БНХАУ-ын Эрээн хотод хөл хориой тогтоосонтой холбоотой хоёр улс хоорондын авто болон төмөр замын тээвэр хаасан гэх мэдээлэл гараад байна. Тэгвэл энэ асуудлаар Гадаад харилцааны яамны хилийн хэлтсийн дарга Д.Болд өнөөдөр /2022.06.07/ сэтгүүлчдийн асуултад хариулт өглөө.

Тэрбээр"Өнөөдрийн урьдчилсан байдлын мэдээллээр 40 чингэлэг хилийн тэг цэг дээр байна. Зургадугаар сарын 2-нд Эрээнд халдварын тохиолдол бүртгэгдэж, хатуу хөл хорио тогтоож, үйлчилгээний байгууллагыг хязгаарласан. Гадаад харилцааны яамны авсан мэдээллээр тусгаарлалтын талбай руу орсон 200 гаруй чингэлэг, тус цэг рүү ороогүй 200 чингэлэг байна. Эрээнд цар тахал бүртгэгдсэн учраас

Хятадын дүрэм журмын дагуу 21 хоног хатуу хөл хориотой байх болов уу гэсэн таамаг байна. Ямартай ч одоогоор албан шийдвэр ирээгүй. 

Эрээн хотоос Монгол Улсад импортын бүтээгдэхүүний 70-80 хувь нь орж ирдэг. Хөл хориотой холбоотой чингэлэг тээврийг зогсоод тав хонож байна. Цаашид нарийн ногоо болон зайлшгүй шаардлагатай бүтээгдэхүүнийг хэрхэн оруулж ирэх вэ гэдгийг шийдвэрлэхээр ажиллаж байна. Төлөвлөгөөний дагуу хүсэлт өгсөн. Эрээн хотын шуурхай штабд тавьсан хүсэлтэд одоогоор хариу ирээгүй. Хэвийн нөхцөлд өмнө 70 хүртэлх чингэлэг оруулж ирдэг байсан бол одоо дээд тал нь 30 чингэлэг оруулж ирэх болсон. Тиймээс гаалийн бүрдүүлэлтийг шуурхай хийж, чингэлэг тээврийг хөл хориотой байсан ч оруулж ирэхийг зорьж байна. Замын-Үүдийн тээвэр зохицуулалт өнгөрсөн жил батлагдсан захирамжийн дагуу явж байгаа. Зам тээврийн дэд сайдын ахалсан ажлын хэсэг тус бүсийг хариуцаж ажиллаж байна. Хилийн тэг цэг рүү чингэлэг солилцохоор орж буй жолоочид бүгд халдварын дэглэм чанд сахиж байгаа. 2022 оны нэгдүгээр сараас эхлэн энэ журмын дагуу ажиллаж байна. Хилийн боомтын үйл ажиллагаа хэвийн явагдах эсэх нь ирэх долоо хоногт тодорхой болно гэж харж байгаа. Ганцхан хоногийн дотор 80 байсан халдварын батлагдсан тохиолдол 149 болж нэмэгдсэн. Тэгэхлээр шууд хариу өгөх боломжгүй.  Харилцан зөвшилцөж байж хилийн боомтын асуудлыг шийдвэрлэнэ" гэв.

Дунджаар 250-260 нүүрс тээврийн чингэлэг Шивээхүрэн боомтоор орж байна.

Харин экспортын гол түүхий эд болох нүүрс тээвэртэй холбоотой асуудлаар "Монгол Улсын нүүрсний экспортын хамгийн чухал боомт бол Шивээхүрэн-Сэхэ, Гашуунсухайт-Ганц модны боомт. Шивээхүрэн-Сэхэ боомтыг бид дипломат шугамаар Хятадын талтай ярилцсаны үр дүнд өнгөрсөн тавдугаар сарын 25-нд нээсэн. Энэ боомтоор өдөрт дунджаар 250-260 чингэлэг Шивээхүрэн боомтоор орж байна. Халдвар хамгааллын дэглэмээ сайтар сахиад явбал цаашид улам нэмэгдэх байх. Гашуунсухайт-Ганцмод боомт энэ сар гарснаас хойш 420 орчим тээврийн хэрэгсэл явж байна" гэх мэдээллийг өглөө.