УИХ-ын чуулганы үдээс хойших хуралдаан Хөрөнгийн үнэлгээний тухай хуулийн шинэчилсэн найруулгын төслийн анхны хэлэлцүүлгээр үргэлжилж байна. 

Хэлэлцэж буй асуудалтай холбоотойгоор УИХ-ын гишүүд байр сууриа илэрхийлж, асуулт асууж, хариулт авч байна.

Хуулийн төслийг санаачлагчдын нэг УИХ-ын гишүүн Х.Булгантуяа “Одоогоор Монголд 280 хөрөнгийн үнэлгээчин байгаа. Тэдгээрээс тогтвортой ажлаа хийдэг нь цөөн. Хөрөнгийн үнэлгээ хийдэг компаниуд байгаа. Гэтэл тэд ганц хөрөнгийн үнэлгээ хийхээс гадна аудитын тайлан гэхчлэн олон талын үйлчилгээ үзүүлдэг. Үүнийг цэгц, журамтай болгох хэрэгтэй. Банк санхүүгийн байгууллагын гол нуруу болсон ажил бол хөрөнгийн үнэлгээ. Тиймээс мэргэжлийн байх ёстой. Энэ талын аргачлал журам байхгүй учраас дур дурандаа үнэлгээ хийдэг байхыг үгүйсгэхгүй. Мэргэжлийн холбоодын тухай хуулинд хүлээлт үүсгэж байгаа. Эрхзүйн акт гаргадаг, Хуульчдын холбоо шиг хуульчлагдсан байгууллага болно гэсэн үг” хэмээв.

УИХ-ын гишүүн Б.Баттөмөр “Эдийн засгийн харилцааны маш чухал тулгуур хууль гарч ирж байна. Нөхөрлөлийг аж ахуй нэгж гэж оруулж байгаа нь зөв. Одоогийн Хөрөнгө үнэлгээний хуулиар үнэлгээчдийн сонгон шалгаруулалтад оролцох сонгон шалгаруулалт хатуу, чанга байна гэж ярьж байна. Гэтэл эсрэгээрээ зөөлрүүлвэл маш хор уршигтай шүү дээ. Яагаад ингэж үзэж байгаа юм. Хөрөнгө үнэлгээг төрөлжүүлэх талаас нь хуулинд тусгагдав уу. Хөрөнгийн үнэлгээг бодитой бус тогтоосноор ноцтой хохирол учирвал яах вэ. Аливаа асуудлыг хуулиар зохицуулах зөв. Журмаар зохицуулаад яваад баймааргүй байна. Олон улсын үнэлгээний стандартыг оруулсан гэж байгаа ч харагдахгүй байна. Үнэлгээг хийх хувь хүн, аж ахуй нэгж мэргэшсэн байх ёстой. Мэргэшсэн байхын тулд шалгуур хангах ёстой. Шалгуураа яаж гаргасан юм бэ” гэв.

Түүний асуултад УИХ-ын гишүүн Х.Булгантуяа “Хуулийн 14-р зүйл дээр үнэлгээчинд тавигдах шаардлагууд тавигдсан. Үнэлгээчин шалгалтад ороод унах нь их. Тэгэхээр шалгалтыг уян хатан болгоод, дараа нь мэргэшүүлэх нь зөв гэж үзэж байгаа. Үнэлгээчин буруу үнэлгээ хийж ноцтой хохирол учирвал тухайн аудит хийсэн компанид хариуцлага тооцдог болмоор байгаа. Томоохон хөрөнгийн үнэлгээ хийлгэж байгаа тохиолдолд даатгалд хамрагддаг болоё. Хохирлын үнэлгээг тусдаа хуулиар зохицуулах нь зүйтэй гэж үзэж байгаа. Чанарын хяналтуудыг мэргэжлийн байгууллагууд нь хамтраад хийдэг байя гэж үзсэн. Мэргэшүүлэх сургалтуудыг мэргэжлийн холбоод зохион байгуулна. Хөрөнгийн үнэлгээний аж ахуй нэгжүүд дотроо чанарын хяналтын журамтай байхаар зохицуулсан. Одоогоор олон улсын стандартыг орчуулаад авч үзэж байгаа. Хуулийн 4/4 дээр тодорхой заалтаар бичсэн байгаа” гэх хариултыг өглөө.