Ховд аймгийн МАН, АН-ын төлөөлөгч нар нь хамтдаа мөрийтэй тоглож бооцоондоо аймгийн тендер, газар, албан тушаал зэргийг тавьж 90 мянган хүн амтай нэг аймгийн эрх ашиг, ирээдүйг зүгээр л зугаа цэнгэл болгосоор ирсэн аж.

Тодруулбал, Ховд аймгийн Засаг дарга, АН-ын дарга Шуураа хочит М.Амарсанаа, аймгийн ИХ-ын дарга, АН-ын дэд дарга З.Эрхбаяр, Жаргалан сумын ИТХ-ын төлөөлөгч, АН-ын гишүүн Сангас хочит Б.Бадрах, МАН-ын дарга болохоор зүтгэж буй С.Бямбацогт сайдын нагац ах, “Ховдын өргөө” ХХК-ийн захирал М.Ганзориг, аймгийн ИТХ-ын төлөөлөгч асан, МАН-ын гишүүн Бамбар хочит Баярсайхан, Жаргалант сумын ИТХ-ын дарга асан, МАН-ын гишүүн Туулайтулга нарын нөхөд долоо хоногтоо 2-3 удаа Ховд аймгийн үнэт зүйлсээр мөрийцэн тоглодог уламжлалтай ажээ.

Тэд зундаа Буянт голын хөвөөнд тусгайлсан барьсан гэртээ тухалдаг бол өдийд С.Бямбацогт сайдын хамаарал бүхий “Алтай Трейст” ХХК-ийн байранд хууль бус мөрийтэй тоглоомоор зугаагаа гаргаж, ёндоогоо үздэг байна.

Эрх ашиг нэг болохоор АН-ын бүлгийн хурал дээр Ховд аймгийн Засаг дарга, АН-ын дарга М.Амарсанаа “М.Ганзоригийг дэмжиж заавал МАН-ын дарга болгох хэрэгтэй шүү” гэж захин хэлж, захиргаадаж үүрэгдсэнд гайхах зүйл алга. Мөрийтэй тоглоомын ширээний ард мөрөөдлөө ярьцгааж, явах зам, хутгах хор, хувааж идэх хувиа хүртэл ярьж тохиролцдог журмын анд М.Ганзоригоо дэмжих нь Ховд аймгийн МАНАН бүлэглэл гэдгийг нь нотолж байгаа юм.