УИХ-ын чуулганы Пүрэв гаригийн хуралдаан эхэллээ.  Хуралдаанаар  “Хүнсний хангамж, аюулгүй байдлыг хангах талаар авах зарим арга хэмжээний тухай” Улсын Их Хурлын тогтоолын төслийн анхны хэлэлцүүлгийг хэлэлцэж эхэллээ.

Чуулганы эхэнд УИХ-ын дарга Г.Занданшатар “Сангийн яамны ТНБД Ж.Ганбат голд суухгүй нуугдлаа” гэж ундууцав.

Хуулийн төсөлтэй холбоотойгоор гишүүд асуулт асууж, хариулт авч байна.

УИХ-ын гишүүн Ж.Бат-Эрдэнэ “Монгол Улсын эдийн засгийг өргөх жижиг дунд үйлдвэрлэл, хүнсний аюулгүй байдал дээр хувьсгал хийе гэж орж ирж байгаа хуулийн төсөл. Хөдөөгийн ард түмэн өндөр хэмжээнд хүлээн авч байгаа. МУ-ын Ерөнхийлөгч малын эрүүл мэндийг 5 жилийн дотор сайжруулж, шүлхий өвчнөөс салая гэж байгаа. Энэ хүрээнд ямар ажил хийгдэж байгаа вэ. Вакцинжуулалтаа хийгээд 3-5 жилийн дотор малаа эрүүлжүүлье гэж байгаа шүү дээ. Мах боловсруулах үйлдвэрүүдийг аймаг, сумдуудад хэр хүртээмжтэй байгуулах вэ. Ажлын байр бий болгох, жижиг дунд үйлдвэрлэлээ дэмжихтэй холбоотой зүйлс хуулийн төсөлд яаж суусан бэ” хэмээн асуув.

ХХААХҮ-ийн сайд З.Мэндсайхан “Малын эрүүл мэндтэй холбоотой асуудлыг Байгаль орчин, хүнс, хөдөө аж ахуйн байнгын хорооны тогтоол гарсан. 5 жилийн дотор 145 тэрбумын вакцинжуулалтыг,  жилд 2 удаа хийхээр тогтсон. 5 жилийн дотор жил бүр үе шаттайгаар вакцинжуулалт хийгдэнэ. Нийт төсөв нь 145 тэрбум байгаа.  Мөн хөтөлбөрийн хүрээнд хоршоолол дээр 8 тэрбум төгрөг суусан. Төвлөрсөн эх үүсвэрийг хоршоо болон цаашдаа жижиг дунд үйлдвэрлэлийг дэмжих чиглэлээр явна” гэдэг хариултыг өглөө.

УИХ-ын гишүүн, Байгаль орчин, хүнс, хөдөө аж ахуйн байнгын хорооны  дарга Х. Болорчулуун “Манай улсын хүнсний хангамж, аюулгүй байдал нэлээн хүнд , гадны хараат байдалд байгаа. Тиймээс үндэсний үйлдвэрлэлээ дэмжиж хүнсний хангамж, аюулгүй байдлаа хангаж ажиллая гэдэг чиглэлийг Монгол Улсын Ерөнхийлөгч өгсөн. Энэ хүрээнд байнгын хороо,  салбар яам ажилласан. Хамгийн түрүүнд  19 нэр төрлийн хүнсээр өөрсдийгөө бүрэн хангах бодлого дэвшүүлсэн. Эдгээр бүтээгдэхүүн дээр импортын татварыг 30 гаруй хувиар өсгөхөөр төлөвлөж байгаа.  МАнай улс 1.5 сая га газарт тариалан эрхлэх боломжтой. Өнөөдрийн хувьд 800 мянган га ашиглаж байгаа. Тэгэхээр 200 мянган га газраар тариалангийн талбайг нэмэгдүүлж ажлын байраа өсгөнө гэж үзэж байна. 8 тэрбум хоршоог хөгжүүлэх асуудалд зарцуулагдана. Үндэсний үйлдвэрүүдээ ерөнхийд нь дэмжихээс жижиг, томоор нь ялгаж дэмжинэ гэдэг юм тусгаагүй” хэмээв.

Чуулганы хуралдаан үргэлжилж байна.