”Сүүлчийн бороо” амьд хөгжимт - мета драмын жүжиг хаалтаа хийх нь ээ. Тодруулбал, “Pro” театрынхан өнгөрсөн дөрөвдүгээр сард Александр Вампиловын “Нугасны ан” жүжгийн зохиолыг “Сүүлчийн бороо” нэрээр, мета драмын жүжиг хэлбэрээр толилуулсан билээ.  Оросын буриад зохиолч Александр Вампиловын "Нугасны ан" жүжиг 1970-аад оны Зөвлөлтийн жүжгийн зохиолын нэг содон өнгө гэгддэг. Уг жүжигт хүний сэтгэл доторх үймээн, хүмүүсийн харилцааны зөрчил, ёс суртахуун, хүний өрөвдмөөр хямд төрхийг хошин өнгө аясаар харуулдаг. Энэхүү жүжгийг Соёлын тэргүүний ажилтан, найруулагч Б.Анхбаатар "Сүүлчийн бороо" нэртэйгээр дахин шинэчлэн найруулж, Оросын шинжлэх ухаан, соёлын төвийн тайзнаа тавьсан юм.

Гол дүр Зилов бол 30 орчим настай эр. Тэрбээр залуу насны омголон, бардам байдал, нөхөрлөл, хайр дурлалын харилцаагаа цэгцлэхийг хичээх явцдаа өөрийгөө болон эргэн тойрныхоо хүмүүсийг санамсаргүйгээр зовоодог амьдралын эрч хүчээр дүүрэн залуу.

Жүжигт түүнд ирэх дарамт, амьдралын таагүй огцом өөрчлөлтүүд, хэлсэн үг бүрдээ хүлээх үүрэг хариуцлагын асуудал тулгардаг. Зиловын дүрд Соёлын тэргүүний ажилтан, жүжигчин З.Булган тоглосон бөгөөд зохиолч нь дүрүүдээ хэзээ ч шүүдэггүй, ёс суртахууныг үзэгчдэдээ тулгадаггүй, хөндлөнгийн байр сууринаас хандаж, үзэгчдэд жүжгийнхээ дүрүүдийг өөрийнхөөрөө дүгнэх боломжийг олгодог. "Сүүлчийн бороо"-нд норонгоо хүн гээч яг хэн билээ, юу билээ гэх бодлын хариуг та өөрөө олоорой.

"Сүүлчийн бороо"  энэ сарын 21-23-ны өдрүүдэд олны мэддэгээр РЦНК буюу Оросын шинжлэх ухаан соёлын төвийн тайзнаа шивэрнэ. Тасалбарыг https://ticket.mn/event/2513-аас захиалж болох бөгөөд  99648092, 99999072 утсаар ч бас холбогдох болох юм байна.