Нийслэлийн Шүд, Эрүү нүүрний төвийн Нүүр, амны эрүүл ахуйч, их эмч Б.Эрдэнэсайханы зөвлөгөөг хүргэж байна.

Шүд цоорох өвчин нь бактераас үүдэлтэй халдварт өвчин юм. Уг өвчнийг үүсгэж байгаа дөрвөн шалтгаан байдаг. Үүнд:

1. Шүд байх аваас шүд цоорно. 
2. Хоол хүнс буюу шүдний өнгөр. Шүдний гадаргуу дээр үлдсэн хоолны үлдэгдэл нь бактер үүсгэх нөхцөлийг бүрдүүлж байдаг.
3. Шүдний цоорлыг үүсгэж байдаг бактери. Олон тооны бактери нь шүдний гадаргуу дээр үржсэнээрээ амны хөндийг хүчиллэг болгож, шүдний пааланг сийрэгжүүлж цооруулж байдаг. 
4. Цаг хугацаа. Шүдний гадаргуу дээрх хоолны үлдэгдэл бөгөөд өнгөр нь удаан хугацаанд байвал бактери өсөж үржиж, паалан хайлснаар шүдний цоорол үүсэж байгаа юм.

Эдгээр хүчин зүйлүүдийн аль нэг нь байхгүй тохиолдолд шүд цоорохгүй. Иймээс хоол идсэний дараа бактер үржихээс сэргийлж зөв дэс дараалалтай, угааж байвал шүд амархан цоорохгүй. 

Хоол идсэний дараагаар ходоодны хүчил 20 минут орчим ялгарч, хүчиллэг орчин бүрдэж байдаг учраас хоол идсэний дараа шууд шүдээ угаах нь буруу юм. Энэ хүчлийг намжсаны дараа буюу хоол идсэнээс хойш 20-30 минутын дараа шүдээ угаах хэрэгтэй. 

Шүд угаалт нь олон удаа угаахдаа биш сайн угаахдаа байдаг. Зарим үйлчлүүлэгчид “Би өдөрт 4-5 удаа шүдээ угаадаг. Тэгтэл шүд цоороод байна” гэж ярьдаг. Тэгэхээр шүдээ хэдэн удаа угааж байгаадаа биш, гол нь зөв дэс дараалалтай, өдөрт чанартай хоёр удаа угаахад шүд цооролтоос сэргийлж чадна. 

Хатуу хоол хүнс буюу илүү зажлууртай хоол хүнснийбүтээгдэхүүн хэрэглэснээрээ амны хөндий өөрөө өөрийгөө цэвэршүүлэх процесс явагддаг. Хоолыг маш удаан зажилж идэх, зажлууртай буюу хатуу хоол хүнсний бүтээгдэхүүнийг хэрэглэх нь шүлс ялгаралтыг нэмэгдүүлж, амны хөндий өөрөө өөрийгөө цэвэршүүлэх процессыг дэмжиж байгаа юм. Булчингаа дагаж яс хөгждөг учраас хоол хүнсийг сайн зажилж идсэнээр зажлуурын булчингуудын үйл ажиллагаа сайжирч, шүдний гажиг үүсэхээс сэргийлж байдаг. Мөн бага насны хүүхдэд зажлууртай хоол хүнсийг хэрэглүүлж байхыг зөвлөе.

Хоол идсэний дараа бохь зажилснаар шүлс ялгаралтыг идэвхжүүлж, амны хөндийн хүчиллэг орчныг сармагжуулан өөрөө өөрийгөө цэвэршүүлэх процессыг дэмждэг. Хамгийн гол нь зөв зажилж хэвшин, гурван минут зажлаад хаях хэрэгтэй. Олон цаг зажилснаар эрүүний үенд өөрчлөлт оруулж, эрүү мултрах болон өвдөлттэй болох эрсдэлд хүргэдэг.

Шүд цооролт дөрвөн үе шаттай явагддаг.Үүнд:

1. Толбын үе 
2. Өнгөц
3. Дунд
4. Гүн

Нэгэнт цоорсон шүд цоо эрүүл үеийнх шигээ нөхөн төлжих боломжгүй учраас шүдийг заавал ломбодуулах шаардлагатай болдог.