МАН-ын бүлэглэлийн сөргөлдөөн дайн дажингаасаа хальж, төрийн эрх барьж буй улс төрийн хүчин гэдэг утгаараа улс төр, төр засаг, ҮХЦ-ийг хүртэл хямраахдаа тулсан. УАБЗ-ийг хүртэл хүчгүйдүүлж, эзэнгүйдэхдээ тулсан гэхээр хэр дажин болсныг нь тодотгох нь илүүц биз. Үнэндээ улс төрийн өрсөлдөөн сөргөлдөөн гэхээсээ илүүтэй өш хонзонгийн халз тулан өрнөж байгаа гэх нь зөв байх. Тулаан хэрээс хэтэрч, тив дэлхийн сонорт хүрч, олон улсын ажиглагчид ардчиллыг амар амгалангаар авчирсан гэх Монгол Улс “недаль”-дахдаа тулах нь уу хэмээн амьсгаа даран ажиглаж буй нь бодит үнэн.

Эрх биш эргүүтэж, эгдүүцэж, эвлэрэх эвлэх орон зайгүй болсон ч гэлээ ууган улс төрийн хүчний зангаргаа зааж, өчигдөр МАН УЗ-ийн хурлаа өргөтгөсөн хэлбэрээр хуралдуулж,  эвлэрлийн ажлын хэсэг байгуулсан. Ажлын хэсгийг УИХ-ын гишүүн асан, Эдийн засаг хөгжлийн сайд асан Ч.Хүрэлбаатар ахалж, МАН-ын дарга асан, Ерөнхий сайд асан С.Баяр, Б.Даш-Ёндон, Монгол Улсын Ерөнхийлөгч асан Н.Энхбаяр, УИХ-ын дарга асан М.Энхболд, Ерөнхий сайд асан Ж.Эрдэнэбат, Л.Оюун-Эрдэнэ, Хууль зүй дотоод хэргийн сайд асан Ц.Нямдорж, УИХ-ын гишүүн, Эдийн засаг хөгжлийн сайд Н.Учрал, УИХ-ын гишүүн С.Амарсайхан, УИХ-ын гишүүн З.Мэндсайхан, Ж.Бат-Эрдэнэ, Ж.Батжаргал, Улаанбаатар хотын захирагч Х.Нямбаатар, "Эрдэнэс критикал минералс" ТӨҮГ-ын захирал.Д.Тогтохсүрэн,  МАН-ын Нарийн бичгийн дарга П.Энхбаатар нар бүрэлдэхүүнд нь багтсан.

Ажлын хэсэг хоёр тал болж хуваагдсан намын гишүүд тэр дундаа МАН-ын дарга, УИХ-ын гишүүн Д.Амарбаясгалан, Ерөнхий сайд Г.Занданшатар нарыг эвлэрүүлж, 68-ын бүлгийг нэгтгэж чадах уу гэх асуултыг нийгэмд илгээв.

Эвлэрэх орон зайгүй, эвсээд хулгайгаа нуух гэсэн юм байх даа гэх хардлагыг ч бас хамтатгав. Шуудайд хийсэн үхрийн эвэр мэт бужигнаан эхнээсээ эвээ олох шинж дуулдаж байна. Тодруулбал МАН-ын УЗ болон “Эвлэрүүлэн зуучлах” ажлын хэсгийн зүгээс эзэнгүйдсэн УИХ-ын даргын сэнтийд Засгийн газрын гишүүн, Хүнс хөдөө аж ахуйн сайд Ж.ЭНхбаярыг томилохоор санал нэгдсэн гэнэ. Г.Занданшатар, Д.Амарбаясгалангийн “тулаан”-ы үеэр П.Сайнзориг гишүүнийг шууд бус утгаар нударгалсан буюу дарамталсан гэх шуугиан дэгдэж, Ж.Энхбаяр “Эр хүний хувьд л П.Сайнзориг гишүүнтэй уулзъя гэсэн. Эр хүмүүс хээр гадаа ч уулзаж болно, ганц шил юм тавиад ч уулзаж болно. Би заналхийлээгүй” хэмээн тайлбарласан. Спикер болчихоод заналхийлээд байхгүй гэж найдъя. Басхүү “эвлэрүүлэн зуучлах” багийн ажиллагаа хэр үр дүнтэй үргэлжлэхийг ч харзная даа...