Хүүхэд залууст эх оронч, хилч үзлийг төлөвшүүлэх, цэргийн алба хаагчдад цэргийн дээд цолны үнэ, цэнийг мэдрүүлэх зорилгоор БНМАУ-ын гурван маршалын нэрэмжит ӨРЛӨГ ЖАНЖНЫ ИХ ТАНХИМ-ыг Хил хамгаалах ерөнхий газарт байгууллаа.Одоогоос 88 жилийн өмнө буюу 1936 онд Маршал хэмээх цэргийн дээд алдар бий болж, Цэргийн яамны явдлын сайд бөгөөд бүх цэргийн жанжин Г.Дэмид, ерөнхий сайдын 1 дүгээр орлогч, мал тариалангийн яамны сайд Х.Чойбалсан нарт анх удаа БНМАУ-ын өрлөг жанжин Маршал хэмээх цэргийн дээд алдар олгож байжээ. Үүний дараагаар Халхын голын байлдааны ялалтын 40 жилийн ойгоор АИХ-ын тэргүүлэгчдийн 1979 оны 08 дугаар сарын 14-ний өдрийн зарлигаар МАХН-ын төв хорооны 1 дүгээр нарийн бичгийн дарга, БНМАУ-ын АИХ-ын тэргүүлэгчдийн дарга, Улсын батлан хамгаалах зөвлөлийн дарга, Армийн генерал Ю.Цэдэнбалд цэргийн дээд цол болох БНМАУ-ын маршал цолыг олгосон түүхтэй.

Өрлөг жанжны их танхимд гурван маршалын эдэлж хэрэглэж байсан хувцас хэрэглэл болон, эд зүйлсийг байршуулжээ. Мөн чөлөөт уран бүтээлч СТА Т.Алтанбагана, Ц.Насантогтох нар энэхүү танхимыг байгуулахад хүндтэй үүрэг гүйцэтгэсэн бөгөөд нээлтийн арга хэмжээний үеэр ХХЕГ-ын даргын тушаалаар “Хилийн төлөө” тэмдэгээр шагнууллаа.

Орчин цагийн музей үүсэж хөгжсөний түүхэн 100 жилийн ойг тохиолдуулан зохион байгуулж буй тус танхим цаашид улам өргөжиж зарим үзмэрүүдийг виртуал хэлбэрт оруулах болон хилийн цэргийн музейн өргөтгөл тун удахгүй ашиглалтад орж илүү сонирхолтой олон үзмэртэй болж буй талаар албаныхан мэдээллээ.