2007 оны наймдугаар сард Спортын төв ордоны аркны ойролцоо 30 орчим насны эрэгтэй хүн гаднын нөлөөтэй нас барсан хэрэг гарсан байдаг.  Дээрх хэрэгт 2002 оны Эрүүгийн хуулийн тусгай ангийн 91 дүгээр зүйлийн 91.1 дэх хэсэгт зааснаар эрүүгийн хэрэг үүсгэн мөрдөн байцаалтын ажиллагаа явуулсан боловч гэмт хэрэг үйлдсэн хүн нь тогтоогдоогүй үндэслэлээр хэргийг түдгэлзүүлсэн байжээ.

Сүхбаатар дүүргийн прокурорын газраас 2018 оны 11 дүгээр сард эзэн холбогдогч нь тогтоогдоогүй хэргүүдийг татаж хянах явцдаа уг хэрэгт зарим гэрчээс мэдүүлэг аваагүй байсныг илрүүлж, дутуу ажиллагааг явуулах даалгаврыг мөрдөгчид өгч шалгуулсан байна. Мөрдөн шалгах ажиллагаа явуулсаны үр дүнд урьд нь гурван удаагийн ял шийтгэлтэй С.О гэгч нь дээрх “Хүнийг алах” гэмт хэргийг үйлдсэн болох нь тогтоогдож байв. Эл хэргийг 12 жилийн дараа илрүүлсэн. 

Тэгвэл яг үүнтэй ижил хэргийг, НЦУГ-ын Мөрдөн шалгах газрын Хүнд гэмт хэрэгтэй тэмцэх хэлтсийн алба хаагчид 3-19 жилийн өмнө үйлдэгдсэн хүнийг алах онц ноцтой гурван хэргийг илрүүлжээ. 

Тодруулбал, 2010 оны гуравдугаар сарын 5-ны өдөр Баянзүрх дүүргийн нутаг дэвсгэрт иргэн Б гадны нөлөөтэй нас барсан хэргийг 43 настай эрэгтэй Б үйлдсэн болохыг 12 жилийн дараа буюу энэ оны тавдугаар сарын 31-ний өдөр илрүүлсэн. 

Мөн Баянгол дүүргийн нутаг дэвсгэрт иргэн гадны нөлөөтэй нас барсан хэргийг иргэн Ю үйлдсэн болохыг гурван жилийн дараа илрүүлсэн. 

Түүнчлэн 2003 оны долдугаар сарын 22-нд шилжих шөнө СХД-ийн нутаг дэвсгэрт гэр бүлийн хамааралтай иргэн П, Б нар нь гадны нөлөөтэй нас барсан хэргийг иргэн П гэгч үйлдсэн болохыг 19 жилийн дараа илрүүлж, энэ оны зургаадугаар сарын 9-ний өдөр шүүхэд шилжүүлжээ.

Гэмт хэргийн төрлөөс хамааран хөөн хэлэлцэх хугацааг ямар хэмжээтэй тогтоох нь тухайн улсын төрийн бодлого, Эрүүгийн хуулийн үзэл баримтлал, эрх зүйн уламжлалаас шууд хамааралтай.

Жишээ нь, ОХУ-ын Эрүүгийн хуульд хөөн хэлэлцэх хугацааг гэмт хэрэг үйлдсэнээс хойш анхан шатны шүүхийн шийтгэх тогтоол хүчин төгөлдөр болох хүртэл тоолохоор, харин ХБНГУ-д гэмт хэрэг үйлдсэн этгээдийг яллагдагчаар татаж, мөрдөн шалгах ажиллагааг эхлүүлэх хүртэл тоолохоор хуульчилжээ.

Харин манай улсад Эрүүгийн хэргийн хөөн хэлэлцэх хугацаа нь гэмт хэргийн төрөл, онцлог, хуульд заасан ялын хэмжээнээс хамаараад Зөрчлийн хэргийн хөөн хэлэлцэх хугацаатай адил олон янз байдаг аж.  Тэгэхээр үүгээр, “Хөөн хэлэлцэх хугацаа” гэдэг ойлголтыг гэмт этгээдийг ял завшуулах хэрэгсэл болгож болохгүй гэдгийг онцолж байна. Тухайлбал, хүн амины хэрэг үйлдсэн этгээдийн хэргийг ялын дээд хэмжээгээр буюу 20 жил "хөөн хэлэлцэх хугацаа"-гаар тооцож явдаг аж. Товчхондоо, 20 жил хөөн хэлэлцэх хугацаа нь дуусахгүй гэсэн үг. Дээрх жишээнээс харахад, хөөн хэлэлцэх хугацаа дуусахаас яг 1 жилийн өмнө  хэрэг үйлдсэн этгээдийг баривчилжээ.