Монголд хөл нүцгэн аялж буй үүргэвчтэй хоёр аялагчийн зураг цахим сүлжээнд цацагдаж, олны талцан маргах сэдэв болж буй. Тухайлбал, “үүргэвчтэй аялагчид Монголын аялал жуулчлалд ямар ч нэмэргүй, тэд мөнгө төлдөггүй, үнэгүй хооллож, хэрэн хэсдэг” зэргээр шүүмжлэх хэсэг нь байхад “Тэд аяллын влог хөтөлж, Монголын тухай мэдээллийг дэлхийд түгээдэг, үүгээр нь дамжуулан олон жуулчид ирнэ. Тэрчлэн аялал жуулчлал хөгжих хамгийн чухал зүйл бол зочломжтой, найрсаг байдал юм” гэх мэт эерэгээр харах хүмүүс ч байна.

Тэгвэл олны анхаарлыг татаад байгаа “Хөл нүцгэн” аялагчид хэн бэ? Тэдний талаар сонирхолтой мэдээлэл хүргэе.

Тэд бол дэлхийн 50 орчим орноор аялаад байгаа “үүргэвчтэй аялагч” гэдгээрээ дэлхийд танигдсан хосууд ажээ. Эрэгтэй нь японы иргэн Сатору гэгч бөгөөд

Тэрбээр 2014 онд буюу 18 настайдаа үүргэвч, унадаг дугуйнаас өөр зүйлгүй дэлхийг тойрон аялах замдаа гарчээ.

Түүний эхний аялал Иран улс бөгөөд Японоос Иран руу дугуйгаар аялсан байна. Дараа нь Сатору Япон-Хятад-Вьетнам-Лаос-Тайланд-Камбож-Малайз-Сингапур-Индонез-Энэтхэг-Балба-Казахстан-Киргизстан-Узбекстан-Туркменистан-Иран гэсэн маршрутаар явган аялжээ.

Харин өвлийн улиралтай орнууд руу тэрбээр ихэвчлэн дугуйгаар аялдаг бөгөөд Иранаас Норвеги хүртэл ингэж аялсан байна. Иран улсаас цааш Армени-Гүрж-Орос-Финланд-Лапланд-Швед-Норвеги, АНУ, Канадаар аялжээ. Тэр дан ганц алхаад эсвэл дугуйгаар аялаад байдаггүй бөгөөд явж болох бүхий л замыг маш бага зардлаар туулдаг байна. Тухайлбал, Канадаас гарч, Алъяск руу аялахдаа Юкон голыг салаар туулж, очжээ.

Харин түүнтэй хамт аялж буй эхнэр Акинагийн тухайд Япон бүсгүй бөгөөд тэд Канадад аялж байхдаа танилцжээ. Тухайн үед Сатору Канадын хойд нутагт Эскимосчуудтай амьдарч байж. Тэд хамтдаа Өмнөд Америк, Антарктид болон Япон улсаа бүтэн тойрон аялсан байна.

АЯЛАЛ БОЛ ТЭДНИЙ АМЬДРАЛ

Саторугийн хувьд дэлхийн маш олон орноор аялсан бөгөөд чухам яагаад ингэж аялсан нь хүмүүсийн анхаарлыг татдаг аж. Тэрбээр энэ асуултад “Би хүн төрөлхтний бүхий л соёлоос амьдралын сургамж авахыг эрмэлздэг” гэж хариулжээ. 

Мөн Сатору Ямазаки “Би найман жилийн турш бараг мөнгөгүй аялсан ч олон сайхан сэтгэлтэй хүмүүстэй таарч байсан учраас цааш явах боломжтой болсон. Аялах бол миний амьдрал юм. Аялахад төгсгөл гэж үгүй. Юу ч үгүйгээр аз жаргалыг мэдэрч чаддаг” гэж Японы нэг сайтад өгсөн ярилцлагадаа дурджээ.

Түүнчлэн тэрбээр Канадын CBC-д өгсөн ярилцлагадаа “Би дэлхий ертөнцийг харахыг хүссэн” гэжээ. Нэг үгээр Саторуг дэлхийн сайхан сэтгэл хүмүүсийн эрэлд гарагч гэж хэлж болох нь ээ.

Аялагч хосууд Коронагоос болоод Япондоо хоёр жил гацсан ч урт хугацааны дараах хүсэн хүлээсэн аяллаа ийнхүү Монгол улсаас эхэлсэн байна. Аяллын мэдээлэл, сонин содон адал явдлаа тэд 9000 гаруй гишүүнтэй дэмжигчдийнхээ фэйсбүүк групп болон өөрсдийн цахим хаягаар дамжуулан олон нийтэд хуваалцдаг ажээ.

П.Мөнхжаргал