УИХ-ын дарга Д.Амарбаясгалангийн чөлөөлөгдөх хүсэлтийг 89,5 хувиар дэмжиж албанаас нь чөлөөллөө. Тэрбээр   “2024 оны ээлжит сонгуулиар Говь-Алтай, Завхан, Увс, Ховд аймгийн иргэдийн итгэлийг хүлээн, Монгол Улсын Их Хурлын гишүүнээр сонгогдсон. Үүний үндсэн дээр Монгол Улсын Их Хурлын тухай хуулийн 10, 11 дүгээр зүйлд заасны дагуу, 64 ба түүнээс дээш суудал авсан Монгол Ардын Намаас нэр дэвшиж, 2024 оны 7 дугаар сарын 2-ны өдөр УИХ-ын даргаар сонгогдон ажиллаж байна. 

Гэвч сүүлийн үед улс төрийн хямралын шинжтэй нөхцөл байдал үүсээд байна. Энэ нь МАН-ын даргын сонгуульд надад ялагдсан зарим нөхдийн ялагдлаа хүлээн зөвшөөрөөгүй үйлдлээс эхтэй бөгөөд өнөөдөр парламентын ардчилал, төрийн засаглалд ноцтой эрсдэл учруулж байна. Улмаар ард түмний төрд итгэх итгэл суларч, нийгэм талцал, хуваагдалд хүрэн, үндэсний аюулгүй байдалд сөргөөр нөлөөлөх нөхцөл бүрдэж болзошгүй байна.

Мөн сонгуульд ялагдсан хэсэг хүмүүсийн эрх мэдлийн төлөөх туйлширсан тэмцэл нь гүйцэтгэх засаглалд хууль дээдлэх зарчим алдагдаж, төрийн эрх барих дээд байгууллага болон хууль хяналтын байгууллагуудын үйл ажиллагаанд Үндсэн хууль зөрчин нөлөөлөхөд хүргэж байна. Түүнчлэн миний нэр хүндийг үндэслэлгүйгээр гүтгэн доромжилсон зохион байгуулалттай мэдээлэл олон нийтийн бүх сувгаар цацагдаж буй нь туйлын харамсалтай.

Иймд миний бие парламентын ардчилал, эрх чөлөө, хууль ёсыг хамгаалах, шударга ёсыг тогтоох, мөн нэр төрөө бүрэн сэргээх зорилгоор Монгол Улсын Их Хурлын тухай хуулийн 12 дугаар зүйлийн 12.2.1 дэх заалтыг үндэслэн, УИХ-ын даргын албан тушаалаас өөрийн хүсэлтээр чөлөөлөгдөх хүсэлтээ гаргаж байна. Хүсэлтийг хэлэлцэн шийдвэрлэж өгөхийг хүсье” хэмээж байсан билээ.