Засгийн газрын өнөөдрийн хуралдаанаас гаргасан шийдвэрийг Зам, тээврийн хөгжлийн сайд Л.Халтар мэдээлэл хийсэн. Энэ үеэрээ сэтгүүлчдийн асуултад хариуллаа.

- БНХАУ чингэлэг тээврээр мөнгө угаасан хэргээр Эрээн боомтын хил гаалийн удирдлагуудыг баривчилсан. Энэ хэрэгт Монголын талаас таны нэр холбогдсон гэх мэдээлэл байна. Үүнд тайлбар хэлэхгүй юу?

- Эрээн дэх хил гаалийн хүмүүсийг барьсан болон шалгаж байгаа гэдэг мэдээллийг би цахимаар олж харсан. Албан ёсоор бол тийм мэдээлэл аваагүй байна. Харин Гадаад харилцааны яамнаас энэ тухай лавлаж болох л байх. Нарийн учрыг мэдэхгүй. Намайг холбон шалгаагүй.

Намайг ямар байдлаар хил гаалийнхантай холбоотой гэж хэлж байгааг мэдэхгүй байна. Надад идсэн, уусан зүйл байхгүй учраас хэзээ ч, хаана ч шалгуулахад нүүр бардам байна.

- Таны хамаарал бүхий хүн тээвэр зуучийн компанитай гэсэн мэдээлэл байна.

- Тэгж яриад байдаг юм. Хөрөнгө орлогын мэдүүлэгт тийм зүйл байхгүй.

- Ачаа тээврийн үнэ хоёр дахин өссөний цаана маш том авлигын сүлжээ байна гэдгийг Хятадын тал илрүүлчихлээ. Үүнд манай талын албаны хүмүүс холбоотой гэх хардлага бий. Үүнтэй холбоотой асуудлыг салбар яам зайлшгүй анхааралдаа авах шаардлагатай байх. Та байр сууриа илэрхийлэхгүй юу?

- Тийм хардлага нийгэмд байгааг огтхон ч эсэргүүцээгүй. Гэхдээ шалгадаг хүн нь би биш. Үүнийг цагдаа, тагнуулын байгууллага шалгах нь зүйтэй байх. 

Бид өнгөрсөн оны эхэнд хаагдсан хилийг гурван сар гаруйн дараа нээсэн явдал нь хамгийн чухал байсан.

Түүний дараа Хятадын талаас ганцхан зүйл тавьсан нь хүн хоорондын харилцааг бий болгохгүйн үүднээс дундын бүсэд чингэлгийг буулгаж ачдаг систем рүү орох. Тухайн үед Монголын талд хилээ нээх л асуудал нь хамгийн чухал байсан учраас түүнийг нь хүлээн зөвшөөрч, хил нээгдсэн.

Түүний цаана Хятадын талд юу нуугдаж, ямар авлига үүссэн болон ямар тохироо байсныг харамсалтай нь би мэдэхгүй.

Мөн тэрбээр "Тодорхой хугацааны дараа нүүрсний уртын тээвэр эхэлнэ. ГХЯ болон холбогдох байгууллагууд Хятадын талтай тохирсон. Цагаан хаднаас тээвэрлэнэ. Мөн Шивээ Хүрэнгээс тээвэр эхэлнэ. Урд хөрш ковидын халдвар хамгааллаа хатуу сахихыг л шаарддаг. Иймд жолооч нар сайтар анхаарч, халдвар авахгүй байх нь чухал. Одоо харахад та бүхэн ч амны хаалт зүүгээгүй байна.  Халдвар хамгааллын дэглэмийг өмнөхөөс ч илүү сахих шаардлагатай. Учир нь нүүрсний уртын тээврийг дахин хаахыг ч үгүйсгэхүй.

Хаагдсан хилээ бид гурван сарын дараа нээлгэсэн. БНХАУ дундын бүсэд чингэлэг буулгах санал тавьсны дагуу бид энэ ажлыг хэрэгжүүлсэн.

Задгай тээврээс нүүрсийг чингэлгээр тээвэрлэх болсноор үнэ өссөн гэдэг. Эрээний тээвэр зуучийн компаниудын хэлсэн үнээр тэвээр хийж байгааг Бээжин дэх ЭСЯ, Консулын газраар дамжуулан уламжилсан. Мөн сугалаа явуулсан нь үнэ хөөрөгдсөн. Цар тахлын хатуу үетэй харьцуулбал Хятадын талаас тавьдаг шаардлага буурсан. Тус улс зөөлөн бодлого явуулж эхэллээ. 

Тээврийн үнэ буурахыг би мэдэхгүй. Ачаа илгээгч, хүлээн авагчийн хооронд л шийдэх асуудал юм.

Энэ долоо хоногт дахин нэг боомтыг нээснээр дөрвөн боомтоор нүүрс гаргаж эхэлнэ. Цагаан хадан дахь нүүрсний үлдэгдэл буурсан тул уртын тээвэр эхэлж байна. Энэ бол жолооч нарт сайхан мэдээ.

Энэ онд нийт 36 сая тонн нүүрс худалдахаар төлөвлөсөн. Энэ тоонд хүрэх, эсэхийг одоо хэлж мэдэхгүй байна. Булган боомтоор гаргадаг нүүрс өссөн. БНХАУ нүүрсний татвараа тэглэсэн тул татан авалт өсөх болов уу гэж найдаж байна. 

БНХАУ-таa агаарын тээврийн нислэгийг сэргээх асуудлыг бид өнөөдөр Засгийн газрын хуралдаанд танилцуулав. 26 сарын өмнө энэ үйлчилгээ зогссон. Шанхай, Бээжингээс бусад хотууд руу долоо хоногт нэг удаа нисэх зөвшөөрөл олгосон. Иймд МИАТ Гуанжоу руу, "Аэро Монголиа" Хөх  хот руу нислэг үйлдэх болов. Иргэний нисэхийн ерөнхий газар бэлтгэлээ базаана.

Манай иргэд эдгээр нислэгээр явбал очоод тусгаарлалтад орох, эсэхийг удахгүй  тодорхой болгоно.

МИАТ энэ онд хэдий бага ч ашигтай ажилласан. Европын орнууд руу карго тээврийг сайн хийсэн. Тус компанийн Франкфурт чиглэлийн нислэгт л 4 тэрбум төгрөгийн татаас олгоно. Учир нь энэ нислэгээр жуулчид авчрах зорилготой. Хэрэв онгоцны дүүргэлт өндөр байж,  олон жуулчин ирвэл төрөөс татаас олгохгүй" гэв.