Засгийн газрын хуралдаанаас гаргасан шийдвэрийг ЗГХЭГ-ын дарга Д.Амарбаясгалан танилцууллаа.

Тэрбээр “Өнөөдрийн Засгийн газрын хуралдаанаар нийт 14 асуудал хэлэлцлээ. Үүнээс гурван зүйл дээр мэдээлэл өгөе.  Монгол Улсын Засгийн газар, улсын хэмжээнд үйл ажиллагаа явуулах үүрэгтэй үндэсний хэмжээний хороодыг шинээр эмхлэн байгуулах үүргийг ЗГХЭГ-ын даргад өгсөн.

Тухайлбал, Улаанбаатар хотын түгжрэлийг бууруулах үндэсний хороо, Агаарын бохирдлыг бууруулах үндэсний хороо, Спортыг дэмжих үндэсний хороо зэрэг нийт 20 орчим хороог шинээр эмхлэн байгуулах үүрэг чиглэл өглөө.

“2023 оны төсвийг олон нийтээр  хэлэлцүүлж,  УИХ-д өргөн барина”

2023 оны Улсын төсвийг олон нийтийн дунд хэлэлцүүлэг зохион байгуулж тусгасны үндсэн дээр  УИХ-д  өргөн барих үүрэг чиглэлийг Ерөнхий сайдын зүгээс өгөөд байна.  Ард иргэдийн хувьд Монгол Улсын төсвийн хөрөнгө оруулалтын асуудлаар өөрсдийн байр суурийг илэрхийлэх боломж нөхцлийг  олгох нь зүйтэй гэж Засгийн газар үзлээ.  Тэгэхээр аравдугаар сарын 1-н хүртэл иргэд, олон нийтийн дунд хэвлэл мэдээллийн хэрэгслээр дамжуулан хэлэлцүүлэгдэнэ.

Гуравдугаарт,  “Эрдэнэс Монгол” ХХК-ийн  үйл ажилагааг жигдрүүлэх, цаашлаад Монгол Улсын баялгийн сан болгох чиглэлийг Ерөнхий сайдын зүгээс өнгөрсөн жил гаруйн хугацаанд баримталж ажиллаж байгаа. Энэ хүрээнд тус компанийн гүйцэтгэх удирдлагуудыг олон улсын туршлагатай, ялангуяа Сингапур, Норвеги зэрэг улсуудад баялгийн сангийн чиглэлээр ажиласан туршлагатай,  гадаадын болон дотоодын иргэдийн дунд сонгон шалгаруулалтыг зарлаж, гүйцэтгэх захирлыг томилох үүргийг өгөөд байна.

Дөрөвдүгээрт, Монгол Улсад үйл ажиллагаа явуулж байгаа аж ахуй нэгжүүдийн тооллогыг таван жил тутамд явуулж ирсэн байдаг. 2016-2021 оны хугацаанд Монгол Улсын  аж ахуй нэгжүүдийн бүртгэлд томоохон өөрчлөлт орсон байна. Энэ удаагийн тооллогод  нийтдээ 180 мянган аж ахуй нэгж байгууллага тоологдсон байна. 53.9 мянган хувиараа хөдөлмөр эрхлэгчид тооллогонд хамрагджээ.  Сүүлийн хоёр жил гаруйн хугацаанд төрөөс авч хэрэгжүүлсэн зарим арга хэмжээний үр дүнд аж ахуй нэгжүүдийн тоо нэмэгдсэн байна. Ялангуяа өнгөрсөн 5 жилийн хугацаанд нийтдээ 61.3 мянган аж ахуй нэгж нэмэгдсэн.  Харин  14.100 аж ахуй нэгж бизнесийн үйл ажиллагаа явуулах боломжгүй болсноо зарлаж,  татан буугдах хүсэлтээ өгсөн байна.  Эдгээр аж ахуй нэгжүүд татан буугдах нөхцөлөө бүрэн хангаж чадахгүй өнөөдрийг хүртэл явж ирсэн. Тиймээс төрийн зүгээс татан буугдах хүсэлтээ гаргасан аж ахуй нэгжид илүү хөнгөвчилсөн нөхцөлтэйгээр татан буугдах боломжийг олгож  байгаа.

Нөгөөтэйгүүр, иргэн, аж ахуй нэгжтэй хүнд суртал үүсгээд байгаа олон давхардсан төрийн бүтцүүдийг хялбаршуулах бодлогыг барьж байгаа. Энэ хүрээнд  ирэх оны нэгдүгээр сарын 1-нээс мэргэжлийн хяналтын газрын чиг үүргийг өөрчилж ажиллана. Нэг ёсондоо,  яамдуудад байх ёстой хяналт чиглэлийг яамдууд дээрээ аваачия. Мэргэжлийн хяналтын нэр, зорилгыг өөрчлөөд, төр өөрөө өөрийгөө хянадаг, хяналт шалгалтыг хийдэг байлгая гэсэн зорилгыг тавьж байна. Товчхондоо, төр   ард түмнийхээ өмнө хүлээсэн үүргээ биелүүлж чадаж байна уу гэдэг дээр төр өөрөө өөрийгөө хянадаг болно гэсэн үг. Тиймээс мэргэжлийн хяналтын байгууллагыг өөрчлөөд явна” гэдэг мэдээллийг өглөө.

-Төр хаанаа, хэнийг, хэзээ, яаж ажлуулдаг байхаа шийдэж чаддаг байх ёстой. Төр шийдвэртээ эзэн байх чухал-

Үргэлжлүүлэн сэтгүүлчдийн асуултад хариулт өгөв.

-“Эрдэнэт үйлдвэр” ТӨҮГ-ын дарга нар ажлаа хүлээлцээгүй байна. Ямар учиртай юм бэ?

-Засгийн газрын зүгээс ТӨБЗГ-т чиглэл өгөөд, ТӨБЗГ хорооныхоо хурлыг хийх замаар ажлыг хүлээлцүүлэх процесс өрнөнө. Ер нь өмнөх жишгээр бүх түвшинд томилогддог, ажил хүлээлцдэг байдал маш хариуцлагагүй явагдаж ирсэн. Нэг хүн томилогддог, нөгөө хүн чөлөөлөгдөж байна гээд хаалгаа хаагаад цаашаа явчихдаг. Эргээд төрийн залгамж чанар, ажил хүлээлцэх байдал бодлогын уялдаа холбоотой зүйл бүх түвшинд хаягдсан байдаг. Тэгэхээр ажил хүлээлцэх процессийг заавал нэг өдөр юм уу, нэг цагт хийгдэнэ гэсэн байдлыг өөрчлөх хэрэгтэй байна. Ялангуяа “Эрдэнэт үйлдвэр” гэх томоохон үйлдвэр ядаж ажил хүлээлцдэг  7, 10 хоногийн хугацаа байх ёстой юм билээ.  Харин ажлаа өгөхгүй, цааргалж байгаа зүйл огтоосоо байхгүй.

-Хороод шинээр эмхлэн байгуулна гэхээр давхардсан бүтцүүдийг бий болгох юм биш үү?

-Тийм зүйл болохгүй.  Тухайлбал, өнөөдөр Сангийн яам дэргэдээ санхүүгийн хяналт шалгалтаа аваад явж байгаачлан зарим нэг яам хяналт шалгалтын хэлтэстэй болно. Бүх яам хавтгайрсан хяналт шалгалт хийгээд явна гэж байхгүй. Ард иргэдэд давхар хяналт шалгалт, дарамт очдогийг болиулах гж байгаа. Нөгөөтэйгүүр төр өөрөө иргэндээ бүрэн дүүрэн үйлчилдэг, хуулиа мэддэг,  хуулиа хэрэгжүүлдэг байх ёстой. Төрийн албан хаагчид үүнд онцгойлон анхаардаг байх учиртай. Би багш байлаа гэхэд,  Монгол Улсад мөрдөгдөж байгаа 800 хуулиас зайлшгүй мэдэж байх ёстой нь аль вэ гэдгийг мэддэг байх ёстой. Хуулиа мэдэж байгаа эсэх дээр төр хяналт тавьдаг байх. Түүнээс биш төрийн албан хаагчийн шалгалт өгөөд л бүх зүйл болчлоо, бүтчихлээ гэдэг байдлаа болиё. Хуулиа зөв ойлгоод, чанартай үйлчилгээ үзүүлж чадаж байгаа эсэх дээр нь хяналт тавьдаг болж байгаа гэсэн үг.