Их хүссэн хүнд төрийн жолоог бүү атгуул гэдэг үгийн утга, агуулгыг энэ цаг үед Монголчууд яс махандаа шингэтэл мэдэрдэг болжээ. Үүний нэг жишээ Баян-Өлгий аймагт өрнөж байна. Олон жил МАН засагласан тус аймаг өнгөрсөн орон нутгийн сонгуулиар АН ялсан цөөн хэдэн аймгийн нэг. Албан тушаал, эрх мэдлээр өлсөж, цангасан АН-ынхан хаа сайгүй халаа, сэлгээ хийх нь ойлгомжтой ч зарим нь хэрээс хэтэрч байгааг эх сурвалжууд мэдээлж эхэллээ.

Манай редакцид ирсэн мэдээллээр Баян-Өлгий аймгийн Музейд олон талын эрх ашиг, шуналын шүлс үсчих болжээ. Тэгээд ч зогсохгүй захирлын албан тушаалыг хуурамч дипломтой, АТГ-аас ашиг сонирхлын зөрчилтэй хэмээн буцаагдсан К.Сатжан гэгчийг томилохоор улайрч байгаа аж.

Угтаа бол АН ялсан болохоор өмнөх МАН-ын үеийн томилогоог бүрэн цэвэрлэж байгаа гэх боловч К.Сатжан нь МАН-ын гишүүн бөгөөд Музейн захирал болмогц АН-ын гишүүн болж, далайсан газар нь далд орж, далласан газар нь ил гарна гэх тохироог хийж, андгай, тангараг өргөжээ.

Мөн А.Гүлмайра гэх Баян-Өлгий аймгийн АН-ын гишүүн эмэгтэй тухайн албан тушаалд томилогдохоор хөлийн хурдаа сорьж яваа аж.

Гэхдээ эдгээр хоёр эмэгтэйн аль нь ч томилогдсон хууль зөрчигдөж, эрх ашиг, шуналыг гүйцээх утсан хүүхэлдэй болох юм. Ингэж шунаж байгаа нь Музейн сан хөмрөгийн нийт үнэлгээ гурван тэрбум төгрөгт хүрдэг ажээ. Нэг нь намаасаа урваж, нөгөөх нь хууль зөрчин ийнхүү томилгоо хийх шалтгаан гурван тэрбум төгрөгийн үнэлгээ бүхий сан хөмрөг, үзвэрт байна уу гэх хардлага төрж байгаа юм. Түүхийн дурсгал, ховор нандин зүйлсээ гадагшаа гаргаж худалдаад, ашиг хонжоо олсон олон жишээг бид мэднэ.

Тэгвэл энэ удаад Музейн сан хөмрөгөөр орлого олж, баяжигчдын жагсаалтыг Баян-Өлгий аймгийн Засаг дарга Д.Зангар, Баян-Өлгий аймгийн ИТХ-ын дарга А.Бегарис нар үргэлжлүүлэхээр шулуудсан аж. Д.Зангарын хувьд гаалиас төрсөн баяжигчдын нэг. Угсаа, угшил нь гаалийн байцаагчаас эхэлсэн түүнийг гянтболд буюу вольфрам чулууг хууль бусаар хил давуулж, дундаас нь ашиг олж хөрөнгөжсөнийг Баян-Өлгийн учир мэдэх хүмүүс ярьдаг. Харин ИТХ-ын А.Бегарисын хувьд аав, ээжийн үлдээсэн хөрөнгийг өдгөө улс төр, төрийн албанаас зузаатгах төлөвлөгөө гаргасан бололтой.

Ямартай ч Д.Зангар Засаг дарга К.Сатжаныг, ИТХ-ын дарга А.Бегарис А.Гүлмайра гэгчийн захыг нь мушгиж, аймгийн музейн даргын албан тушаалын уралдааны начны найраа улаан, цагаандаа гарчээ.