Их хуралд 2247 төлөөлөгч оролцож байна. Нэг төлөөлөгч 140 намын гишүүнийг төлөөлж байгаа аж. Хуралд МАН-ын дарга, Ерөнхий сайд асан Л.Оюун-Эрдэнэ үг хэллээ. Тэрбээр Ерөнхий сайдаар ажилласан цаг үеийнхээ ажлыг тоймлон танилцууллаа.

Тэрбээр "Цар тахлын хүнд цаг үед зураг төсөвтэй, техник эдийн засгийн үндэслэлтэй томоохон мега төслүүдийг эхлүүлж чадсан. Хийн хоолойноос бусдыг нь эхлүүлсэн ч цаашид шинэ төслүүдийг эхлүүлэх шаардлага байгааг шинэ Ерөнхий сайдад хэлсэн. Мөн Оюутолгойтой бизнесийн зарчмаар ярьж чадахгүй байсан. Учир нь манай улсад ногдох 34 хувьд адилхан хөрөнгө оруулалт хийж чадахгүй байсан. Үндэсний баялгийн сан байгуулах гэж байгаа учраас 34 хувьд ногдох 2,3 тэрбум доллар өөрөө монголын ард түмэнд та бүхнийг буруу ойлгуулж байна гэх хэлцлийг хийж, тэглүүлж чадсан. Энэ мөнгийг хуримтлалын санд шилжүүлж чадсан. Үндэсний баялгийн сангийн асуудал олон засгийн газар дамжиж яригдсан, цаашид ч яригдана. Гол нь бодлогын залгамж халааг хадгалж, хэрэгжүүлэх үндэсний бодлогын хэмжээнд МАН авч явах учиртай. Шинэ сэргэлтийн бодлого парламентын ардчиллыг бэхжүүлж, засаглаглын ил тод байдлыг хангахад бүхэлдээ чиглэгдсэн шүү.

Холын зорилго үгүй аваас ойрын зовлон алга болохгүй. Бид 100 жилийн турш олон сорилтыг даван туулсан. Эв нэгдлээ алдсанаас бусдын идэш болсон гашуун түүх олон бий. Эвдрэлцэн талцах болгондоо уруудан доройтдог түүх ч олон байна. Энэ зовлон зөвхөн МАН-ын асуудал биш улсын асуудал болдог тул "БИ" үзлээсээ татгалзаж "БИД" хэмээн харж ирээдүй рүү хөгжих ёстой. 31 дүгээр их хурал эв нэгдлийн хурал байх ёстой. 

Намайг дэмжиж ирсэн эрхэм журмын нөхдөдөө чин сэтгэлээсээ талархаж байна. Түүхт намаа нэгэн зуунаас нөгөө зуунд ялалтаар түүчээлж, намын даргаар ажилласан цаг хугацаа бол миний амьдралын хамгийн бахархалт дурсамж болон үлдэх болно. Улс орныхоо хөгжлийн төлөө чин шударгаар хичээнгүйлэн зүтгэснийг өвөг дээдсийн маань сүнс гэрчилнэ. Худал бүхэн ард хоцорч, цаг хугацаа өнгөрөх тусам бодит үйл хэрэг, үнэт үзэл бодол илүү тодорч чадна гэдэгт би итгэдэг.

Шинэ намын даргыг бүх талаар дэмжиж ажиллахаа илэрхийлье. Намын дарга бол хэцүү ажил юм байна. Дараагийн намын даргаа хайрлаж, хамтарч, дэмжиж ажиллах ёстой. Би үргэлж дэмжин ажиллах болно. " гэлээ.