Шүүхийн шийдвэр гүйцэтгэх ерөнхий газрын дарга Д.Загджав долоодугаар сарын 8-ны өдрийн Ерөнхийлөгчийн зарилгаар бригадын генерал цол хүртээд буй.

Түүнийг 2020 оны долоодугаар сарын 22-ны өдрийн Монгол Улсын Засгийн газрын 28 дугаар тогтоолоор ШШГЕГ-ын даргаар томилогдоход бригадын генерел цолонд “шунаж” тус албан тушаалд томилогдлоо гэх шуум гарч байв. Тэр цагаас хойш бүх нийтээрээ тэмдэглэн өнгөрүүлдэг баяр бүрээр генерал цол авах нь гэдэг битүүхэн хардлага ч олны дунд байсан. Гэтэл жил гаруй хугацаа өнгөрөхөд тэрбээр хүссэн цолондоо хүрч чадаагүй. 

Шүүхийн шийдвэр гүйцэтгэх байгууллагын түүхт 100 жилийн ойгоор хүртэл бригадын генерал цол олгохгүйгээр нэрийг нь буцаасан гэдэг. Харин түүний оронд ШШГЕГ-ын тэргүүн дэд даргаар ажиллаж байсан Д.Дамдинцэрэн бригадын генерал цол хүртсэн нь Д.Загджавыг дэд даргаасаа муу нэр хүндтэй, "намын тавиул" гэгдэхэд хүргэж байв.

ЯМАР Ч ХАМААГҮЙ ЦОЛ АВМААР БАЙГАА БОЛ ШШГЕГ-Т АЖИЛД ОР

Сайнаасаа илүү саар нэртэй Д.Загджавт өмнө нь цэрэг, цагдаагийн байгууллагад алба хааж байсан түүх бараг байдаггүй. 

Намтар түүхээс нь харахад, 1985 онд НАХЯ-ны Цэргийн дээдийг төгсөөд 1987 онд хүртэл Дорноговь аймагт хоёр жил цагдаагаар ажиллажээ. Түүнээс хойш хаана, ямар албан тушаалд, хэрхэн ажилласан ньт тодорхойгүй. Дэслэгч цолтой байхыг нь хүмүүс мэддэг ч, нэг л өдөр хурандаа болчихсон байсныг ганцхан өөрөө болон өөрт нь цол олгосон хүмүүс л мэддэг гэх хошигнол ч цэрэг, цагдаагийнхан дунд байдаг.

Тиймдээ ч түүнийг "хулхи хурандаа" гэж нэрлэдэг биз ээ. Ингэж нэрлэгдсэн Д.Загджав 2000 оноос улс төрд орж ирсэн. Ингэхдээ тухайн үед мандан бадарч явсан Монгол Улсын гурав дахь Ерөнхийлөгч, МАХН-ын дарга Н.Энхбаярын гараас хөтөлж, улс төрд хөл тавьсан бөгөөд томилгооны "бялуу хуваалт" бүрээс хоцролгүй "хишиг" хүртсээр ирсэн.

2000-2008 он хүртэл Хан-Уул дүүргийн Засаг даргаар ажиллаж байгаад, 2008 онд УИХ-ын гишүүнээр сонгогдож ажилласан түүнийг Их хурлын гишүүн байсан гэвэл итгэх хүн ховор. Магад, гишүүн болсон ажлаа олигтой хийгээгүйтэй нь холбоотой болов уу.

Эрхэлсэн ажил, томилогдсон томилгоо бүрдээ час хийсэн ганц ч ажил хийж үзээгүй тэрбээр Боловсролын яамны төрийн нарийн бичгийн даргын албан тушаалыг “ямар ч ашиггүй” гэж голоод ажилдаа очоогүй тухай хэсэг хэвлэлээр шуугиад өнгөрч байв. Л.Загджав “их багшаа” унах үед тав дахь ерөнхийлөгч Х.Баттулгыг түшин тулж, бөөрөнд нь наалдсан тухай учир мэдэх хүмүүс хэлдэг. Тиймээс л ШШГЕГ-ын даргаар томилогдоход нь экс Ерөнхийлөгч Х.Баттулга тусгайлан хүлээн авч уулзаад, "эрхлүүлж" байсан удаатай.

Ийнхүү улс төрийн томилгоог өөрийн эрх ашгийн үүднээс, голж шилэн байж сонгодог бригадын генерал Д.Загджав ШШГЕГ-т нэлээд том ашиг харж, томиглогдоо болов уу. Саяхан тэрбээр бушуу туулай борвиндоо баастай гэдэг шиг дахин нэг хулхи хошууч “төрүүлчихсэн”.  Тэр нь Дуучин A Cool буюу Б.Анхбаяр билээ. Түүнийг ШШГЕГ-ын Соёмбо чуулгын даргаар томилонгуутаа, ногоон гэрлээр хошууч цол олгочихсон. Үүнд нь шударга ёс, хууль журмыг сахин биелүүлж, албан үүргээ нэр төртэй гүйцэтгэж ирсэн мэргэжлийнхэн ихэд дургүйцсэн юм.

Хууль зүйн байнгын хорооны хуралдааны үеэр Б.Энхбаяр гишүүнийг ам асуухад, гацаж түгдрээд хууль зүйн үндэслэлийг нь тайлбарлаж чадаагүй. Мөн л олны дургүйцлийг хүргэж орхисон.

Хууль сахиулах ёстой салбарын магнатыг гуядаад авчихсан энэ “балинчаа” Н.Энхбаяр, Х.Баттулга нар  оруулсан шигээ гаргах биз ээ. Түүний хүү хүртэл төрийн албыг голж, шилж дураараа томилгоо хийлгэх халааг нь аль хэдийнээ авсан гэдэг. 

Хэдэн арван жил ном журмынх нь дагуу ажиллаж, алдар цолоо нэр хүндтэй авдаг мерит тогтолцоог эвдсэн Л.Загджавт салбарынхан нь тийм ч таатай биш байна.