Монгол Улсын хилийн дагууд хилчид ногоон хэрэм байгуулахаар төлөвлөөд байна. Монгол Улсын Ерөнхийлөгчийн санаачилсан "Тэрбум мод" үндэсний хөдөлгөөнд нэгдэж, ногоон хэрэм төслийн эхлэл томоохон ажил болох мод үржүүлгийн агропаркийн нээлтийг өнгөрсөн баасан гарагт /2022.06.10/ хийлээ.

Монгол Улсын 8252 км урт хилийн дагууд говь цөл, тал хээр, уул, ой тайга зэрэг физик газар зүй, байгаль цаг уурын бүхий л бүс хамаарагддаг. Энэ онцлогт тохируулан улсын хил хамгаалалтыг зохион байгуулахаас гадна байгаль дэлхийгээ унаган төрхөөр нь хайрлан хамгаалах үүргийг хилчид хүлээдэг.

Энэ дагуу Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд Хил хамгаалах байгууллага Монгол цэргийн нэгдсэн холбоотой хамтран “Ногоон хэрэм” төслийг хэрэгжүүлж эхлээд байна. Төслийн хүрээнд Хил хамгаалах байгууллагаас шинээр цогцлоон босгосон “Баянчандмань мод үржүүлгийн агропарк”-ийн нээлтийг ийнхүү хийлээ.

Тус агропаркад нарс, шинэс, улайс, хайлаас, бургас, үхрийн нүд зэрэг 13 нэр төрлийн 200.000 гаруй модны суулгац, үрийн тариалалтаар 130.000 орчим үрсэлгээг бэлтгэн ургуулж байна.

Хил хамгаалах байгууллага хилийн дагууд мод тарьж, ногоон хэрэм байгуулахад шаардагдах 16 сая модыг хангахын тулд хилийн цэргийн 24 ангид “Мод үржүүлгийн төв”, 5 ангид мод үржүүлгийн агропарк байгуулж, мэргэжлийн агрономич ажиллуулж, ойн мэргэжилтнүүдээс заавар зөвлөгөө авч хамтран ажиллаж байгаа юм.

Мөн мэргэжлийн боловсон хүчнийг бүрдүүлэх зорилгоор хилийн цэргийн бүх анги, салбарт мэргэжлийн агрономчдыг томилж өнөөдрийн байдлаар 96 хувьтай хангагдсан байна. Цаашид Хил хамгаалах байгууллагын мод үржүүлгийн агропаркийн төвүүдийн  үйл ажиллагааг өргөжүүлэн жилд дунджаар 1,5-2.0 сая модны үрсэлгээ бэлтгэж, 2030 он гэхэд дэвшүүлсэн зорилтод түвшинд хүрэх бүрэн боломжтой гэж үзэж байна.

Хилчид мод үрсэлгээг суулгаж тариалаад орхих биш арчилгаа тордолгоог хамгийн чухалд тооцож 3000 гаруй гэрээт болон хугацаат цэргийн алба хаагчдыг анхан шатны сургалтад хамруулан “Ойжуулагч” мэргэшлийг эзэмшүүлж эхлээд байна.

Энэхүү агропаркаас бойжсон модыг тал хээрийн бүсийн хил хамгаалалтыг нягтаршуулах, байгалийн гамшигт үзэгдэл цас, бороо, шороон шуурга, элсний нүүдлээс мал, амьтныг хамгаалах зорилгоор хилийн хэсэгт 6,9 сая модыг 960 га талбайд тарьж, ойн зурвас бүхий хамгаалалтын ногоон хэрэм байгуулах, анги салбар, боомтын ногоон байгууламжийг нэмэгдүүлэх, говийн бүсийн булаг шанд бүхий баянбүрдийг хамгаалах чиглэлийн үйл ажиллагаанд зориулах юм.

Агропаркийн нээлтийн үеэр “УБТ гарден” ХХК-ийн захирал Б.Нямболд “Ногоон хэрэм” төсөлд нэгдэж нэг сая модны суулгацыг үнэ төлбөргүй өгөхөө мэдэгдэж, ХХЕГ-ын дарга, хилийн цэргийн командлагч, бригадын генерал Х.Лхагвасүрэнтэй гэрээг үзэглэлээ.