Нэг хэсэг Өмнөговь аймгийг Ажнай аймаг гэж нэрийдэх хэмжээний эрх дархаа тогтоож, эзэрхэж явсан нь саяхан. 

Үүний араас Дорноговь аймгийг Дэлгэрсайхан аймаг хэмээн нэрлэх хэмжээнд л эзэгнэж байгаа гэхэд үнэнээс хол зөрөхгүй. Угтаа бол Дорноговь аймаг болон Монгол Улсын хамгийн том боомт Замын-Үүд суманд Б.Дэлгэрсайхан сайдын гар, хуруу оролцоогүй, хошуу дүрээгүй ажил, тендер, томилгоо гэж үгүй.

Бүх зүйл дээр давуу байдал эдэлж Дорноговийн хаан гэх хоч зүүтлээ хөрөнгөжиж УИХ-ын гишүүнээр хоёр удаа сонгогдож, хоёр ч засагт сайд хийж яваа. 

Тэгвэл өнгөрсөн арванхоёрдугаар сард их хэмжээний буюу 298,8 тонн хулгайн жоншыг хилээр нэвтрүүлэх гэж байгаад баригдсан хэрэг гарчээ. 

Хэргийг тодруулбал Замын-Үүд сумаас 80 км зайд байрлах жоншны бичил уурхайгаар ашиглах болохуйц газар байдаг аж. Тухайн газарт одоогоор үйл ажиллагаа эрхлэх зөвшөөрлийг хэн нэгэн хуулийн этгээд, хувь хүнд олгоогүй бөгөөд тодорхой хэлбэл ашиглах боломжгүй юм байна. 

Гэтэл Монголдоо хамгийн сайн чанарын гэж тогтоогдсон жоншыг ухаж улсын хилээр гаргах санаархсан байгаа юм. Тус хэргийг Э, Х нарын иргэд үйлдсэн байна.

Тус хэргийн талаар цагдаагийн байгууллагаас тодруулахад: Хэргийг Дорноговь аймгийн Цагдаагийн газрын Мөрдөн шалгах тасагт эрүүгийн хэрэг үүсгэн, шалгалтын ажиллагаа үргэлжилж байна гэлээ. 

Ийнхүү их хэмжээний жоншийг хулгайлж, хууль бусаар хил давуулах зоригтой үйлдэл хийсэн нь учиртай. Тодруулбал, Дорноговь аймагт харцага Гантулга гэж бий. УИХ-ын гишүүн, Зам тээврийн сайд Б.Дэлгэрсайханы хамаарал бүхий этгээд. Бүхий л тендер, ашгийн дээжийг хүртэж тэрбумтан болсон түүний шуналын сэтгэл нь цадах болоогүй бололтой. Ховдогийн шуналаа барьж дийлэхгүй хулгай хийсэн нь ар нь түц буюу Б.Дэлгэрсайхан сайдад найдаа биз. Нэг нь төрийн өндөр сэнтийд тухалж, нөгөөх нь тэрбумтан болсон хоёр ийнхүү хулгайн хэргийн хөшигний ар дахь нууц ноёнтонууд болсон нь ч учиртай. ҮРГЭЛЖЛЭЛ БИЙ…