Японы ерөнхий сайд Санаэ Такаичигийн тэргүүлсэн эвсэл ням гарагт болсон сонгуулиар түүхэн ялалт байгууллаа. Тус улсын анхны эмэгтэй ерөнхий сайд болсон түүний удирдсан Либерал Ардчилсан нам парламентын доод танхимын 465 суудлаас 316-г авсан нь түүхэн дээд амжилт болсон байна. 

Тэд Японы Шинэчлэлийн намтай эвссэн бөгөөд сонгуулийн үр дүнгийн дараа тус эвсэл нийт 352 суудалтай болж байна. Дээд танхимд олонх биш ч хууль тогтоох үйл ажиллагаагаа саадгүй явуулах боломж бүрдэж байгаа аж. 

Такаичи "Энэ удаагийн сонгууль эдийн засаг, санхүү болон аюулгүй байдлын бодлогод томоохон өөрчлөлт авчирна. Олон эсэргүүцэлтэй тулгарч байгаа ч ард түмэн дэмжсэн бол бид бүх хүчээ дайчлан хэрэгжүүлэх ёстой" хэмээн ярьжээ. 

АНУ-ын ерөнхийлөгч Дональд Трамп цахим хуудсаар дамжуулан Такичид баяр хүргэсэн байна. Тэрбээр ирэх сард Японы ерөнхий сайдыг Цагаан ордонд хүлээн авч уулзахаар төлөвлөөд буй.  Такаичигийн хувьд өнгөрсөн сард парламентыг тарааж ээлжит бус сонгууль явуулна гэдгээ зарласан. 

Ажлаа аваад дөрвөн сар болж буй тэрбээр "Намайг ерөнхий сайдын албан тушаал хашихад тохирсон хүн эсэхийг ард түмнээрээ шийдүүлэхийг хүссэн" хэвлэлийн хурлаар ярьж байв.