Улсын эдийн засгийн гол тэтгэх хүч болсон Өмнөговь аймагт улс төржилт хэрээс хэтэрч, төр захиргааны байгууллага нь “төрлийн алба” болоод удаж байгаа талаар бид “УЛС ТӨРЧДИЙН УРГИЙН МОД” буландаа хөндсөн.

Мэдээллийг энд дарж үзнэ үү. Тэгвэл Р.Сэддорж тэргүүтэй аймгийн “хурган дарга” нарын эл үйлдлийг нутгийн иргэд шүүмжилж, Засгийн газарт гомдол хүргүүлж байжээ.

Тодруулбал, Өмнөговь аймгийн иргэд Засгийн газрын хэрэг эрхлэх газарт аймгийнхаа төр захиргааны байгууллага, Засаг даргын тамгын газрын нөхцөл байдал, хууль бус томилгооны талаар өргөдөл, гомдол хүргүүлжээ.

Уг өргөдөлд, “Аймгийн Тамгын газрын даргаас эхлээд газар, хэлтэс, албаны дарга, мэргэжилтнүүд бүгд төрийн жинхэнэ албан хаагчийн нөөцөд бүртгэлгүй, холбогдох хууль, ажлын байр, албан тушаалын тодорхойлтод заасан тусгай шаардлагыг хангаагүй, сонгон шалгаруулалтгүй томилогдсон” гэдгийг дурьджээ.

Энэ дагуу Засгийн газрын хэрэг эрхлэх газрын дарга Ц.Нямдорж өнгөрөгч 2021 оны наймдугаар сарын 23-ны өдөр “Хууль хэрэгжүүлж ажиллах тухай” албан тоотыг Засаг дарга Р.Сэддоржид хүргүүлсэн байдаг. Гэвч үүнээс хойш байдал дээрдэх нь битгий хэл хууль бусаар томилсон Тамгын газрын дарга Ц.Амартөгс нь ажилласан хэвээр, түүний халаа, сэлгээг үргэлжлүүлсээр байна.

Хамгийн хачирхалтай нь, Засгийн газрын хэрэг эрхлэх газрын дарга Ц.Нямдорж Р.Сэддоржид анх удаа албан тоот хүргүүлээгүй байдаг. Яг дөрвөн сарын өмнө буюу 2021 оны дөрөвдүгээр сарын 5-ны өдөр мөн л албан тоот илгээн, анхааруулж байж.

Тус тоотод “Аймгийн төр захиргааны байгууллагын зарим албан хаагчийг сонгон шалгаруулж, томилох үйл ажиллагаа, хүний нөөцийн удирдлагын шийдвэрт хяналт шалгалт хийж, Төрийн албаны зөвлөлийн 2021 оны 18, 44, 70 дугаар тогтоолоор аймгийн Засаг даргын Тамгын газрын дарга, Хөрөнгө оруулалт, хөгжлийн бодлого төлөвлөлтийн хэлтсийн дарга, Орон нутгийн өмчийн газрын дарга, Баяндалай сумын Засаг даргын Тамгын газрын дарга зэрэг албан тушаалд томилогдсон нэр бүхий иргэдэд холбогдох хууль бус шийдвэрийг хүчингүй болгох арга хэмжээг авч, шийдвэрийн биелэлтийг ирүүлэх, хугацаатай үүрэг даалгаврыг өгч байна. Өнөөг хүртэл дээрх үүрэг даалгаврын биелэлт хангагдаагүй, хууль зөрчсөн томилгоо үргэлжилсээр байна. Хууль бус томилгоотой холбоотой зөрчлийг арилгаж, тогтоосон хугацаанд хариу мэдэгдэхгүй бол Төрийн албаны тухай хуулийн 32.7-д заасны дагуу Таныг үүрэгт ажлаас чөлөөлөх хууль зүйн үндэслэл бүрдэхийг сануулж мэдэгдье..” хэмээжээ.

Өөрөөр хэлбэл, хууль бус томилгооны эзэд болох дээрх газрын удирдлагуудыг томилсон шийдвэрээ хүчингүй болгохыг, эс бөгөөс хууль зөрчсөн Р.Сэддоржийг өөрийг нь чөлөөлнө гэдгийг ч сануулсан байдаг. Гэвч энэ сануулга түүнд огт нөлөөлсөнгүй.

Арга ч үгүй болов уу. Нутгийн иргэд нь балчирдаад, “үг хэл”-ийг нь ойшоож сонсохгүй байгаа “том дарга”-д төр, засгийн энэ мэт шийдвэр, сануулга бол үлгэр мэт санагдах нь гарцаагүй.

Нэг хачирхалтай нь, Засгийн газраас албан тоот ирэхээр хууль бус дарга нараа ажлаас чөлөөлсөн дүр эсгэж, “зайлуулан” дэвшлүүлэх технологи ашигладаг гэнэ. Юу гэхээр, тэрбээр Засгийн газарт “Ажлаас нь чөлөөлж, алдаа дутагдлаа арилган, хууль хангуулан ажиллаж байна” гэх утга бүхий бичиг илгээчихээд хэд хоногийн дараа ажлаас чөлөөлсөн хууль бус томилгооны эздээ өөр албанд томилдог гэдгийг нутгийн иргэд хэлж байна.

Монголын толгой баячуудын нэг Д.Бат-Эрдэнийн бизнесийг орон нутагт хөгжүүлж, хөхиүлэн дэмжигч гэгдэх Засаг дарга Р.Сэддорж нутагтаа бол “Засгийн газраас ч том дарга” нь үнэн ажээ. Дээрээ төргүй, дэргэдээ түмэнгүй мэт аашилж байгаа Өмнөговийн удирдлагуудын энэ мэт хууль бус томилгооны асуудал хэрхэн шийдэгдэж, гольдролдоо орох эсэх нь нутгийн иргэдийн анхаарлын төвд байна.