Албан тушаалын төлөө өрсөлдөөн намынх нь зовлон болж, улмаар намын зовлонгоо төрийн зовлон болгосон эрх баригч намынхан өнөөдөр Тусгаар тогтнолын ордондоо удирдах зөвлөлийн хурлаа хийлээ. Хурлаар намын их хурлаа 11-р сарын 15,16-ны өдрүүдэд зохион байгуулах талаараа ярилцсан төдийгүй, өнгөрсөн дөрвөн сарын хугацаанд хоёр тал болж хуваагдсан явдал нь намын рейтингийг доош татаж, цаашлаад дараагийн сонгуульд ялагдалд хүргэж ч магадгүй гэдэгтэй санал нийлэн "Эвлэрүүлэх ажлын хэсэг" гээчийг байгуулжээ.

Ингэхдээ одоо нам дотроо идэвхтэй байгаа залуу гишүүд бус намын даргын албыг хашиж байсан ахмад улс төрчдөд хагарсан шаазан эвлүүлж наах даалгаврыг оноожээ. Тодруулбал тус "Эвлэрүүлэх ажлын хэсэг"-ийн Ч.Хүрэлбаатар ахалж, Н.Энхбаяр, С.Баяр,Д.Нямдорж, М.Энхболд нар эвлэрүүлэн зуучлах үйлчилгээ үзүүлэх гэнэ.

МАН-ын дотоод улс төрийн зодоон, сэнтий, эрх мэдлийн төлөөх тэмцэл өнөөдөр Монгол улс дараа жилийн төсвөө ч баталж амжаагүй, өвөлд өнөтэй орох нь уу, үгүй юу эсэх нь ч эргэлзээтэй байдалд хүргээд байгаа. Өвдөг шороодохоо шахсан Засгийн газар нь хүртэл есөн сайдаа солих болсон нь зодооны үеэр Засгийн газрынхаа талд ажиллаагүй гэдэг цаад шалтгаантай гэж харагдаж байгаа. МАН цаашид эвлэрэх нь үү, эсвэл хуваагдсан мөсөн уул болоод хоёр тийш хөвөх нь үү гэдгийг цаг хугацаа харуулах биз ээ.