Хэдхэн хоногийн өмнө ажлын байран дээр хуулийн байгууллагын шалгалт орж, үзлэг хийсэн. Хуулийнхан ажлаа хийж байгаа хойно шалгуулах нь бидний үүрэг. Гэм байвал бид хариуцлагаа хүлээх учир харин эрх мэдэл, албан тушаалаа урвуулан ашиглагчид гэм буруугаа хүлээж, хэргээ хүлээгээрэй. Баримт бүхний араас хөөцөлдөж, хүн үлдээхгүй гаргаж тавих үүргээ бид ч хүлээх болно.

Нүүрсний хулгай гэх хэрэгт холбоотой байж болзошгүй албан тушаалтнууд ар араасаа шалгагдаж, эхнээсээ саатуулагдсан.

"УБТЗ ХНН"-ийн хэлтсийн орлогч дарга 7.3 тэрбум төгрөг бэлнээр хураалгасанд цочирдсон монголчууд даргынх нь гэрээс хэд гарч ирэх бол гэсэн таамаг дэвшүүлсээр. Гэхдээ нэг тоо бодож үзье. Мэргэжлийн хэллэгээр нэг состаб буюу 50 цуваа вагонд ачаагаа ачуулах гэсэн 4000 аж ахуй нэгж, иргэний урт дараалал байдаг аж. Монголчууд хэзээний л дугаарлаж, ээлжээ хүлээж сураагүй тул өмнөх дугаарлалтыг давж өнөө маргаашгүй ачаагаа ачуулах гэсэн яаралт, сандралт дээр үндэслэсэн авлигын сүлжээ цэцэглэн мандсан өнөөдөр эхнээсээ илчлэгдэж байна.

Аж ахуй нэгж, иргэд ачаагаа хурдан ачуулах гэсэн хүслээр оочир дайрах гэдэг ажиллагаа явагдаж энэ нь 400-600 сая төгрөгрөөр үнэлэгдэж эхэлсэн. Ингэхээр ковид гэх цар тахлаар далимдуулсан 3 жилд 7.3 тэрбум төгрөг бол ширхэгийн тамхины завгай мөнгө шиг болтлоо авлига авсан болж таарав уу? Орлогч дарга нь тэрбумтан болсон бол дараагийн дарга нь ихнаядтанууд болоо биз ээ.

Улаанбаатар төмөр зам хувь нийлүүлсэн нийгэмлэг дотор бугшсан авлигын сүлжээ С.Батдөлөөр зогсохгүй.

Үүнд "УБТЗ ХХН"-ийн дарга Х.Хэрлэн, Тээвэр зохион байгуулалтын албан дарга М.Цогт болон өмнө энэ албан тушаалд ажиллаж байсан дарга нар, Замын орлогч дарга Д.Амарбаясгалан, Удирдлагын асуудал хариуцсан замын орлогч дарга Н.Энхцогт, шүүхэд төлөөлөх, гэрээний эрх зүйн харилцааны хэлтсийн дарга О.Баясгалан гээд хичнээн хүн холбогдохыг таашгүй.

Хуулийн байгууллагаас дараа дараагийн албан тушаалтныг нүүрсний хулгайн гэгдэх авлигын хэрэгт холбогдуулан шалгаж эхэлсэн гэдэг албан бус мэдээллийг өгсөн.

Үүнээс хоёр хүнийг онцолвол УБТЗ-ын Удирдлагын асуудал хариуцсан замын орлогч буюу НЗУП гэж нэрлэгддэг Н.Энхцогт, эрх зүйн, харилцааны хэлтсийн дарга О.Баясгалан нар юм.

2018 онд удирдлагынхаа өгсөн үүрэг даалгаварыг биелүүлсэнгүй гэх үндэслэлээр ажлаас халагдаж, УБТЗ ХНН-тэй шүүхийн танхимд үзэлцэж явсан О.Баясгалан өдгөө УБТЗ ХНН-ийн шүүхэд төлөөлөх, гэрээний эрх зүйн харилцааны хэлтсийн даргаар ажилладаг.

Аалзны тор гэж үзвэл торыг хэрхэн нэхэх вэ гэдэг ямар хээ сүлжээ гарах вэ гэдэг хорыг энэ хоёр найруулдаг байж болох уу?
50 цуваа вагонд ачаа ачуулах оочир урагшлуулах авлигын төлбөрийг 400-600 сая төгрөгөөр хүргэж, хэдэн тэрбум төгрөгийг бий болгосон ажилд шалгагдахаас гадна хууль зөрчсөн хэд хэдэн үйлдэл байна.

Тодруулбал, О.Баясгалан УБТЗ ХНН-ийн хуульчаар ажиллаж байхдаа вокзалын дэргэдэх 1000 машины зогсоолын газрыг хэрэгт санаатайгаар саад учруулж, бусдыг хохироосон тухай 2022.04.05 өдрийн 5/2226 дугаартай Монгол Улсын Ерөнхий прокурорын туслах прокурор, шүүхэд төрийг төлөөлөх хэлтсийн дарга Д.Булганцэцэгийн гарын үсэгтэй албан бичиг АТГ-т хаяглагджээ.

Тус албан бичигт гэмт хэргийн шинжтэй байж болзошгүй байдал тогтоогдсоныг дурджээ

...Улаанбаатар төмөр зам нийгэмлэгийн эрх бүхий албан тушаалтан О.Баясгалангийн эс үйлдэхүйгээс бие даасан шаардлага гаргах эрхээ алдан Олон улсын гэрээгээр хүлээсэн үүргээ Монгол Улсын Засгийн газар биелүүлэх боломжгүй нөхцөл байдал үүсэж, бусдад давуу байдал бий болгож, газар эзэмших, ашиглах эрхэд хохирол учруулсан байж болзошгүй тул шалгуулахаар 14 хуудас бүхий хавсралттай материалыг хүргүүлэв гэжээ. Угтаа бол өнгөрсөн жилээс АТГ-т шалгуулж байх үндэслэл нь бүрдчихээд байхад 2022.09.30-ны өдөр Монгол-Оросын хувь нийлүүлсэн нийгэмлэг Улаанбаатар төмөр замын дарга Х.Хэрлэнгийн Б/I/475 тоот тушаалаар О.Баясгаланг Хөдөлмөрийн эрх зүйн харилцааны хэлтсийн даргын ажлаас чөлөөлж, шүүхэд төлөөлөх, гэрээний эрх зүйн харилцааны хэлтсийн даргын ажилд томилсон байгаа юм.

Түүгээр ч зогсохгүй О.Баясгалан нь УБТЗ-д хэлтсийн даргын албан тушаалтай ч хэдэн зуун саяар үнэлэгдэх өмгөөллийн ажлыг давхар хийдэг талаарх гомдол Өмгөөлөгчдийн холбоонд очиж 2019 оны 10 сарын 18-ны өдөр батлагдсан “Өмгөөллийн тухай хууль”-ийн 15.1.12-т “хууль зүйн чиглэлээр багшлах, эрдэм шинжилгээ, судалгааны ажил хийх, өмгөөллийн хуулийн этгээд, мэргэжлийн холбоо, түүний хороодын чиг үүрэгт хамаарахаас бусад ажил, албан тушаал хавсран эрхлэх”-ийг өмгөөлөгчид өмгөөллийн үйл ажиллагаа эрхлэх явцад хориглодог байхаар заасныг дурдан гомдол гаргажээ.

О.Баясгалан даргатай холбоотой дахин нэг баримтыг хүргэхэд түүний эхнэр Сэрээнжав нь АТҮТ-д гэрээт өмгөөлөгчөөр ажилладаг байсан бөгөөд нүүрсний хулгай, оочир урагшлуулах авлигын хэргийг орондоо төлөвлөж, хоорондоо шаардлагатай мэдээллийг солилцдог байж болзошгүй байна. Ийнхүү түүнд хамааралтай хууль зөрчсөн үйлдлүүдэд шалгахдахгүй хариуцлага хүлээхгүй өнгөрч байсан бол энэ удаад нүүрсний хулгайн гэх хэрэгт хамгийн түрүүнд шалгагдаж, авлигын аалзны торон сүлжээг хэрхэн зангидсанаа үнэнээр нь өгүүлэх учиртай.

Мөн О.Баясгалангийн нэгэн адил УБТЗ ХНН-ийн авлигын сүлжээний гол дүрийн нэг Н.Энхцогт хариуцлагаа хүлээж бусдаас хулгайлсан авлигын мөнгийг эргүүлэн өгөх нь зүйтэй юм.

Төгсгөлд нь Н.Энхцогтын талаарх нэгэн бичлэгийг хүргэе. Авлигын хэрэгт холбоотой эсэх нь өнөөдрийн байдлаар албан ёсоор тогтоогдоогүй байгаа ч ажлын байранд дээрээ архидсан, бусдад бэлгийн дарамт үзүүлэн агсамнаж, аархсан үйлдэлдээ хариуцлага хүлээх биз ээ.