Энэ жил буюу 2022-2023 онд анх удаа цэцэрлэгийн бүртгэлийг гурван үе шаттайгаар цахимаар зохион байгуулж байна. Энэ талаар БШУЯ-аас өнөөдөр  мэдээлэл хийлээ.

Боловсролын ерөнхий газрын дарга Т.Ням-Очир “Нэгдүгээр шатны цэцэрлэгийн бүртгэлд 113654 хүүхдийг Нийслэлийн боловсролын газрын даргын баталсан хамран сургах тойргийн дагуу цэцэрлэгүүдэд хуваарилсан. Тухайн хүүхдэд хамгийн ойр байх боломжтой хороонд хамрагдах боломжтойгоор зохицуулалт хийсэн. Хоёрдугаар шатны бүртгэлийг хаахаас өмнө гаргасан тооцооллоор нийт хүүхдийн 88362 хүүхэд төрийн өмчийн цэцэрлэгт, 25292 хүүхэд хувийн хэвшлийн цэцэрлэгт хуваарилагдсан байгаа.

Хувийн хэвшлийн цэцэрлэгүүдэд ачаалал өндөр байршилд хамран сургах тойргийн хүүхдийг элсүүлэх гэсэн аргачлалын дагуу хувьсах зардлыг олгосон. Урьдчилсан байдлаар 12000 гаруй хүүхдийн хувьсах зардлыг, үдийн цайны хамт цэцэрлэгүүдэд шийдэж өгсөн байгаа.

Зарим цэцэрлэгүүд бүрэн хүчин чадлаараа элсэлт авч чадаагүйтэй холбоотойгоор хоёрдугаар шатны бүртгэлд хувийн цэцэрлэгүүдэд хуваарилах ажил үргэлжлүүлэн хийсээр байна.

Хоёрдугаар шатны бүртгэлийн баталгаажуулалт болон эцэг, эхчүүдэд мэдээлэл очих үйл ажиллагааг энэ сарын 27-30-ны хооронд зохион байгуулсан. Нэгдүгээр шатны бүртгэлд бүртгүүлсэн 3970 хүүхэд хүсэлтээ цуцлан дахин хоёр дахь шатанд хүсэлтээ ирүүлсэн.

Арав гаруй байршилд орчин үеийн гэр бүхий шийдэлтэй “Гэр цэцэрлэг” байгуулан 2000 гаруй хүүхдийг хамруулахаар ажилласан байгаа.

Эхний 100 хүүхдийн орчин үеийн шийдэл бүхий гэр цэцэрлэг буюу Сонгинохайрхан дүүргийн 271-ээр цэцэрлэг ашиглалтад орон, хүүхдүүдээ элсүүлсэн.

Тухайн цэцэрлэгийг 647,3 сая төгрөгөөр барьж гүйцэтгэсэн. Мөн 125 түрээсийн байрыг ашиглаж болно гэсэн сайдын тушаал авсан. Аравдугаар сарын 14 гэхэд тоног төхөөрөмжийн асуудал бүрэн шийдэгдэнэ.

Гуравдугаар шатны цэцэрлэгийн бүртгэл аравдугаар сарын 10-аас эхлэн үргэлжилнэ.

Цэцэрлэг болон ерөнхий боловсролын үдийн цай 2023 оны төсвүүд дээр саналууд нь тусгагдсан.

Хамран сургах тойргийн бус хүүхэд гэсэн ойлголт байхгүй болж байгаа. Харин түр оршин суугч буюу шилжин ирсэн хаягаа баталгаажуулж чадаагүй хүмүүст асуудал гарч байгаа. Үүнийг тухайн цэцэрлэг сургуультай ярилцан иргэн талдаа шийдвэрлэж байна.