Монгол Улсад хүчин төгөлдөр мөрдөгдөж буй хууль дүрэм журмыг зөрчиж байж магадгүй нэгэн Хятад хоолны газрын талаарх сурвалжлагыг цувралаар хүргэснээр одоогоор үүдээ хаачихаад байгаа. Ша Шянь зууш хэмээх нэртэй тус газарт үйлчлүүлсэн иргэний гомдол мэдээллийн дагуу хамгийн анхны сурвалжлага бэлтгэн хүргэснээс хойш даруй нэг сар орчмын хугацаа өнгөрчээ. Бид тухайн үед иргэний  өгсөн баримт мэдээллийн дагуу цагдаагийн байгууллагад шалгуулахаар хүсэлт гаргасан юм. Харин тус байгууллагын зүгээс хэргийг хааж шийдвэрлэлээ, манай цагдаагийн байгууллагаас шалгах асуудал биш байна гэх хариу тайлбарыг өгч, хаалгахаар прокурорын байгууллага руу шилжүүлсэн гэх тайлбарыг өгсөн билээ.

Харин прокурорын байгууллагын зүгээс хэргийг дахин шалгахаар Татварын ерөнхий газар руу шилжүүлсэн байна. Өөрөөр хэлбэл хэргийг үргэлжлүүлэн шалгаж эхэлсэн гэсэн үг.

Ташрамд сануулахад, Сүхбаатарын талбайн чанх урд, Чойжин ламын музейн зүг харууцтай Ша Шянь зууш хоолны газрын зөвшөөрлийн бичиг баримт нь газар нь “Өмгөөллийн Монгол өмгөөлөгч” ХХН-ийн нэр дээр 15 жилээр эзэмших эрхтэй байгаа юм. Өөрөөр хэлбэл, Ша Шянь зууш хоолны газар “Өмгөөллийн Монгол өмгөөлөгч” ХХН-өөс түрээслэсэн гэсэн үг.  OPEN DATA сангаас харахад “Өмгөөллийн Монгол өмгөөлөгч” ХХН нь 2006 оны хоёрдугаар сарын 22-нд үүсгэн байгуулагдсан бөгөөд тус нөхөрлөлийн захирлаар хамгийн сүүлд 2024 оны зургадугаар сарын 24-нд иргэн Загдсүрэнгийн Сүхбаатарыг бүртгэсэн  байна. 

Тодруулбал,  тус компани нь 2018 ёоны наймдугаар сарын 20-ны өдөр Төрийн худалдан авах ажиллагааны газар бүртгүүлснээс хойш нийт 22 удаа тендерт оролцож, 12 удаад нь шалгарч байсныг tender.gov.mn сайтаас харж болно. Хамгийн сүүлд буюу 2025 оны долдугаар сарын 31-ний өдөр OPEN DATA дахь шинэчлэгдсэн мэдээллээр үйл ажиллагаа нь 6910 кодтой Өмгөөлөл, хууль зүйн зөвлөгөө өгөх гэсэн ганцхан чиглэлтэй байгаа юм. Түүнчлэн З.Сүхбатарн ь Монголын өмгөөлөгчдийн холбооны даргаар ажилладаг аж.   

Өөрөөр хэлбэл, өмгөөлөх үйлчилгээ үзүүлэх зөвшөөрлөөр өнөөдөр стандартын бус орчинд Монгол Улсад хүчин төгөлдөр мөрдөгдөж буй хууль тогтоомжийг зөрчин хүнсний худалдаа, үйлчилгээ явуулах боломжийг Ша Шянь зууш хоолны газарт олгосон байх магадлал өндөр байгаа юм. Басхүү Өмгөөлөл, хууль зүйн зөвлөгөө өгөх ганцхан чиглэлээр үйл ажиллагаа явуулдаг нийгэмлэгийн эзэмшлийн газар дээр түргэн хоолны үйлчилгээний газар аижллуулж, өнөөдүүл нь НӨАТ төлдөггүй байх нь зүйд нийцэхгүй нь тодорхой асуудал. Гэхдээ нэгэнт хууль бус үйл ажиллагаагаа зогсоосон гэх нэрийн доор татвараа нөхөн төлөх хууль эрхзүйн орчин байдаг эсэх нь тодорхойгүй байна.