Ковид-19 цар тахлын үеэр маск буюу амны хаалтын үнэ огцом тэнгэрт хандаж, 250 төгрөгийн маск 20 мянгад хүрч байв. Гэвч тун удалгүй хэт хөөрөгдсөн үнэ газартаа бууж хэвийн болсон. Өдгөө зах зээл дээр N95 амны хаалтын үнэ 1100-1500 төгрөгөөр худалдаалагдаж буй.  

Гэтэл “Монголросцветмет” ТӨҮГ нь “Монгол Маск Эрдэнэт” ХХК-тай 317 сая 755 мянган төгрөгөөр гадуур хамгийн үнэтэйдээ 1500 төгрөгөөр худалдаалагдаж байгаа N95 амны хаалтыг нэг ширхгийг нь 3315 төгрөгөөр буюу зах зээлийн ханшнаас гурав дахин өндөр үнээр худалдан авсан байна. Ингээд ч зогсохгүй төсвийн хэмнэлтийн тухай,  төсвийг захиран зарцуулах зэрэг хуулиудыг зөрчин склад нөхцөл буюу нөөцлөхөөр худалдан авсан аж.

Тодруулбал, 2023.03.20-ны өдөр “Монголросцветмет” ТӨҮГ-ын захирал Б.Мөнхбат нь “Монгол Маск Эрдэнэт” ХХК-ийн захирал Б.Хүрэлбаатартай МРЦМ/202312405 дугаар бүхий Бараа худалдах, худалдан авах гэрээг байгуулжээ.

Тус гэрээний 3 дахь заалтад “Захиалагч нь барааны нийлүүлэлтийг 317,765,55,00 төгрөгийн өөрийн хөрөнгөөр санхүүжүүлнэ. Нийлүүлэгч бараа нь техникийн тодорхойлолтын дагуу доорх хүснэгтэд заасан тоо, ширхэг, үнээр INCOTERMS 2020 DDP- Бор-Өндөр УБҮ-ийн склад нөхцөлөөр гэрээ байгуулагдсанаас бараа нийлүүлэлтийн хуваарийн дагуу нийлүүлнэ. Санхүүжилтийг нийлүүлэгдсэн барааны хэмжээгээр хийнэ” хэмээн заасан байна.

Мөн үүнээс гадна 2024.03.08-ны өдөр хийгдсэн Бараа худалдах, худалдан авах гэрээнд 74 сая төгрөгөөр хорголж худалдан авах гэрээ хийсэн нь ашиг сонирхлын зөрчилтэй гэх хардлагыг төрүүлж байгаа юм. Ийнхүү илтэд хууль зөрчсөн үйлдлүүдэд АТГ болон хууль хяналтын байгууллага шалгаж хариуцлага тооцох уу?