Богдхан уулын Дархан цаазат газар эрхтэн дархтануудын мэдэлд шилжсэн. Үүний нэг тод жишээ нь, "Энигма”, “Универсал политехник коллеж”, “Монголын үндэсний их сургууль” гэсэн нэрээр Зайсангийн аманд 38.2 га газар авсан "хэрэг". Тухайн үед Зайсангийн аманд дээрх байгууллагууд газар ашиглах зөвшөөрөл авсан ч хуулиар олгогдсон газрын төлбөр төлөх үүргээ биелүүлж байгаагүй аж. Түүгээр ч зогсохгүй газрыг таллаж хувааж, бусдын нэр дээр шилжүүлж, хогны мөнгөө ч төлөхгүй асуудлууд дэлгэгдээд байна. Улмаар  Богдхан уулын Дугуй цагаан дахь гэрүүдийг буулгах үеэр үүссэн зөрчилдөөний талаар НЗДТГ-аас мэдээлэл өгсөн юм.

Нийслэлийн Засаг даргын Захиргаа, хууль эрх зүйн асуудал хариуцсан ахлах зөвлөх Д.Мөнх-Эрдэнэ “Олон жил Зайсангийн аманд байгаль орчны тэнцвэрт байдал алдагдуулсан, ургамал, хөрсөнд хор хохирол учруулж, бохирдол үүсгэж байсан, олон удаагийн гэмт хэрэг зөрчил гарч байсан дээрх байгууламжийг Хотын даргын захирамжийн дагуу албадан буулгасан. Зайсангийн энэ аманд долоо хоногт дунджаар 5-6 мянган иргэн амарч зугаалахаар очдог. Гэтэл тэр замд байгаа байгууламж хүний эрүүл аюулгүй орчинд амьдрах нөхцөлд саад болж байсан. Адаглаад, хүүхэд, залуучууд тэнд явж байгаад гэмтэж бэртэх, амь насанд нь аюул учирч болзошгүй байдал үүсчихсэн байсныг та бүхэн харсан байх. Тиймээс  гэмт хэрэг зөрчлөөс урьдчилан сэргийлэх, байгаль орчны тэнцвэрт байдлыг хадгалан хамгаалах, мөн Тусгай хамгаалалттай газар нутгийн хууль тогтоомжийн хэрэгжилтийг зохион байгуулах, хяналт тавих үүргийнхээ хүрээнд энэ захирамжийг гаргаж, шуурхай арга хэмжээ авч ажиллаж эхэлсэн. 

Тусгай хамгаалалттай газар нутаг буюу газрын нэгдмэл санд хяналт тавихад Газрын тухай хуулиар зохицуулагдана. Байгалийн унаган төрхийг ашиглана гэдэг газар ашиглаж байгаа хүний хамгийн нэгдүгээрт хүлээсэн үүрэг. Гэтэл Богдхан уулын Дархан цаазат газар энэ үүргээ хүлээгээгүй.

Тэгэхээр нэн тэргүүнд одоо байгаа газруудаа нийслэлчүүдийнхээ төлөө хамгаалж, хадгалж, тохижуулна.

Байгаль орчны сайд хуулиар хүлээсэн үүргээ биелүүл. Ширээнийхээ ард нуугдаад, хүний хувийн өмчийг яаж ч чадахгүй гээд суугаад байж болохгүй. Хууль бусаар ашиглаж байгаа асуудлыг таслан зогсооход нийслэлтэй хамтарч ажиллах ёстой.

Өмч гэдэг хуулийн дагуу шударгаар олж авсан зүйлийг хэлнэ. Бусдын зүйлийг авчихаад миний өмч гээд байж болохгүй. Богдхан уулын энэ газар бол ард түмний, төрийн өмч.  Нийслэлийн нутаг дэвсгэрт газар олголт, төлөвлөлт ямар замбараагүй байгаа нь  үе үеийн хотын удирдлагуудын буруу. Хууль бус үйл ажиллагаа явуулдаг хүмүүстэй хамтардаг, хамгаалдаг хүмүүс байдаг.

Тиймээс Нийслэлийн зүгээс одоо чөлөөтэй байгаа бүх газрыг нийслэлчүүддээ зориулж тохижуулах ажлыг хэрэгжүүлж байна. Харин Дархан цаазат газар нутаг, тусгай хамгаалалттай газарт газар олгосон байдлыг БОАЖЯ, БХБЯ-ны сайд нар таслан зогсоох ёстой. Тусгай хамгаалалттай газар нутагт газар олгосноос болоод орон сууц, хаус хороолол болчихоод байна” хэмээв.