Айхтар ширүүн үзэгдлийн архан талд ах нам Их хурлаа хийлээ. Эв нэгдэл, шийдэл хөгжил гэсэн уриатай эл Их хурал их зүйлийг шийднэ гэх итгэл иргэдэд байсан юмсан. Юутай ч энэ удаагийн Их хурал ЭВ НЭГДЭЛ, ШИЙДЭЛ, ХӨГЖИЛ гэсэн уриатайгаар гурав дахь өдрөө өдгөө үргэлжилж байна. Эхний өдөр МАН-ын даргаар Ням-Осорын Учрал сонгогдсон. Тэрбээр 1974 санал буюу 94.95 хувийн санал авч ялалт байгуулсан. Эхний өдөр МАН-ын шинэ даргаар Н.Учралыг сонгосон бол хоёр дахь өдрийн хурлаар МАН-ын хичээн эрмэлзэх зүйл, үндсэн дүрмийг хэлэлцэн баталлаа. Тодруулбал, намын үндсэн дүрэмд 44 заалт шинээр нэмж оруулж, 57 заалтыг өөрчлөн найруулж, есөн заалтыг хассан.

Түүнчлэн МАН-ын дүрмийн “Ялсан намын дарга Ерөнхий сайд байна” гэсэн заалтыг Их хурлын төлөөлөгчид олонхийн саналаар хэвээр нь үлдээсэн.

Эндээс  Их хурлын төлөөлөгчид Н.Учралыг Ерөнхий сайд болгох хүсэл сонирхолтой юм байна дүгнэлтийг хийж болох байх. Харин МАН-ын цоо шинэ дарга Н.Учрал улс төрийн шахалт дайралтаас үл хамаарч засгаа тогтвортой ажилуулна гэдгээ Их хурлын үеэр удаа дараа мэдэгдсэн. Харин өнөөдөр МАН-ын Бага хурлын гишүүд, Хяналтын ерөнхий хорооны гишүүдийг сонгоно. Угаас 2023 онд батлагдсан Улс төрийн намын тухай хуулийн шинэчилсэн найруулгад тусгагдсаны дагуу энэ оны 12 дугаар сарын 31-ний дотор улс төрийн намууд тус хуульд дотоод дүрмээ нийцүүлж батлаад, намынхаа дээд байгууллага эсвэл төлөөллийн төв байгууллагаар батлуулаад, хүргүүлэх үүрэгтэй.

Ямартай ч МАН-ын XXXI  Их хуралд  нийслэл, орон нутгаас анх удаа 2255 төлөөлөгч сонгогдсон. Их хурлын зохион байгуулалтын ажилд Социал демократ Монголын Эмэгтэйчүүдийн холбоо, Социал демократ Монголын Залуучуудын холбоо, Социал демократ Монголын Оюутны холбоодын гишүүд болон сайн дурын 300 гаруй залуу, мөн Удирдах зөвлөлийн Ажлын албаны 150 гаруй ажилтан нэгдсэн гээд 104 жилийн түүхэн дэх хамгийн өргөн бүрэлдэхүүнтэй цугларалт гэдгийг намын удирдах шатны гишүүд онцолж буй.

Гэхдээ “Ардын нам ард түмэндээ эргэн ирнэ” гэж нүүр бардам хэлж, алдааг оноогоо хэлэлцэн тунгааж, тулсан бэрхийг туулж давах эрс өөрчлөлт шинэчлэлийн их үйлсийг эхлүүлэхээр эх орныхоо өнцөг булан бүрээс энэ танхимд хуран цуглаад байгаад нь ахиад л эргэлзээд эхэлчихлээ. Их хурлын эрхэм төлөөлөгчид нь намын дүрэм дэх намын дарга Ерөнхий сайд байна гэсэн заалтыг хөдөлгөхгүй хэвээр үлдээчихээд байхад, цоо шинэ дарга нь Г.Занданшатарын Засгийн газрын үйл ажиллагааг энэ чигээр нь ихээ  сайн, дэмжиж үргэлжлүүлнэ гэдэг чинь яг юу гэсэн үг вэ. 2255 төлөөлөгчийн хүсэл сонирхлыг үл хүндэтгэсэн хэрэг биш гэж үү? Эсвэл дүрмийг зөрчих гэж л баталдаг гэж хууль байдаг болчихсон хэрэг үү... Ардын нам ард түмэндээ эргэж ирээгүйн нотолгоо энэ биш гэж үү?