2025 оны 10 дугаар сарын 9-ний өдөр, Хархорум хотын Захирагч Л. Халтар, “Эрдэнэс Монгол” нэгдлийн Гүйцэтгэх захирал С. Наранцогт нар хамтран ажиллах санамж бичигт гарын үсэг зурлаа.  Энэхүү хамтын ажиллагаа нь Монгол Улсын Ерөнхийлөгчийн 2022 оны 230 дугаар зарлигаар хэрэгжиж буй Орхоны хөндийд Хархорум хотыг сэргээн байгуулах үндэсний бүтээн байгуулалтын ажлын нэг чухал алхам юм. Хархорум хотын бүтээн байгуулалт 2025 оны 3 дугаар сараас албан ёсоор эхэлсэн бөгөөд хотын 2026 оны хөгжлийн төлөвлөгөөнд нэмэлт ажлуудыг хамтран хэрэгжүүлэх зорилттой билээ.

“Тэрбум мод” үндэсний хөдөлгөөний хүрээнд “Эрдэнэс Монгол” нэгдэл нь 778 га талбайд 536,000 мод тарих зорилт тавин ажиллаж байгаа бөгөөд хаврын тарилтаар 330,000 мод амжилттай тарьсан юм.

Санамж бичгийн хүрээнд “Эрдэнэс Монгол” нэгдэл нь Хархорум хотын “Их хаадын цэцэрлэгт хүрээлэн”-д 53 га талбайд нэмэлт мод, ногоон байгууламж тарихаас гадна, үерийн далан, суваг, хамгаалалтын бүтээн байгуулалтыг дэмжин хэрэгжүүлэхээр боллоо. “Их хаадын цэцэрлэгт хүрээлэн” нь өнөөдөр гадаад, дотоодын аялагчдын заавал зорьж үздэг соёлын ба экологийн цогцолбор болон хөгжиж байгаа бөгөөд энэхүү хамтын ажиллагаа нь Хархорум хотын тогтвортой хөгжлийн бодлогод чухал хувь нэмэр оруулах юм.