, Нийслэлийн шүүхийн шийдвэр гүйцэтгэх газрын дарга, хурандаа Б.Түвшинтөгс нар 409, 421 дүгээр нээлттэй, хаалттай хорих анги, Баривчлах төв, “Амгалан” мэргэжлийн боловсролын сургууль, “Газар Ивээл” төрийн өмчит аж ахуйн тооцоот үйлдвэрийн газарт ажиллаж, алба хаагчидтай уулзалт хийлээ. Уулзалтын үеэр Шүүхийн шийдвэр гүйцэтгэх ерөнхий газрын дарга, бригадын генерал Б.Нандинболор байгууллагаас баримталж буй бодлого, чиглэл, алба хаагчдын нийгмийн баталгааг хангах, цалин хангамжийг нэмэгдүүлэх хүрээнд авч хэрэгжүүлсэн ажил, арга хэмжээний талаар танилцуулжээ. 

Тухайлбал, Шүүхийн шийдвэр гүйцэтгэх байгууллагын бодлого чиглэлийг Засгийн Газраас дэмжин, цалингийн 4 төрлийн нэмэгдлийг 25 ба түүнээс дээш хувиар нэмэгдүүлж, 2025 оны 01 дүгээр сарын 01-ний өдрөөс хэрэгжүүлж эхлээд байгаа талаар болон “Шүүхийн шийдвэр гүйцэтгэх байгууллагын алба хаагчдад мэргэшлийн зэрэг, зэргийн нэмэгдэл олгох тухай” Засгийн Газрын 266 дугаар тогтоолыг батлуулж, алба хаагчдын нийгэм, эдийн засгийн баталгаа бусад төрийн цэргийн болон хууль сахиулах байгууллагуудын нэгэн адил хангагдсан, мөн өөрийгөө хөгжүүлэх идэвх, санаачилга нэмэгдэх, бие бялдрын бэлтгэлжилт, мэдлэг боловсрол дээшлэх боломж бүрдсэнийг онцлон дурдав.

Энэ үеэр алба хаагчдын санал хүсэлтийг хүлээн авч, зарим асуудлыг газар дээр нь шийдвэрлэхийн зэрэгцээ албан үүргээ гүйцэтгэхэд нь дэмжлэг үзүүлэх зорилгоор иж бүрэн болон зөөврийн компьютер, өнгөт принтер гардууллаа.  Уулзалтын төгсгөлд алба хаагчдад хандан өргөсөн тангарагтаа үнэнч байж, сахилга, хариуцлага, сонор сэрэмжийг нэмэгдүүлж, ёс зүй, албаны нэр хүндийг эрхэмлэн дээдэлж ажиллахыг үүрэг болгов.