Улс төрийн ууган хүч болох МАН-ын тулаан машид ширүүсч, манай Монголын ард түмэн, улсаа боддоггүй унхиагүй гаруудыг улстөрчид гэдэг юм байна гэх ойлголттой болтлоо бужигнаж байна. Үнэндээ улстөрчид асуудлыг бус сандал, суудлыг шийдэхийн төлөө шаргуу шуурхай ажиллаж чаддаг юм байна. Эдийн засгийн нөхцөл хүнд, улсын төсвийг батлах хугацаа давчуу байхад улстөрчилт чухал хэмээн байнгын аижллагаатай парламентын ажиллагааг саатуулан гүйцэтгэх засаглалын сайд нар хэвлэлийн хурал зарлахаар ордны хонгилоор жоорогнолдохыг ч харлаа.

Эхлэл нь эртнээс улбаатай энэ дажин ид өрнөж байна. Үргэлжлэл нь хэд хоногийн дараа тэгсгээд дуусна гэж таамаглах аргагүй болтлоо сэдэрчихлээ. Үерийн ус мэт... МCS-ээс Ухаа худгийг авах хүсэлт таг болох аргачлал болох ажиллагаа ч эхэлчихлээ.

Шуудхан хэлэхэд Засгийн газар өчигдөр хуралдаж, нүүрсний гэх нүгэлтэй их мөнгө яригддаг нууц гэх тодотголтой гэрээнүүдийг ил болголоо. Уг илчлэгдсэн 38-н гэрээний 32-ыг нь Бодь групптэй хийжээ гэхтэй зэрэгцэн, парламентын тогтвортой байдал, MCS-ээс Ухаа худгаа авах, МАН-ын дарга хэн болох, манай гүйцэтгэх засаглалын тэргүүнийг огцруулах асуудал ч мартагдаж, арйа л их дэндүү их мөнгө хөрөнгө идсэн тухай сошиалаар шуугиад эхэллээ.

 Гэхдээ уг гэрээний тухайд эдийн засагчид уг гэрээнүүдийн утга нь Бодь групп Гашуун сухайт чиглэлд төмөр зам тавина. Төлбөрт нь нүүрс авах тухай байна. Төмөр замаа ч барьсан, нүүрсээ одоо авч тээвэрлэлт ч эхэлчихсэн. Тоючхондоо ажил гүйцэтгэсэн, гүйцэтгэлийн төлбөрөө авч эхэлсэн тухай л асуудал гэх тайлбарыг өгч байна.

Харин гэрээг нууцад авсны учир нь Монгол Улсын эдийн засгийн гол тулгуур экспорт болох нүүрсний тээвэрлэлтийн хүчин чадалд эрс ахиц гарах стратегийн ач холбогдол бүхий үр дүн хүлээгдэх учраас элдэв эрсдэлээс сэргийлсэн хэрэг гэх юм билээ.

Өөрөөр хэлбэл нүүрсний экспорт дахь ноёрхлоо алдахгүйг хичээсэн хувийн хэвшлийн хоёр том групп эр эмээ үзэж, МАНАН-таж хутгалдсан манай улстөрчид МАН, АН гэлтгүй бужигналдаж гүйгээд байгаа нь л тодорхой боллоо. Гэхдээ гэрээг нууцад авах цаг үед Х.Баттулга, У.Хүрэлсүх, Г.Занданшатар гурав ҮАБЗ-ийн гишүүн байсныг битгий мартаарай.

З.Урсгал