УИХ-ын Пүрэв гарагийн хуралдаан үргэлжилж байна.   Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл  хэлэлцэж дууслаа. Энэ үеэр хуулийн төсөлтэй холбоотойгоор гишүүд асуулт асууж, хариулт авч, байр сууриа илэрхийллээ.

Захиалагч асуудалд хайнга ханддаг тохиолдлууд бий

 

УИХ-ын гишүүн Ж.Бат-Эрдэнэ “Төрийн нарийн бичгийн дарга нарын хамгийн гол үүрэг тендерийг зөв, чанартай зохион байгуулж, ашиглалтад зөв ашиглах зэрэг шүү дээ. Тендерийн баталгаа, гүйцэтгэлийн баталгааг бууруулж байгаа нь чанарын асуудлын эсрэг яваад байна. Гол юм чанар. Ийм байлгахын тулд гүйцэтгэлийн баталгаа гэдэг зүйлийг байлгаж байгаа шүү дээ.  Хоёрдугаарт, чанаргүй барилга орон нутагт их явагддаг. Үүнд ямар арга хэмжээ авах юм бэ. Хэн хариуцах юм. Барилгын зураг төслийг бид тэр болгон хянаж чадахгүй. Бидний үүрэг ч биш. Энийг аймаг орон нутаг, барилга хот байгуулалтын газрууд хянах ёстой. Сая орон нутгаар яваад харахад умайсан хачин зургууд гаргаад байх юм. Эдийн засаг хүндрэлтэй байна гээд умайж, үмийсэн чанаргүй юм бариад явах юм. Стандарт гэдэг юм хаа байна. Төсөв мөнгөндөө бариулж байна гээд чанаргүй барилга бариад байх юм уу. Төрийн мөнгийг захиран зарцуулж байгаа газруудын уялдаа холбоо ямар байх вэ” зэрэг асуултыг асуулаа.

Сангийн яамны ТНБД Ж.Ганбат “Чанарын баталгаа хэвээрээ байгаа. Гүйцэтгэлийн баталгаа л буурсан. Гүйцэтгэлийн чанар олон жил яригдаж байгаа. Бүх юмны асуудал зураг төсөл, ТЭЦҮ шүү дээ. Энэ асуудлаа Төрийн хэмнэлтийн хуулинд тусгасан. Чанарыг захиалагч тал бүрэн хариуцна. Зураг төсөл дээр орон нутаг өөрсдөө анхаараад, хэрэгцээ шаардлагадаа нийцүүлээд боловсруулаад явах учиртай. Сангийн яам чанарын асуудлыг удаа дараа яриад, захиалагч энэ асуудалд хайнга хандаж байгаа зүйл бол бий. Зураг, гүйцэтгэлээ хариуцлагагүй хийсэн компаниудаа хар жагсаалтад оруулдаг байдлаа бодитоо хийгээд явчихвал ийм асуудал үүсэхгүй” хэмээн хариулав.

Гүйцэтгэлийн баталгааг бууруулчихаар баахан “Би чадна”-ууд гараад ирэх байх

 

УИХ-ын гишүүн Г.Дамдинням “Тендерийн хуулинд хэт бага үнийн саналаар орж ирсэн компанийг яаж зохицуулах юм бэ. Энэ нь эцэстээ хамгийн үнэтэй хэрэгжиж байгаа төсөл болох вий дээ. Товчхондоо, хийж чадагүй сууж байгаад төсөв нэмүүлдэг буруу жишигтэй явж байна. Тендерийн гүйцэтгэлийн баталгааг бууруулах нь зөв үү. Бууруулчихаар баахан “Би чадна”-ууд л орж ирэх байхдаа. Дарханы замыг улсын зам хүлээж аваагүй хэрнээ, баталгаа нь дуусчихсан. Энийг яах вэ. Үнийн өсөлтийн асуудал бүтээн байгуулалтын ажлыг их гацааж байна. Хуулинд тусгаж өгсөн үү” гэв.

Сангийн яамны  Хууль эрх зүйн газрын Худалдан авах ажиллагааны бодлогын хэлтсийн дарга Ц.Батзул “ Дарханы зам Азийн хөгжлийн банкны худалдан авах ажиллагааны дагуу явсан. Сонгон шалгаруулалт тэгж хийгдсэн. Хэт бага үнийн асуудал эл хуулийн шинэчилсэн найруулга дээр тусгасан байгаа. Одоо хүчин төгөлдөр мөрдөгдөж байгаа хуулиар хэт бага үнэтэй гэдэг зохицуулалт байхгүй. Үнийн дүн багыг нь сонгох зарчмаар л явж байгаа. Хуулийн нэмэлт өөрчлөлтөөр чанарын баталгаатай холбоотой зохицуулалт ороогүй. Үнийн өсөлтийн хувьд, гэрээнд хэрхэн зааснаас л шалтгаална. Иргэний хуулиар зохицуулагдана гэсэн үг” хэмээв.

Ингээд асуулт, хариулт дуусч, дээрх хуулийн төслийг эцэслэн батлуулахаар Төсвийн байнгын хороонд шилжүүллээ.