Засгийн газрын өнөөдрийн хуралдаанаас гарсан шийдвэрийн талаар Зам тээврийн хөгжлийн сайд Л.Халтар, БШУ-ны сайд Л.Энх-Амгалан нар сэтгүүлчдэд мэдээлэл өглөө. 

Энэ үеэр Цахим хөгжил, харилцаа холбооны яамны Төрийн нарийн бичгийн дарга Б.Болор-Эрдэнэ мөн сэтгүүлчдэд дараах мэдээллийг өгсөн юм.      

Тэрбээр “Манай улсын кибер аюулгүй байдал эмзэг байгааг нуухгүй. Манай улс 2021 оны сүүлээр түүхэд анх удаа Кибер аюулгүй байдлын хуулиа баталсан. Энэ хуулиар кибер аюулгүй байдлын тогтолцоо бүрдсэн. Гэхдээ хуультай болсноор тогтолцоо өөрөө бүрдэхгүй, нэг байгууллагад хариуцуулаад ч үр дүнд хүрэхгүй. Иргэд олон хаягтаа нэг л нууц үгийг ашиглаж, цахим халдлагад өртсөөр байна. Иргэдийн мэдээллийн аюулгүй байдлын суурь боловсролд анхаарах шаардлагатай. Кибер аюулгүй байдлын хууль энэ сарын 1-нээс хэрэгжиж эхэлсэн.

Энэ дагуу иргэдээс хурууны хээ авсан байгууллагуудын өгөгдлийг устгаж байна.  

Эмнэлгүүд, банкууд иргэдийн их хэмжээний мэдээллийг авдаг. Төрийн байгууллагуудын дундаа хэрэглэдэг ХУР, ДАН системүүдийг шинэчилж байна. Эрүүл мэндийн салбар их онцлогтой. Том системүүд ашигладаг. Иргэд И-Монголиагаас эрүүл мэндийн үзүүлэлтүүдээ хардаг болно. Энэ төслийг Дэлхийн банкны  19 сая ам.долларын санхүүжилтээр хөгжүүлж байна.      

Тоон гарын үсгийг иргэд идэвхтэй авч байна. Энэ сарын 1-нээс хойш 80 мянган иргэн авсан. Эдгээр иргэд гэрээ хэлцэл хийх, банкнаас зээл авахдаа биеэр очих шаардлагагүй болно. Мөн цахим орчинд өөрийгөө баталгаажуулах давуу талтай. Өмнө нь заавал биеэр очиж, хурууны хээ уншуулах шаардлагатай байсныг халсан.  

Тоон гарын үсэг авсан иргэдийн үндэсний цахим шууданг долдугаар сарын 1-нээс олгож эхэлнэ. И-Монголиа платформд цахим шуудан үндэслэнэ. Иргэд төрийн байгууллагуудтай энэ хаягаараа шууд харилцан, өргөдөл бичиж болно.  Европын орнуудад энэ үйлчилгээг амжилттай нэвтрүүлсэн.

Үндэсний и-мэйлийг ашигласнаар иргэдийн цахим боловсрол нэмэгдэнэ.  

Улсын бүртгэлийн байгууллагууд болон нэг цэгийн үйлчилгээ үзүүлдэг газруудаас тоон гарын үсэг авч болно. Ирэх сараас худалдааны төвүүд, захуудад Улсын бүртгэл болон манай байгууллагын ажилтнууд ажиллана. Тэд амралтын өдөр захуудаар үйлчлүүлэх иргэдэд тоон гарын үсгийг танилцуулна.

Өнөөдрийн байдлаар улсын 660 үйлчилгээ цахимжжээ. Иргэдээс 1111 төв илгээсэн, хамгийн их гомдолтой холбоотой үйлчилгээг түрүүлж цахимжуулдаг” гэв.