МАН-ын Удирдах зөвлөлийн гишүүн М.Оюунчимэгээс цөөн зүйлийг тодрууллаа. 

-Бага хурлын уур амьсгал ямар байна вэ. Хоёр нэр дэвшигч дээр санал хураалгах нь гэж ойлгосон?

-Өглөө 10 цагаас Удирдах зөвлөл хуралдсан. Одоо Бага хурал хуралдаж байна. Хуралдаанаар хэлцэгдэж буй асуудал бол зөвхөн МАН-ын дотоод асуудал биш. МАН эрх барьж буй нам. Тэр утгаараа улс орны нийгэм, эдийн засаг, геополитек, улс орны аюулгүй байдал гээд чухал асуудлуудтай холбоотой учраас нухацтай хандаж, шийдлээ гаргах байх. Удирдах зөвлөлийн зүгээс Г.Занданшатар даргыг парламент дахь намуудтайгаа ойлголцохоос гадна улс орны өмнө тулгарч буй асуудлуудыг шийдэх чадамжтай гэж үзээд Бага хуралд оруулж ирсэн. Бага хурлаас Г.Тэмүүлэн гишүүн өөрийнхөө нэрийг дэвшүүлж, заалнаас Д.Амарбаясгалан, С.Нэргүй хоёрын нэр дэвшүүлсэн ч нэрээ татсан. Тиймээс одоо Г.Тэмүүлэн, Г.Занданшатар гэсэн хоёр хүн дээр санал хураалт явагдах гэж байна.

Бага хурлын гишүүдийн хувьд багцлагдсан, хайрцаглагдсан гэх ч юм уу тийм асуудал байхгүй байна. Өнөөдөр улс орны эдийн засгийн нөхцөл ямар байгаа билээ. Тэр ч утгаараа Бага хурлын гишүүд маш нухацтай асууж байна.

-Тухайлбал?

-Эдийн засгийн асуултууд их байна. Татвартай холбоотой асуудлуудаас гадна цаашид Засгийн газраа бүрдүүллээ гэхэд хэрхэн ажиллах юм бэ гэхчлэн 39 гишүүн асуулт асууж, нэр дэвшигчид маань хариулт өглөө.

-МАН-ын гишүүдийн зүгээс эвсэлийн Засгийн газар байгуулах хүсэлт хүргүүлсэн. Энэ талаар яригдав уу?

-Өмнөх Бага хурлаар АН-тай хамтрахгүй гэсэн шийдвэр гаргасан. Энэ шийдвэрээ өөрчлөхгүй, хэвээрээ байгаа. Өнөөдрйин тухайд Ерөнхий сайдад нэр дэвшүүлэх тухай асуудал л хөндөгдсөн.

-Санал хураалт нууцаар явагдах уу?

-Тэгнэ. Хоёр нэр дэвшигч байга учраас цаасаар явагдана.

-УИХ-ын дарга Д.Амарбаясгалан нэрээ татах болсон шалтгаанаа юу гэж тайлбарлав?

-Парламентын гишүүн, даргын хувьд ажлаа хийх нь зөв. Нөгөөтэйгүүр Удирдах зөвлөлийнхөө шийдвэрийг хүндэтгэж байгаа учраас нэрээ дэвшүүлэхгүй гэсэн. Түүнээс гадна Бага хурлын гишүүд эдийн засгийн чиглэлийн асуулт их асуусан. Нэр дэвшигчдийн хувьд ч татварын асуудалд анхаарлаа хандуулж, иргэн, аж ахуйн нэгж дээр нэмэгдсэн татварын дарамтыг буруулах тал дээр анхаарч ажиллахаа илэрхийлсэн.

-Л.Оюун-Эрдэнэ Бага хуралд оролцож байгаа юу. Байр сууриа илэрхийлсэн байх?

-Оролцож байгаа. Ерөнхий сайд маань Бага хурал дээр ч, Удирдах зөвлөл дээр ч  Г.Занданшатарыг дэмжиж, нэр дэвшүүлж байна гэж уншиж танилцуулсан.

-Г.Занданшатар дэмжлэг авбал намын дарга солигдох уу?

-Намын даргын асуудлыг намын Их хурлаар шийднэ. Зөвхөн Ерөнхий сайдаа томилоод Засгийн газраа хурдан ажилд нь оруулах тухай асуудал л яригдсан. Хамтрах эвсэх тухайд шинээр томилогдох Ерөнхий сайд нь мэдэж танилцуулах байх.