Дорнод аймгийн Баянтүмэн сумын нутаг дэвсгэр, хилийн зурвасаас ердөө таван км зайд нүүрс олборлохоор зэхэж буй хууль зөрчсөн үйлдлийн талаар бид өмнө мэдээлсэн.  Энд дарж үзнэ үү. 

Дахин сануулахад, улсын дархан хилийн хориотой бүсэд халдсан “Меланж” гэх компани дөрвөн жилийн өмнө тусгай зөвшөөрлөө авсан байдаг. Тэдний эл хууль зөрчиж, “даварсан” үйлдэлд УИХ-ын дарга асан М.Энхболд, тухайн үеийн Ерөнхий сайд, одоогийн УИХ-ын гишүүн Ж.Эрдэнэбат нарын эрх мэдэлтнүүд холбоотой гэгдээд буй.

Тэрчлэн тус компанийн туслан гүйцэтгэгчээр Хөгжлийн банкнаас 33 тэрбумын зээл “тоносон” асуудалд холбогдсон УИХ-ын гишүүн Х.Ганхуягийн хамаарал бүхий “Вертекс майнинг партнерс” компани ажиллаж байгаа. Тэд Хилийн тухай хуулийн 26.3.1-д заасан “Хилийн зурвас газар эзэмшүүлэх, өмчлүүлэхийг хориглох” гэснийг зөрчин, хуулиас дээгүүр алхаж, лиценз авсан нь олны анхаарлыг татаж байна.

Дархан хил рүү халдсан уг үйлдлийг УИХ-ын гишүүн Ц.Сэргэлэн зогсоохоо /2021.12.27/ мэдэгдсэн.

Тэгвэл МАН-ын “60 тэрбумын бүлэглэлийнхэн” оролцож, дархан хил рүү халдсан уг үйлдлийг УИХ-ын гишүүн Ц.Сэргэлэн зогсоохоо /2021.12.27/ мэдэгдсэн. Гэвч үүнээс хойш даруй таван сар өнгөрчээ. Тэрбээр тухайн үед мэдэгдэл хийж, өөрийг нь дээрх асуудалтай хамаатуулж бичсэн хэвлэл мэдээллийн байгууллагад хандаж, тайлбар мэдээлэл хүртэл хүргүүлж байв. 

Уг мэдээлэлдээ, "...хилийн зурвас тэр дундаа тус бүс нутагт олборлолт явуулах нь байгаль орчин, иргэдийн аюулгүй байдалд сөрөг нөлөө үзүүлж болзошгүй тул  Монгол хууль, Олон улсын эрх зүйн хүрээнд шийдэх учиртай. Хилийн бүсэд лиценз олгосон эл үйлдэл нь холбогдох хуулийн заалтуудыг зөрчсөн үйлдэл гэж хардаж байгаа тул цагдаагийн байгууллагад шалгуулах хүсэлт гаргасан. Газар нутагт хамаарах Дорнод аймгийн удирдлагуудыг ч шалгуулах нь зүйтэй” гэсэн байдаг. Мөн хилийн зурвасаас олборлосон нүүрсийг Хятад руу зөөвөрлөх замын асуудал Зам тээвэр, хөгжлийн яаман дээр яригдаж байгаа гэсэн ноцтой мэдээллийг ч дурдаад амжсан. 

Гэвч үүнээс хойш таван сар өнгөрчээ. Дорнод аймгийн хамгийн үржил шимт, хар шороон хөрстэй гэгддэг Баянтүмэн сум /Хилийн 0132 дугаар ангийн II застав орчим, улсын хилээс тавхан км зайд/-ын нутгийг ухаж сэндийчээд, ашигт малтмалыг нь урд хөрш рүү хэзээ мөдгүй ачиж явахаар увайгүй этгээдүүд улайран дайрч байхад, эрхэм гишүүн ийнхүү хуруугаа хөдөлгөхгүй суугаа нь хэр зохимжтой вэ?

Ам ажил хоёроо нийцүүлж, амлалтаа хэзээ биелүүлэх вэ, Ц.Сэргэлэн гишүүн ээ.

Check.mn сайтын сурвалжлах баг газар дээрээс нь бэлтгэсэн бодит мэдээллийг тун удахгүй хүргэнэ.