МАН-ын XXXI их хуралд 2255 төлөөлөгч оролцож буй. Тэд 104 жилийн түүхтэй намынхаа 31 дэхь даргыг сонголоо. Тодруулбал намын даргын төлөөх сунгаа Б.Лхагважав, Н.Учрал нарын хооронд болж, нууц санал хураалтыг таван "хар" машинаар авсан юм. МАН-ын даргыг сонгох нууц санал хураалт нэг цаг гаруй үргэлжилсэн бөгөөд саналыг тоолж, нэгтгэх ажил цаг гаруй үргэлжилсэн юм. Санал тооллогын комиссын мэдээлснээр Н.Учрал 94,95 Б.Лхагважав 5.05хувийн санал авснаар намын даргаар томилогдлоо.

Л.Оюун-Эрдэнийн эмхлэн байгуулсан хоёр дахь танхим болох хамтарсан Засгийн газрын гал тогоог барьж байсан Н.Учрал өдгөө Г.Занданшатарын Засгийн газарт Монгол Улсын Тэргүүн шадар сайд бөгөөд Эдийн засаг, хөгжлийн сайдаар ажиллаж буй.

Тэрбээр 2016 онд 29 настайдаа УИХ-ын гишүүн болсноос хойш гурав дахиа сонгогдоод байгаа. УИХ-ын гишүүнээр сонгогдмогцоо инновац, цахим бодлогыг дэмжих лобби бүлэг байгуулан ажиллаж, улмаар 2018-2020 онд УИХ-ын Цахим бодлогын түр хорооны дарга, 2020 оноос УИХ-ын Инновац, цахим бодлогын байнгын хорооны даргаар ажиллаж, УИХ-д цахим бодлогын байнгын хороо байгуулагдахад анхны даргаар нь ажилласан төдийгүй Цахим хөгжлийн яамны анхны сайдаар томилогдсон гэдэг тодотголоос нь харахад мань эр МАН-ыг цахимжуулах байх гэх хүлээлт намын гишүүдэд нь бий гарцаагүй.

Уг нь Н.Учрал урлагийн замналаар од болж, хип хоп урсгалаар уран бүтээл туурвиж, “Араатны хаан арслан” хүүхэлдэйн киноны баатар Тимоны дүрээр олонд танигдсан түүхтэй. Баян айлын эрх хүү гэх тодотголтой тэрбээр аавынхаа үүсгэн байгуулсан “Их Засаг” их сургуулта төгссөн. “Их Засаг” их сургуулийнхаа нэр, нүүрийг гаргадаг шилдэг оюутан байсан гэх юм иблээ.

Хожмоо Британийн Лимкоквин их сургуульд Бизнесийн удирдлагын магистр, мөн Британийн Глоустершер их сургуульд Олон улсын менежмэнтийн магистр, ОХУ-ын ШУА-ийн Сибирийн салбарын Монгол, Түвд, Будда судлалын институтэд Түүхийн ухааны доктор /PhD/ зэрэг хамгаалсан гэдэг.

Охидын шүтээн од хип хопчин маань гэнэт л урлаг, уран бүтээлийн замаасаа хазайж, улс төр, олон нийтийн ажил руу хөл тавьсан нь 2012 он. Орон нутгийн сонгуульд нэр дэвшин Баянзүрх дүүргийн ИТХ-ын төлөөлөгчөөр ажиллаж байгаад 2015 онд Шадар сайд У.Хүрэлсүхийн Хэвлэл мэдээлэл, олон нийттэй харилцах бодлогын зөвлөхийн албанд томилогдоод дараа жил нь УИХ-д нэр дэвшин гишүүн болсон. Тиймдээ ч мань эрийг Хүүкийн фракц гэдэг биз.