Багш нар цалингаа 3,5 сая төгрөгт хүргэхийг шаардаж байна. Засгийн газар мөнгө байхгүй, хамаг урсгал зардлаа танаад ч оноос өмнө буюу 11, 12 дугаар сард 26 хувь, он гараад 50 хувь нэмье гэх санал засгийн газрын хэмжээнд яригдаж байна. Харин багш нар 3,5 сая болго, хэлэлцээр албажаагүй цагт ажил хаялтаа зогсоохгүй гэсэн байр сууриа хатуу хамгаалсаар 13 дахь хоногтойгоо золгов.

Улстөрчид буюу УИХ-ын гишүүд цай кофендоо 1,2 тэрбум төгрөг зарцуулдаг гэх тооцоо дуулдах ч багш нар хичээлд хэрэглэх бичгийн цаасаа хүртэл өөрийнхөө халааснаас гаргадаг тухай хэн ч ярихгүй байна. Харин ч бодлогоор захиалгаар багш нар аижл хаялтаа зогсоо, хүүхдүүд хохирлоо гэх мессежийг олон нийтийн сүлжээгээр харваас зохион байгуулалтайгаар өргөн хүрээгээр түгээж эхэллээ.

Мэдэх үү, багш нар тэр дундаа цэцэрлэг болон бага ангийн багш ямар нөхцөлд ажлаа хийдгийг... Боловсролын яамны гаргасан судалгаагаар багш нар үндсэн ажлаасаа гадна олимпиадад бэлтгэх, олон нийтийн арга хэмжээ зохион байгуулах, аймаг, сумын удирдлагын илтгэл бэлтгэх, дэвтэр засах, тайлан мэдээ гаргах зэрэг бичиг цаасны 419 ажил хийдэг гэсэн. Ялангуяа бага ангийн болон цэцэрлэгийн багш нар цаг наргүй ажилладаг хэрнээ илүү цагийн цалин авдаггүй.

Өнөөдрийн байдлаар улсын сургуульд хамгийн олон хүүхэдтэй бүлэг нь нэг, хоёрдугаар ангийнхан бөгөөд дунджаар нэг багшид 50 орчим хүүхэд оногддог. Цэцэрлэг ч ялгаагүй 50-60 хүүхэдтэй ажилладаг. Өөрийнхөө ганцыг яая гэдэг иргэн та өдөрт бага насны 50 хүүхэдтэй тулж ажилладаг багшийн хөдөлмөрийг үнэлэх гээд үзээрэй. Тиймдээ ч өдөржин хүүхдийн шуугиан дунд ажилладаг бага анги болон цэцэрлэгийн багш нар мэдрэлийн ядаргаанд өртөх эрсдэл, магадлал бусад мэргэжилтнүүдийг бодвол өндөр байдаг болохыг мөн л боловсролын яамны хийсэн судалгааны дүнгээс харж болно.

Эргэн сануулахад эдүгээгээс яг 30 жилийн өмнө буюу 1995 онд Монгнолын багш нар анх удаагаа ажил хаяж, нийслэлийн сургуульд нэгдэн яг 143 хонож байсан түүх бий.  143 хоногийн ажил хаялтын эцэст Засгийн газар багш нарын саналыг хүлээн авч асуудлыг шийдсэн байдаг юм. Энэ удаа ч гэсэн багш нарын тэмцэл үр дүнд хүрэх ёстой. Эхнйи ээлжинд бага ангийн болон цэцэрлэгийн багш нарын цалинг 3.5 сая болгож, бусад багш нарын цалинг яг тодорхой цаг хугацаанд нэмэгдүүлэх зам, боломж бий.

Ямартай ч УИХ дахь МАН-ын бүлгийн хуралдаанаас гаргасан шийдвэрийг танилцууллаа. Төсвийн байнгын хорооны дарга Х.Ганхуяг,  "Цалин нэмэхийн тулд урсгал зардлыг 1.1 их наяд төгрөгөөр бууруулах шаардлага үүссэн. Төсвийн ерөнхийлөн захирагч нарын төсвийг 10-13 хувиар, УИХ-ын гишүүдийн дотоод зочин хүлээн авах зардал болон аялал жуулчлалын салбарын татаасыг бууруулсан. Харин хөрөнгө оруулалтын зардлаас эрүүл мэнд, боловсролын салбараас бусад салбарын тоног төхөөрөмжийн зардлыг 50 хувиар бууруулсан" гэх мэдээллийг өглөө.

Харин бүлгийн дарга Ж.Батжаргал, “2026 оны улсын төсвийг хэлэлцүүлэгт бэлтгэх ажлын хэсгийн мэдээллийг сонсож, тодорхой шийдвэр гаргалаа.  Багш нарын цалинг энэ оны арваннэгдүгээр сарын 1-нээс үндсэн цалинг 2.8 сая, эмч нарын цалинг ирэх оны нэгдүгээр сарын 1-нээс эхлэн 15 хувиар нэмэгдүүлэх тооцоолол, судалгаа хийлээ. Мөн ахмадуудын тэтгэвэр, нийгмийн халамжийн тэтгэврийг 8.6 хувиар өсгөхөөр төсөвт тусгуулсан" гэв. Өөрөөр хэлбэл он гарч нэмэгдээд ч багш нарын шаардсан 3,5 саяд хүрэхгүй нь... Ахиад хэлье, бага анги болон цэцэрлэгийн багш нарын цалин бусад мэргэжлийн багш нарынхаас ядаж 500 мянгаар илүү байх ёстой... Ажлын ачаалал алс ирээдүйгээ харсан ч тэр. Тэгж байж л сурлага сайтай сурагчид цэцэрлэг, бага ангийн багшийн мэргэжлээр суралцан, балчир үрсийн хүн болох, боловсрол эзэмших суурь зөв, сайн тавигдана.