Жил бүр улсын төсөв батлахдаа гол төлөв зарлагаа давуулсан байдалтай буюу “заавал” юм шиг тодотголтой баталдаг нь гашуун үнэн. Төсвийн алдагдлаа ихэвчлэн гадаадын зээл тусламж авах хэлбэрээр, эсвэл алаагүй байвгайн үлгэр мэт ашигт малтмалаа ахиу ихээр дориун үнээр зарж санхүүжүүлнэ гэх гэнэн төсөөлллийг хийдэг. Энэ жилийн тухайд иргэдээс санал авсан, урсгал зардлаа танасан гэх утга бүхий уянгын халилаар чимсэн мэдээлэл түгээж байгаа ч тэнцвэржүүлсэн тэнцэл -1,050.0 /ДНБ-1 хувь/ буюу нэг их наяд төгрөгийн алдагдалтай байхаар батлчихлаа. Өөрөөр хэлбэл өмнөх жилүүдийн жишгээр баталсан гэсэн үг.

Тэгээд ч төсөв батлах хуулийн хугацаа тулж дорвитой хэлэлцүүлэг ч хийгээгүй энэ УИХ. Учир нь ууган гэгдэх улс төрийн намын бужигнаан улсын санхүүгийн асуудалд нөлөөлөх хэмжээнд хүрснийг бултаараа харсан. Эдийн засагчдын хэлж буйгаар төсөвт тодотгол хийх шаардлага орлогын нөхцөл байдалтай шууд хамааралтай. Энгийнчилбэл, өөдрөг төсөөлсөн өнөө төсөв маань орлогоо бүрдүүлэх боломжгүй болсон тохиолдолд тодотгол хийдэг гээд хэлчихэд болно.

Нөгөөтэйгүүр энэ сарын статистик мэдээллээс харахад, хүнсний бараа бүтээгдэхүүнтэй холбоотой инфляци өмнөх үетэйгээ харьцуулахад өссөн үзүүлэлттэй гарчээ. Тодруулбал инфляци 9.2 хувьтай гарсан байна. Гэтэл төсөвт голлох нөлөө үзүүлдэг нүүрснээс орж ирж байгаа орлогын хэмжээ гурван тэрбум ам.доллараар буурчихсан байдаг. Аль ч өнцгөөс нь харсан энэ жилийн төсөв өнгөрсөн жилүүдийнхээс илүүрхэх зүйлгүй харагдаад байна...