Гэр бүл, хөдөлмөр нийгмийн хамгааллын яамнаас энэ онд хөгжлийн бэрхшээлтэй хүүхдийн асуудалд онцгойлон анхаарч, шаардлагатай хөрөнгийг улсын төсөвт тусган батлуулж, шинээр 300 хүүхдийн багтаамжтай төв шинээр барихаар болсон.

Баянзүрх дүүрэгт шинээр ашиглалтад орох асрамжийн газарт нийслэл болон 21 аймаг, 330 сумаас асран хамгаалагчгүй, хүнд хэлбэрийн хөгжлийн бэрхшээлтэй 300 хүүхдийг хүлээн авах аж.  Тус төвийг “Өнөр бүл” хүүхдийн төвийн харьяанд ажиллуулахаар тусгагдаж, асрамжийн газрын барилгын нийт төсөвт өртөг 23.9 тэрбум төгрөг, үүнээс 2025 онд 5.9 тэрбум төгрөгийг гүйцэтгэгч байгууллагад олгожээ.

Улсын хэмжээнд өнөөдрийн байдлаар хөгжлийн бэрхшээлтэй 0-18 насны 12 мянга гаруй хүүхэд бүртгэлтэй байна. Өнгөрөгч 2024 оны арваннэгдүгээр сарын байдлаар хөгжлийн бэрхшээлийн улмаас цэцэрлэгт хамрагддаггүй 814, сургуульд сурч чадахгүй байгаа 1263 хүүхэд байдгийн олонх нь орон нутагт амьдарч байсан. Хөгжлийн бэрхшээлтэй хүүхдүүдийн дийлэнх хувь нь боловсролын үйлчилгээнд хамрагдаж чадаагүй гэсэн судалгаа бий.

Тэгвэл улсын хэмжээнд өнөөдрийн байдлаар 29 төвд 1000 гаруй хүүхэд амьдарч байна. Эдгээр төвийн гурав нь улсын төсвийн, 26 нь олон улсын болон төрийн бус байгууллага, хувь иргэний санхүүжилтээр үйл ажиллагаа явуулдаг аж. 

Монгол Улсын Засгийн газрын тухай хуулийн 24 дүгээр зүйлийн 2, Хөгжлийн бэрхшээлтэй хүний эрхийн тухай хуулийн 20 дугаар зүйлийн 20.1, 37 дугаар зүйлийн 37.6, Боловсролын тухай хуулийн 42 дугаар зүйлийн 42.1 дэх хэсгийг тус тус үндэслэн, Хөгжлийн бэрхшээлтэй хүүхдэд хөгжлийн дэмжлэг үзүүлэх, боловсролд тэгш хамруулах, цэцэрлэг, ерөнхий боловсролын сургуульд хамрагдалтыг нэмэгдүүлэх, мэргэжил арга зүй, хүний нөөц, тохируулгат орчныг бүрдүүлэх ажлыг удирдан зохион байгуулж ажиллахыг Аймгийн боловсрол, шинжлэх ухааны газар, Нийслэлийн боловсролын газрын дарга, өмчийн бүх хэлбэрийн цэцэрлэг, ерөнхий боловсролын сургууль, насан туршийн боловсролын төвийн удирдлагад мөн Хөгжлийн бэрхшээлтэй хүүхдийн эрүүл мэнд, боловсрол, нийгмийн хамгааллын салбар комиссын үйл ажиллагааг мэргэжил, арга зүйгээр ханган, хяналт тавьж ажиллахыг Хөгжлийн бэрхшээлтэй хүүхдийн эрүүл мэнд, боловсрол, нийгмийн хамгааллын комисст даалгасан байдаг.